Perspectiva Independiente without background 001

Partido ABO: E poder di un parlamento y e falta di curashi y moralidad

Elton02
Algun luna atras, e ex-minister di Husticia Hulandes y su ‘staatssecretaris’ señor Teeven a entrega nan retiro ora a resulta cu e minister no a informa e parlamento Hulandes corecto. Interesante pa menciona, cu ta trata aki di un caso di aña 2000 unda señor Teeven a cera un acuerdo cu un criminal (Teeven-deal), y cu e minister no tabata tin nada di haci cu e caso. E gobierno Hulandes  a core bin despues cu un investigacion pa purba hinca e asunto aki den un ‘doofpot’. Akinan parlamento Hulandes a mustra su autonomia y integridad y el’a bin cu su propio investigacion: comision Oosting. Siman pasa, e comision Oosting a presenta su rapport y a resulta cu no solamente e acuerdo di señor Teeven tabata fout, pero cu politicamente e top di e partido VVD intencionalmente a mal informa parlamento pasobra aki ta trata di nan ministernan. Diasabra pasa e presidente di e parlamento Hulandes (VVD) a tuma e honor na su mes y el’a retira, pasobra e tambe a sconde y destrui informacion. Diaranson awor, e minister-president y e actual minister di Husticia Hulandes y su ‘staatssecretaris’ mester duna cuenta na e parlamento Hulandes, pasobra a resulta cu nan tambe tabata envolvi activamente den e asunto pa mal informa e parlamento. No por descarta cu algun di nan diaranson tambe lo wordo manda cas.

Aki nos ta wak con un democracia tin cu funciona. A pesar cu ta trata aki di e minister-president y e lider di e partido mas grandi di Hulanda (VVD), parlamento Hulandes no ta basila ora ta trata di mal informa parlamento. Si un parlamento cu tin cu controla gobierno no por confia cu e gobierno ta suministra tur e informacion cu e mester pa haci su trabou bon, anto tin un solucion pa coregi esaki: e minister (of gobierno) tin cu bay cas!

Na Aruba enbes cu e parlamento ta controla gobierno, ta e gobierno ta bisa parlamento kico pa haci. Aki gobernantenan ta nenga parlamento informacion, keda sin contesta preguntanan di parlamento y hasta ridiculisa miembronan di parlamento cu ta tribi cuestiona nan mal maneho.

E ultimo simannan, nos por a mira con un mayoria den parlamento a legalisa atrobe un malgastamento di miyones no presupuesta di e minister di Infrastructura y atrobe un ‘suppletoire begroting’ a wordo aproba cu ta confirma cu ningun di e presupuestonan tabata basa riba realidad.

Den e caso di ‘WEB-hedging’ di 300 miyon florin, e minister di Energia a bin cu un rapport pa hinca e asunto den ‘doofpot’ y por cierto el’a logra, pasobra tur hende menos e director di WEB a keda riba nan post.

Den e caso di e CAMINDA SCUR, e minister di Infrastructura a cuminsa di bisa parlamento cu e lo bay gasta 300 miyon florin basa riba un presupuesto ficticio, mientras cu e proyecto tabata costa 135 miyon florin. Na final, e proyecto lo bay costa 750 miyon florin. Den tur esaki, ningun dia e minister a presenta un estudio ambiental (MER-rapport), locual tabata e maneho di e actual presidente di parlamento tempo cu e tabata minister y mas di 10 km. di naturalesa a wordo destrui. Y si esaki no tabata suficiente, e mesun minister a bolbe hinca pueblo den apenas 3 luna den un otro debe di 815 miyon florin cu otro CAMINDA SCUR.

Na Hulanda, algun minister y e presidente di parlamento a bay cas caba. Despues di e debate den parlamento Hulandes di diaranson, kisas henter un gabinete por wordo manda cas pa un caso bieu y di 4 miyon florin. Aki na Aruba casonan dudoso di 300 miyon florin y 1.6 biyon florin cu ta rekeri di wordo investiga ta wordo pasa, tur hende ta keda sinta y parlamento ta keda na soño pasobra ta pueblo ta paga toch.

Dus e no ta nada straño cu e Hulandesnan (of otro nacionalidadnan) no ta tuma nos politiconan na serio si nan mes no ta tuma democracia y nan mesun pueblo na serio. E unico cos cu ta conta pa nos politiconan tradicional, ta nan interes personal!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.