Respeta ley of scohe pa oportunismo politico!

Siman pasa Raad van Advies a manda su conseho riba e prome Presupuesto Supletorio di 2014 pa gobierno. Den e conseho aki Raad van Advies a publica e resultado di su analisis di e desicion pa wanta e presupuesto 2014, di no firma esaki pa e bira ley y nan analisis di e KB di gobierno di Reino. For di su analisis legal Raad van Advies ta yega na e conclusion cu e desicion pa wanta e presupuesto 2014 y e KB, niun di dos tin base legal den Constitucio, den Statuut of den Reglamento di Orden di Gobernador di Aruba. Esaki ta loke Raad van Advies ta CONSTATA. Raad van Advies no ta conseha gobierno of parlamento kico pa haci. E unico cos cu nan a haci ta analisa Statuut, Constitucion di Aruba y Reglamento di Orden di Gobernador y a conclui cu niun caminda esakinan ta duna base na e desicion pa keda sin firma e presupuesto of na e KB. Esaki no ta un conseho. E ta un echo cu ta wordo constata!

Di partido MEP y di PDR nos ta custumbra pa tende nan broma cu nan experticio legal. Pero e biaha aki e expertonan a keda keto, mientras cu nan tambe, mescos cu Raad van Advies por a studia e documentonan y yega na e mes un conclusion cu Raad van Advies. Enbez di haci esey, MEP y PDR a sostene e desicion y e KB y a purba saca probecho politico for didje. AVP si a busca conseho legal y a bisa for di comienso cu tanto e desicion di no firma e presupuesto y e KB ta ilegal. Siman pasa e partido MEP a scohe pa ataca e presidente di Raad van Advies comosifuera ela haci algo ilegal. Partido MEP a declara cu Raad van Advies ta bruha cos. Awe nos ta pidi e lidernan di e partido MEP y PDR, cu ta abogadonan cu hopi experiencia, pa declara publicamente si nan ta haya cu e desicion pa no firma e presupuesto y e KB ta legal of no.

Nos no kier pa nan ataca niun instituto of hende of sconde tras di un otro. Nos ta pidi djis pa nan usa nan experticio legal extenso cu nan ta bisa di tin y bisa si e desicion pa wanta e presupuesto y no firm'e y si e KB di gobierno di Reino ta legal. Mester tin claridad completo riba e tema aki. Niun partido y niun politico por keda sin mustra si nan ta respeta ley y constitucion di nos pais.

CONSEHO OF ANALYSIS
Esnan cu no kier reconoce cu e desicion pa no firma e presupuesto 2014 y e KB di gobierno di Reino ta ilegal, ta bisa cu e conseho di Raad van Advies ta djis un conseho. Y cu parlamento mes no ta accepta tur conseho di Raad van Advies. Nan ta haya cu e conseho di Raad van Advies riba e desicion pa wanta e presupuesto cu parlamento ya a aproba y e KB, lo ta un conseho cu no mester tene na dje.

E ponencia aki ta completamente fout. Pa e motibo aki. Tin un diferencia grandi entre un conseho y constata un echo. Un conseho ta por ehempel si Raad van Advies scirbi cu ta miho pa no introduci e BBO den forma acumulativo. Gobierno por dicidi di no tuma e conseho. Si gobierno dicidi di tog haci loke e ta pensa di haci,  no ta kibra ley. E ta tuma e desicion tog pasobra e ta kere diferente. Raad van Advies por conseha pa cambia un ley por ehempel pasobra e ley falta lago. Esey ta un conseho cu gobierno por acepta of keda sin accepta. Den e caso di e desicion pa wanta e presupuesto y e KB di gobierno di Reino, Raad van Advies no ta djies duna un conseho. Den e caso aki, manera Raad van Advies sa haci mas biaha, ela CONSTATA cu e desicion di wanta e presupuesto, di no firm'e y e KB, NO TA DI ACUERDO CU LEY. NAN TA ILLEGAL. NAN NO TIN BASE LEGAL! Esaki no ta un conseho basa riba un opinion legal, cu bo por bisa cu bo tin otro opinion of cu bo ta scohe pa haci otro cos. Esaki ta un ECHO cu Raad van Advies ta CONSTATA: e desicion pa wanta e presupuesto ta contra ley y e KB ta contra ley.

Ya cu no ta trata di un OPINION legal, pero un echo ilegal cu ta wordo CONSTATA, huristanan por bisa cu loke Raad van Advies ta bisa ta berdad of no. Si MEP y PDR tambe yega na e conclusion cu loke Raad van Advies ta bisa ta berdad, anto nos tur mester actua di acuerdo cu ley. Si MEP y PDR ta haya cu loke Raad van Advies a CONSTATA como un ECHO, no ta berdad, e ora MEP y PDR mester bisa cu Raad van Advies NO tabata tin rason y cu mester sigui e caminda ilegal cu ta canando contra Aruba. Nan mester bisa esey y para p'e awor y den futuro!

Expresionnan haci den e articulo aki no necesariamente ta refleha opinion di ArenaPoliti.co