Brazil ta celebra e di 60 aniversario di nan Parokia 
Mescos cu a haci na Inmaculada Concepcion na Santa Cruz 

ORANJESTAD – Parti importante di bishita den bario di Prome Minister semper ta inclui bishitanan na institutonan indispensabel y fundamental di e bario. Aki por conoce e preocupacion y necesidadnan di e institutonan, pero tambe di e bario en general. Diahuebs mainta, banda di bishita e bario en general, Prome Minister a bishita tambe scol basico St. Michael y Misa Cristo Rey.

Despues di un bishita hopi ameno y informativo na e scol basico, Prome Minister Mike Eman a pasa cerca Pastoor Jairo Maduro di Misa Cristo Rey pa asina combersa un poco cu e lider spiritual di e bario. Aki ambos a hiba un dialogo riba puntonan importante di e parokia, incluyendo e celebracion diadomingo awo di 60 aniversario. E mandatario a probecha e encuentro pa haci e anuncio oficial cu Parokia di Brasil ta bay haya un proyecto di embeyecemento di e infrastructura rond di Misa, mescos cu tabata e caso na Santa Cruz. Esaki ta inclui parkeerplaats bon marca, trottoir, iluminacion, matanan di sombra y te hasta bankinan pa sinta.

Premier Eman ta contento di wak con e parokia mes a logra di pone un bunita vloer paden di e misa y ta desea di iguala e esfuersonan aki di parti di Gobierno. Consciente di e interes cu Pastoor Maduro tin despues di a presencia e mehoracionnan na Iglesia Inmaculada Concepcion na Santa Cruz, Gabinete Mike Eman a pensa cu esaki lo ta e miho regalo cu por duna e parokia pa su 60 aña di existencia. “Un misa ehemplar y un pastoor Arubiano ehemplar cu ta haci un diferencia grandi pa e parokia aki, pero tambe henter Aruba,” asina Minister President Eman a expresa.

Pastoor Maduro di su banda, y den nomber di Parokia di Brasil a indica di ta hopi contento cu Premier Eman a tuma nota di preocupacionnan di e parokia, y cu esey ta algo di aprecia. E ta similar na loke Pastornan ta haci ora di bishita casnan den bario; esta di wak unda nos por yuda. “Danki pa e regalo, nos ta ricibi’e cu alegria. E ta algo pa tur hende por disfruta di dje,” Pastoor a bisa.

“Nos ta contento paso nos ta wak cu e comunidad ta haya un apoyo. Desaroyo semper ta bon; nos ta warda cu pasenshi y e ta yega. Ta importante pa nos tur wak cu nos ta bay padilanti,” tabata e palabranan di Maduro. E ta di opinion cu ta hopi importante cu minister ta bishita bario paso ya e ta tuma nota sin cu ningun hende ta cont’e y hende por yam’e danki pa e trabou cu e ta haciendo.

Pastoor di Brasil ta testigo di e beneficio cu Gabinete Mike Eman I y II a trece pa su parokia. “Nos ta mira grupo di deporte ta haci bon uzo di veld, esey ta pa tene muchanan leu di caya,” a comenta. Segun su persona, nos no por spera un generacion nobo bon si nos no ta ofrece nan nada. “Nos ta mira den ultimo tempo cu gobierno a desaroya diferente canchanan y esey ta haci nos contento,” e Pastoor a finalisa bisando.

Prome Minister Mike Eman ta spera cu pronto por anuncia e fecha di inicio di e trabounan na Misa Cristo Rey. Semper den proyectonan asina, mayoria coordinacion ta cay bou di responsabilidad di Departamento di Obranan Publico y Minister di Infrastructura, Benny Sevinger, cu kende mester coordina e trabounan. Gabinete Mike Eman ta desea parokia di Brasil y Misa Cristo Rey un feliz aniversario.

Expresionnan haci den e articulo aki no necesariamente ta refleha opinion di ArenaPoliti.co