Ultimo simannan tabata di desaroyo y noticianan masha positivo y alentador pa Caya Grandi na

Oranjestad. Mas negoshi nobo ta habriendo nan porta, otronan ta renoba y amplia nan edificionan, mientras cu

tambe ta poniendo ultimo detayenan di infrastructura y embeyecemento. Nan ta e resultado di un vision y di

añanan di trabou intensivo y dedicacion; tambe di trabou conhunto cu tur e stakeholdernan, manera

comerciantenan y e propio pueblo di Aruba. Pero awe orguyosamente nos por bisa cu nos tin un di e cayanan

principal di mas bunita den henter Caribe, algo ta keda ratifica pa esnan cu en berdad conoce otro centronan di

ciudad y por compara.

Director di Operacion di Aruba Aloe, Dr. Koos Veel ta un di nan. “E ta un caya grandi cu nos por ta hopi orguyoso di

dje. E ta un shopping experience increibel. Nos ta kere cu pone tiendanan nobo y bunita den dje, lo yuda na un

exito rotundo.” Cual a resulta un realidad tambe. “Nos ta sigur cu e ta bay lora bon paso siman pasa nos a haci un

soft opening, dus nos tin un siman bendiendo caba, y e ta bayendo hopi bon. Nos ta sigur cu e ta bay ta un exito,”

E mas importante ta cu e trabou no ta stop aki, e ta continua pasobra tin mas bon noticia na caminda y mas trabou

y dedicacion cu Gabinete Mike Eman kier hinca den e revistalisacion di Caya Grandi y su economia.

For di punta pa punta, Caya Principal ta conociendo un renacemento resaltante. Cayanan ta yen di bida y movecion

pa e cantidad grandisimo di turista, bishitantenan di crucero, pero tambe local. Tram ta core ariba abou yen di

persona cu awo si ta yega na e parti mas pariba. E ultimo aki, ta na rand di conoce su miho temponan, cu e

reinstalacion di fonteinnan y apertura di centro comercial. Aki ta bin negoshinan nobo y excitante pa e mercado

manera Cono Pizza, Aki Sushi, entre otro.

Gobierno siman pasa a firma e acuerdo cu ta reglamenta uzo di terasanan den Caya grandi pa comercientenan,

esta camindanan asigna cu por pone mesa y stoel, creando terasnan cu ta bay resalta un ambiente vibrante den

caya principal. Ya caba por a mira ehempel di esaki, manera ta Gelatissimo riba Plaza Daniel Leo. Mescos ta bin e

Main Street Lounge, entre otro, riba Plaza Nicky Habibe.

Negoshinan nobo y di nivel halto ta buscando caminda pa Caya Grandi, ademas di tin un tienda caba den zonanan

turistico. Aruba Aloe a caba di habri su tienda y ta papia di frankicia di coffeeshop cu ta na caminda. Tiendanan di

moda di renombre ta manifesta nan permanencia den Caya Grandi cu inversion miyonario di expansion, manera ta

e caso di Mango.

E momento pa inversion ta awo y hopi empresario y comerciante ta riparando esey. Pa prome biaha den historia,

negoshinan ta bayendo for di e area di Palm Beach pa Caya Principal. E ta un stap logico mirando con bunita el a

keda. “E ta nos Caya Principal y ta nos responsabilidad pa yuda haci di nos caya principal, e miho destinacion

posibel den Caribe,” asina General Manager di Aruba Aloe Balm, Joshua Posner a conta cordando con algun

persona a descurashe bisando cu ningun hende ta cumpra den caya mas of pa e warda wak con cos ta bay prome.

Nan ta un negoshi cu a ripara cu esaki ta e punto caminda turistanan ta bay circula di awo padilanti.

Prome Minister Mike Eman a remarca cu su Gobierno por tin un vision y traha hopi duro riba dje, pero na cierto

punto, e lo ta para eynan wardando pa e hendenan capitalisa riba dje. E ta contento di wak cu awo si

empresarionan ta wak e oportunidad pa capitalisa. “Awendia no tin duda mas,” el a bisa. Otro ehempel di esey,

uno cu Prome Minister ta sperando ansiosamente pa cristalisa, ta e city hotel. Famia Harms ta desaroyando e

proyecto aki y ta den e fasenan final di financiamento. “E City Hotel ta bay ta un contribucion enorme na e

actividad y trafico den Caya Principal,” asina e mandatario a indica.

President di MAMBO, e organisacion di comerciantenan den Caya Principal, ta di acuerdo cune. E tambe ta spera

cu e grounbreaking di e proyecto di hotel lo tuma luga na mita di proximo aña. “E ta bay trece un revolucion

grandisimo pa caya y tambe hopi trafico cu ta esey ta loke nos ta busca,” asina Audrey Croes-Lacle a comenta. E ta

enfatisa cu comerciantenan di Caya Grandi ta aprecia masha hopi localnan ta bin, “pero pa tur e tiendanan por

existi di un manera digno y cu un entranda significante como dunado di trabou pa nos pueblo, esaki ta algo no

mester aprecia paso ta bay trece e volumen di persona den caya cu nos mester di dje.”

Na final y den conclusion ta keda e hecho cu nos por cuminsa aprecia, balor y disfruta di loke nos tin na Aruba awo,

un Caya Principal sumamente bunita. Manera empresario Posner a bisa: “Mi ta encurasha boso tur pa ta orguyoso

di loke nos tin aki. E ta un joya en berdad.”

Expresionnan haci den e articulo aki no necesariamente ta refleha opinion di ArenaPoliti.co