Parlamentario Guillfred Besaril (MEP): "Ta propagandá cuido di naturalesa den exterior, mientras e realidad na Aruba ta otro!"
Durante rueda di prensa di Diaranson ultimo, Parlamentario di MEP, sr. Guilllfred Besaril, a elabora riba e tema di preservacion di nos medio ambiente. Sr. Besaril a declara lo siguiente:
"Algun luna atras tabatin un oil spill net pariba di WEB NV. Despues di a wordo aserca pa diferente piscador, nos fraccion a subi lama y a bai inventarisa personalmente e daño cu e oil spill a causa. Nos a constata cu e oil spill a afecta un cantidad significante di mangrove di e islanan chikito (conoci popularmente como "Cai") y e lama den sercania directo di WEB NV.
Mi ta corda bon cla cu nos opositornan politico a hari nos iniciativa y a duna masha poco atencion riba e tema di e destrucion causa na nos naturalesa. Pueblo por imagina nos reaccion na momento di a tuma nota di e comunicado di prensa di Minister Sievinger Dialuna ultimo. For di Paris e Minister a informa Pueblo di Aruba cu su disertacion tabata tin como puntonan di enfoke: Preservacion di nos medio ambiente, Lama, Mangrovenan y e Esfuerzo realisa pa gobierno di Aruba encuanto e tema. Ki hilaridad!
E declaracion aki desde Francia ta uno hipocrita, enbista di loke a sosode algun luna pasa durante e oil spill di WEB NV. di cual te dia di awe Pueblo no a ricibi ningun reaccion con grandi e daño tabata na nos naturalesa y den ki forma lo bai atende cu e daño aki. E di dos ehempel ta e destruccion di e mangrovenan den sercania di e brug di Spaans Lagoen pa por traha e "Green" corridor. Eynan un grupo di ambientalista a bai manifesta nan preocupacion, cu e resultado cu te hasta cori nan a wordo cori for di e sitio!
E mandatario por pretende di ta pro nos naturalesa y hasi hende kere hopi cos den exterior, pero nan accionan y loke nos comunidad ta constata ta demostra todo lo contrario. Realidad ta cu nos naturalesa a haya un sota ultimo tempo na man di gabinete di sr. Mike Eman. Un gobierno cu ta interesa den puro construccion di bloki, asfalt y klinkers, sin laga nada pro e preservacion di nos medio ambiente! E trsito realidad den 2015" e Parlamentario a termina.
Expresionnan haci den e articulo aki no necesariamente ta refleha opinion di ArenaPoliti.co