ORANJESTAD – Esnan cu a mira e reunion publico diahuebs ultimo den Parlamento, por a observa un forma nobo di intimidacion di parti di e presidente di parlamento.  E custumber ta pa pone hopi coordinador sinta den tribune y laga nan insulta oposicion na nan gusto, sin cu e president ta stroba nan. Tambe ta conosi e forma sushi con cierto parlamentarionan di AVP ta wordo permiti pa insulta oposicion, sin cu e president ta hala nan atencion. Despues, manera a mira dia 27 di augustus, a yena parlamento cu maton, pa intimida oposicion.

“Y siman pasa por a nota con e presidente di parlamento a manda polis para mi tras, na un forma hopi intimidante, na momento cu mi mester a defende mi mes di atakenan hopi baho y ofensivo di minister Arthur Dowers. Polis no a wordo manda pa para tras di ningun otro hende, solamente mi tras ora mi tabata halsa mi vos contra e minister di husticia. Presidente di Parlamento Marisol Lopez-Tromp ya varios biaha a demostra di tin un odio contra nos fraccion, sin ningun base ni hustificacion. Pero pa e manda polis intimida mi y strobami di hasi mi trabou, ta dimas. Y e mester bai responsabilisa su mes pa e acto aki”, segun Wever-Croes.

Wever-Croes no sa ta dicon Lopez-Tromp a tuma e paso aki, pero si e sa cu polis no por hasi nada den parlamento si no ta bou instruccion di e presidente di parlamento. Pues den e caso aki, cada acto di cada polis ta EXCLUSIVAMENTE riba orden di Marisol Lopez-Tromp. E polis cu a wordo pon’i tras di Lider di oposicion cada bes cu el’a papia den oranan di anochi, tambe a wordo instrui pa Marisol Lopez-Tromp. Tabata visto cu Lopez-Tromp tabata tin un plan, y pesey desde trempan a pone 3 agente policial pa vigila e parlamentarionan di MEP. Na momento di saca sra. Ruiz-Maduro for di sala, dos otro agente a drenta sala, mientras e agente aki su bista mester a keda riba Wever-Croes. Algo totalmente for di sla, y incomprendibel. Hopi ta puntra nan mes si ta un estado policial nos a bira awor, cu comandante Lopez-Tromp na cabes. Un acto cu tanto simpatisante como oponente di partido MEP a condena!

“Si Marisol Lopez-Tromp ta kere cu door di manda polis intimidami, e lo silencia mi, e ta equiboca. Ami ta den Parlamento pa representa pueblo di Aruba, y si mi mester halsa mi vos pa hasi esey, mi lo hasi’e ni cu Marisol Lopez-Tromp pone full un ehercito rond di mi!” lider di MEP Evelyn Wever-Croes a expresa.

Expresionnan haci den e articulo aki no necesariamente ta refleha opinion di ArenaPoliti.co