Partido MEP a tuma nota di e reaccion di lider di fraccion di AVP, Baba Herde riba e asunto di sostenibilidad. Sinembargo e reaccion di Baba Herde a resulta mediocre y sumamente pober y alabes ta demostra cu tur e ponencia y argumentonan cu MEP a treci padilanti den su ultimo comunicado a keda intacto, esta 1) Cu ta Gabinete Eman a laga e Ruimtelijk Otwikkelings Plan (ROP) na werki, caminda nan a masacra e areanan berde (“groen gebied”) y a laga verkavel e terenonan aki pa nan compinchinan politico, 2) cu segun ordenacion teritorial e areanan di Alto Vista y Urirama ta destina exclusivamente pa naturalesa y como tal no por tin edificio, construccion y molina di biento ubica aki, 3) cu durante e ultimo 6 añanan lo unico cu a ser construi ta e parke solar dilanti Aeropuerto y tambe un plan fantasma pa un Smart Community na Kibaima, cu te ainda no tin fin di wordo realisa, 4) cu ta bao di Gabinete Oduber a bin cu e proyectonan sostenibel di Seawater Reverse Osmosis, Recip y e Parke di Molina na Vader Piet, cualnan berdaderamente a percura pa reduci drasticamente e uzo di fuel oil cu mas di 30%, 5) cu ta Gabinete Eman a percura pa manda nos pais bancarota, haciendo asina nos finansa publico no-sostenibel pa e proximo 20 añanan.

Distribimento di placa di pueblo
Riba tur e puntonan menciona Baba Herde no por a trece ningun argumento solido padilanti pa contra-aresta esakinan, pero e biaha aki el a critica cu MEP no ta kere den e concepto di sostenibilidad, siendo cu tabata hustamente e gobierno di MEP mes tabata e pionero den introduci tur e proyectonan sostenibel durante su gobernacion. Sinembargo locual MEP ta critica y lo sigui critica fuertemente ta e distribimento y malgastamento  di placa sin misericordia door di gobierno di AVP, organisando pa 6 aña consecutivo conferencianan berde miyonario sin cu esaki a duna resultado concreto pa nos pais. Fuera di tur e conferencianan miyonario, miyones di florin a bay den pago pa discurso di e orador Al Gore, e proyecto fantasma di e boto di Wubbo Ockels, Richard Branson, Carbon War Room, TNO, Green Bus etc. Por lo demas tur siman y pa simannan largo Prome Ministro Mike Eman riba su propio invitacion ta bay den exterior riba custia di pueblo pa duna conferencia, charla, show etc. sin cu pais Aruba por a cosecha frutanan for di tur e locuranan aki.

100% sostenibilidad
Y locual MEP tambe ta contra ta e manipulacion constante di Mike Eman y AVP, cu na 2020 Aruba como e prome pais na mundo lo ta 100% sostenibel y pa cu e “logro” aki Aruba lo wordo poni riba mapa internacional. Pero nunca e politiconan di AVP, incluso Baba Herde no ta bisa pueblo cu tin varios pais na mundo cu ya caba ta yegando na e concepto di 100% di sostenibilidad. Adhunto partido MEP ta publica un tabel (compila pa Yale and Columbia University) caminda por mira cu paisnan manera Islandia (93.5%) y Suisa (89.1%) ta yegando caba na 100% di sostenibilidad. Te hasta paisnan den nos cercania manera Costa Rica (86.4%), Cuba (78.1%) y Colombia (76.8%) ta bastante leu caba pa yega na e 100% di sostenibilidad cu constantemente AVP ta papia di dje. Y pa completa obra y pa berguensa di politiconan di AVP, pais Aruba no ta aparece mes den e top 10 di paisnan mas sostenibel na mundo. Asina mes tur dia politiconan di AVP kier sigui manipula mente di pueblo cu na 2020 Aruba ta e promer pais na mundo cu lo yega na 100% di sostenibilidad y cu e “heroe y visionario” Mike Eman lo bay den historia  como e prome mandatario na mundo pa logra esaki. Alabez lo ta bon pa Baba Herde splica pueblo, ta na ki porcentahe nos pais ta para na e momento aki pa loke ta su sostenibilidad. Tur cos ta indica cu nos ta na apenas 40% y di cual 30% ta bin di e logronan di MEP pa loke ta e proyectonan di Reverse Osmosis, RECIP y Vader Piet, pero tur dia Mike Eman den su conferencianan berde ta sigui pronkia cu pluma di MEP, ya cu riba su propio esfuerzo e no a logra net nada riba tereno di sostenibilidad.

Expresionnan haci den e articulo aki no necesariamente ta refleha opinion di ArenaPoliti.co