Perspectiva Independiente without background 001

Parlamentario mr. Xiomara Maduro (MEP): Nos no ta aproba e maneho tras di e cifranan di e presupuesto di Parlamento pa 2016

XM27
Ora di trata un presupuesto ta momento pa para keto tambe na e maneho cu ta wordo hiba. Poco tempo pasa un politico a expresa cu Pueblo mester presta atencion na e maneho tras di e cifranan presenta den un presupuesto. Tirando un bista riba e maneho tras di e cifranan di e presupuesto Parlamento di Aruba, nos ta yega na e conclucion, cu nos no por aproba e maneho di Parlamento cu ta wordo hiba ora ta trata di silencia opocicion.

Maneho dirigi pa stroba y silencia opocicion
E ta bisto cu den Parlamento e maneho cu ta wordo hiba ta pa stroba opocicion di haci su trabou. Mayoria reunion publico cu opocicion ta pidi no ta wordo yama of ta wordo yama na momento cu ya e tema no ta biba mas den Pueblo. Ora di pidi punto di ordo of persoonlijk feit esaki tampoco ta wordo honra manera debe ser, specialmente si ta e damas di MEP ta esnan cu ta pidi esaki. Acuerdo di trabou tambe no ta wordo honra manera debe ser. Na momento cu opocicion reclama por escrito, esaki no tur ora ta wordo registra den e registro oficial di Parlamento. Reunion publico ta tuma lugar sin cu documentonan pidi pa opocicion ta riba mesa. Na mas di un ocacion ta den prensa opocicion ta haya sa di fechanan cu reunionnan den Parlamento lo tuma lugar. Cada ves ta limita e spreektijd cu parlamentario ta haya. Por ehempel, den e encuentro cu WEB y Utilities riba hedging, opocicion a pidi pa haya sikiera 5 minuut pa por haci pregunta riba e 57 pagina di e feitenonderzoek, pero ta solamente 3 minuut a wordo duna pa por cuestiona un asunto cu ta perhudica e cartera di full un Pueblo. Ultimo hasta ora di mira documento ter inzage, opocicion ta wordo intimida pa coordinador di minister cu ta para ‘cuida’ documento y tira bista tras di lomba di e parlamentario pa por controla kiko e parlamentario di opocicion ta mira of nota. Y ta bin aserca e manera con dia 27 di augustus 2015, Presidente di Parlamento a permiti pa bida di esnan di opocicion wordo poni den peliger lagando Ministernan yena Parlamento cu coordinadornan arma pa asina purba na intimida y silencia opocicion.

Nos ta rechasa dictadura parlamentario
Nos ta rechasa e dictadura parlamentario cu ta ser practica den Parlamento di Aruba y cune nos ta rechasa e maneho tras di e cifranan di e presupuesto 2016 di Parlamento. Nos ta biba te ainda den un democracia na unda cu opocicion tin su lugar y mester wordo trata cu e debido respet. No por hiba un maneho den cual ta purba na stroba y silencia opocicion. Pa e motibo aki tambe nos ta trece na conocemento di Pueblo e motibo pa cual nos a vota contra e presupuesto di Parlamento pa 2016. Nos no ta aproba e maneho tras di e cifranan di e presupuesto di Parlamento, ya cu e maneho aki ta dirigi na stroba opocicion di haci su trabou na beneficio di Pueblo y democracia na nos Pais.


13 december 2015


Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.