ORANJESTAD/NEW YORK- Papa Fransisco, e prome Papa di Latino-America, a tene un discurso acogedor durante e di 70 Asamblea General di Nacionnan Uni. Prome Minister di Aruba Mike Eman, como miembro di e delegacion Hulandes na Nacionnan Uni na New York, tabata den sala na momento cu Papa Fransisco a hiba palabra. Un momento special y unico. No ta tur dia un oportunidad special asina ta toca na bo porta. Prome Minister Eman un bes mas tin e honor di ta invitado pa forma parti di e delegacion Hulandes durante un Asamblea di peso manera esaki. Banda di ta orador durante varios foro, Prome Minister a haya oportunidad pa presencia discurso di Papa Fransisco, kende ta e di 5 Papa cu ta papia den sala di Nacionnan Uni.

Den su discurso Papa Fransisco, un Papa hopi progresivo, a toca varios tema di interes. El a condena paisnan rico cu pa motibo di ta hambra pa placa y poder ta destruyendo hopi fuentenan natural den mundo cabando asina cu humandidad. Esnan pober y vulnerabel ta victima di e hamber pa poder y placa aki. Mundo ta den un situacion dificil cu guera tur caminda, maldad den forma di entre otro contrabanda di hende, opresion politico y un terorismo creciente y presente tur caminda. Den su discurso Papa a pidi lidernan mundial pa bringa contra e forma mahos di e forma con capitalismo ta manifesta su mes. Un di e puntonan cu Papa a laga resalta den su discurso ta pa esnan cu tin mas yuda esnan vulnerabel. Esaki ta parti di vision di Aruba tambe. Logra un prosperidad comparti. E mundo aki y su fuentenan natural ta di nos tur y meta di gobierno ta pa percura pa e prosperidad yega den tur hogar.  Discurso di Papa Fransisco a toca curazon di tur presente. Pa Prome Minister di Aruba y demas miembronan di e delegacion Hulandes un momento bunita y sagrado.