Mayoria districto na Aruba a ser neglisha y bandona pa AVP!  

Na cada ocasion cu politiconan di AVP haya oportunidad pa ataca MEP riba e periodo di gobernacion di 2001-2009, nan ta haci esaki cu tur furia demostrando asina cu despues di 6 aña ainda nan ta bibando cu odio y venganza contra partido MEP. Semper den nan discurso y comunicadonan nan ta bagatelisa e periodo cu MEP a goberna, caminda nan kier crea e impresion den pueblo cu net nada a ser haci den e periodo ey pa cu desaroyo di nos pais. Pero den nan ignorancia nan no ta splica pueblo kico CAFT mes a bisa di e porcentahe minusculo cu Gabinete Eman a inverti den nos economia.  CAFT a declara cu menos cu 1% di e gastonan total a ser usa door di Gabinete Eman pa inverti den e pais aki na 2014 (“De investeringen vanuit de overheidsbegroting zijn gedurende de hele periode laag gebleven en uitgekomen op minder dan 1% van de totale uitgaven in 2014”).

Unda e 2.5 biyon florin a keda?
Esaki ta prueba palpabel cu e gobierno aki a inverti solamente den embeyecimento di centro di ciudad, algun tram, asfalt, klinker, patch up aki aya y renobacion di watertoren y algun school. Sinembargo te ainda nan no por splica pueblo na kico nan a gasta e suma astronomico di 2.5 biyon florin cu nan a ricibi, esta e 970 miyon florin laga atras pa Gabinete Oduber  y e 1.6 biyon florin cu nan fia durante 5 aña. Hecho ta henter pueblo mes por mira cu pa loke ta edificionan NOBO – construi for di fundeshi te dak! - durante e ultimo 6 añanan esakinan tabata solamente un man yen y cu den e gran mayoria di districtonan na Aruba ningun edificio nobo a ser construi. Pues un negligencia total di partido AVP pa cu e districtonan di Santa Cruz, Pos Chikito, Savaneta y San Nicolas, cu ta bon solamente pa ranca voto pa AVP.

Midi AVP, Midi MEP
Contrario na esaki, durante Gabinete Oduber ta un sin fin di edificio nobo a ser construi pa ubica entre otro e polisnan, e empleadonan di por ehempel Belasting, DOW, ATA, SETAR, e alumnonan di school, e deportistanan, esnan cu tin necesidad di un cas social, e ancianonan, e personanan cu limitacion, e piscadonan, e usuarionan di bus etc. Pues tur sector den comunidad y  tur districto sin excepcion por a mira nan mes den tur e proyectonan cu a ser ehecuta durante gobernacion di MEP, esta di 2001-2009. Alavez mester menciona cu e gran mayoria di e proyectonan aki a ser construi pa paga durante un periodo relativamente cortico y te hasta varios di nan a ser paga cash.
Ta pesey partido MEP ta trece dos grafico adhunto caminda por mira e lista di edificionan nobo (PPP-Pa Pueblo Paga durante 30 aña) durante Gabinete Eman y e edificionan nobo construi durante Gabinete Oduber. Analisando esaki, finalmente puntra bo mes ta cuanto cas social, cuanto cas di anciano, cuanto cancha deportivo, cuanto warda di polis, cuanto school nobo a ser construi bao di Gabinete Eman durante e ultimo 6 añanan y saca bo mesun conclusion.

Expresionnan haci den e articulo aki no necesariamente ta refleha opinion di ArenaPoliti.co