Recientemente durante e conferencia di prensa semanal di Fraccion di MEP den Parlamento, sr. Guillfred Besaril a elabora riba su participacion na e conferencia titula di "The Grand Conference: Building a Resilient Digital Society" na Madre Patria Hulanda. Parlamentario Besaril a declara lo siguiente:

"Recientemente mi a atende e conferencia di “Building a Resilient Digital Society” na Rotterdam, Hulanda. Esaki tabata su tercer edicion den cual e organisadornan Minister di Husticia Hulandes, sr. Ivo Opstelten y Burgemeester di Rotterdam, sr. Ahmed Aboutaleb a dicidi di expande e participacion cu stakeholders di e Comunidad Internacional. E intencion primordial di e conferencia tabata di stimula un dialogo ehecutivo riba e peligronan di "Cyber Criminality". 

Ademas a trata e diferente motibonan dicon e asina yama "Hackers" por ta interesa na "Hack" den un compania su systema, e metodonan basico pa detecta e atakenan y mas importante e systemanan di back-up cu por wordo aplica pa "Restart" di e systema, despues di a sufri atakenan cybernetico door di “Hacker(s)”. 

Tambe a trata e expansion di e waf di Rotterdam como test-case y kiko un atake cybernetico lo por nifica tanto pa e operacion di un di e wafnan mas importante di Europa y e economia Hulandes. Sin duda alguno un test-case hopi interesante pa motibo cu normalmente lo bo pensa cu "Hackers" ta target solamente cuentanan bancario di e companianan, pues cu e motibo principal pa drenta un systema ta placa, pero abase di e test-case esnan presente por realisa cu esaki no necesariamente mester ta e caso. Tin otro elementonan cu pa e "Hackers" por tin e mesun balor cu placa, por ehempel e poder di tin informacion confidencial di un compania of di su clientanan, of na momento di no ta deacuerdo cu un compania, e poder di por blokea su operacianan, last but least e orguyo di demostra cu nan ta e mihor y cu simplemente nan por "Hack" den e systema di mas dificil.

Companianan grandi manera KPMG, CISO Belgacom y Google International, tabata presente pa duna testimonio di nan experiencia como companianan riba e materia y a duna ehempel di e peligro di "Cyber Criminality" pa nan operacionan. Importante tabata pa reconoce con delicado e ta wordo pa “Gehacked” pero e enfasis na final tabata e pregunta con "Resilient" (=poder di recuperacion) un compania of organisacion mester tin na bienestar di su clientenan of di esnan cu ta depende di su servicio.

Pami personalmente e tabata un tremendo experiencia, pa motibo cu a atende cu e tema for di angulo di prevencion y tolerabilidad. E test-case tabata mane un martiu cu a dal riba e clabo. Aruba tin años ta sondea e posibilidad pa cu mudamento di nos waf di Oranjestad pa por ehempel Barcadera. Banda di e hecho cu Aruba mester tene su mes na e "International Ship and Port Facility Security (ISPS) Code" e ta di mes importancia pa Aruba tambe ta “Cyber Resilient”. Aruba su waf y companianan importante pa nos economia manera Aeropuerto, mester por previni cualkier calamidad na nivel di computacion y internet, al igual cu nan mester ta cla pa "Restart" nan operacion lihe despues di ricibi dicho atake". Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co