Perspectiva Independiente without background 001

Minister Oduber: Ley di All inclusive ta den proceso pa yega Parlamento di Aruba

Otmar07
Durante Conferencia di Prensa di Minister Oduber, el a elabora un poco mas riba e status di e cambio den ley pa hotelnan All Inclusive. E ley ta canando su caminda unda e siman aki e la sali pa Raad van Advies.

Tin un rapport traha cu recientemente a keda presenta den Parlamento unda a sinti un sosten for di e miembronan di Parlamento, ademas cu ya caba a ricibi un mocion, cu sosten unanime, pa bin cu reglamentacion y legislacion pa loke ta trata e aspecto di all inclusive aki na Aruba. Diamars a trata e cambio di ley den Conseho di Minister y lo ratifica esaki diabierna unda na su turno e ta sali pa Raad van Advies. Ta spera cu dentro di poco lo por trate na Parlamento di Aruba pa concretisa esaki.

Mientras tanto, Minister Oduber ta sigui reuni cu AHATA. Ta asina cu e ley lo tin un reprecusion pa hotelnan exsistente tambe mirando cu e ley no ta trata solamente hotelnan nobo  y pa e hotelnan exsistente mester acorda riba un mix. Tabatin varios reunion cu e entidad cu ta representa mayoria hotel riba nos isla y ta spera cu den e proximo reunion diabierna por yega na otro, pa e landsbesluit cu ta forma parti di e landsverordening por keda completa pa bay Parlamento.

Un di e cambionan ta cu antes un permiso pa hotel ta wordo otorga unicamente pa Minister di Salubridad. Un ley anticua, mas cu ochenta aña bieu, cu ta enfoca riba aspectonan di salud y hygiena. Awe ta cambie unda Minister di Turismo tambe ta firma hunto cu e Minister di Salubridad.

E mandatario ta termina bisando “Den e criterianan cu tin di haber cu turismo, hospitalidad y cu economia ta wordo incorpora den e landsbesluit aki pa sigura un maneho mas coherente y un maneho mas efectivo tambe pa futuro.”

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.