Prome Minister Eman ta bishita seis tienda y establecimento nobo den Caya Principal 

ORANJESTAD – Caya Principal ta conociendo un di su miho momentonan den e fin di aña aki. Un total di seis establecimento comercial nobo a habri den e ultimo par di siman y tin mas na caminda. Gabinete Mike Eman pa medio di e iniciativa OBID ta combinando esfuerzo cu establecimentonan den centro di ciudad pa bin cu e incentivonan cu ta percura pa un tremendo clausura di 2015. Diabierna ultimo Prome Minister Mike Eman a bishita e negoshinan nobo pa personalmente combersa cu inversionista y e personal. E contacto aki ta importante den e formulacion di e plannan di mercadeo, mantencion y siguridad den Caya G.F. Betico Croes.

E prome luga cu a bishita tabata net den cura den Edificio di Gobierno, café ‘Tan Dé’ caminda e mandatario a combersa cu empresario hoben Tai Foo Lee. Asina a haya splicacion di e concepto, luga, pero tambe a papia riba ideanan pa bay implementa ainda. Premier Eman, compaña pa su señora Doina, a gusta hopi e ambiente apart di e café aki.

Siguiendo riba Plaza Daniel Leo, a drenta den e local ubica riba skina di Emmastraat, Schelpstraat y Caya G.F. Betico Croes. Aki a topa cu propietario Francis Gil y su personal poniendo e ultimo detayenan prome cu e apertura di diasabra ultimo. Puma ta e tienda mas nobo di e famia cu un trayectoria largo y exitoso den comercio na Aruba. E ta bay ofrece paña y sapato deportivo di e prestigioso marca internacional.

Pa Prome Minister Mike Eman, e dos prome ehempelnan aki ta muestra cla cu e vision di Gabinete Mike Eman for di 2009 ta dunando resultado. “Nos ta contento cu esfuerzonan haci den infrastructura ta trahando poco poco; no mes liher cu ta nos deseo, pero inversionistanan ta capitalisando riba e oportunidadnan cu nos a crea.”

Otro satisfaccion grandi pa e mandatario tabata  bishita na e tienda Polo Royal County of Berkshire y combersa cu Fadi Darwish, kende ta forma parti di e grupo di comerciantenan cu kende e mandatario a topa algun luna pasa na Panama. Nan a keda combenci danki na Prome Minister Mike Eman, cu Aruba ta e luga pa bin habri tienda di nan marcanan.

E tienda di Polo den Caya Principal tin algun dia habri y dunando bon resultado. A compronde cu diabierna ultimo, e mesun inversionistanan aki di Panama, a habri un tienda di Versace den Paseo Herencia. Adicionalmente, Darwish a duna di conoce cu ta buscando un di dos locacion den Caya Grandi pa den algun luna habri un di tres tienda.

E siguiente tienda cu a haya bishita di Eman ta Bath & Body Works cu ta pertenece na e consorcio di Penha cu sigur ta un di e companianan cu ta kere den e proyecto di revitalisacion di Caya Grandi. Ademas di renoba e tienda principal, tambe ta expandiendo su portfolio di marcanan manera Kiehl’s y Victoria’s Secret y tin entendi cu tin un mas pa habri proximamente.

Camila ta un tienda cu tambe ta di inversionistanan stranhero cu ta reconoce e atractivonan geografico y economico actual di nos isla y pesey ta bin establece nan mes. Ademas di e tienda den curason di Caya Grandi, propietarionan tin pensa di habri un mas den Royal Plaza y otro den sector turistico di Palm Beach.

Pa loke ta iStore y Bon Habon, ta companianan di propietario y/of gerencia local cu no kier keda afo di e boom comercial cu centro di ciudad ta conociendo. Famia Croes ta habri nan di dos tienda di productonan Mac pa busca asina e mercado di walk ins local y turista cu Caya Principal tin pa ofrece. Bon Habon di su parti ta otro iniciativa di Aruba Aloe cu ta bin cu un concepto masha atractivo pa bende nan producto. E coleccion di habon, salo y otro cosmetica pa baña ta traha den un fabrica chikito den Caya G.F. Betico Croes mes cu tur bishitante por pasa wak e proceso. Nan ta traha cu ingredientenan natural y organico y ta di hopi bon calidad.

Durante e recorido di diabierna ultimo, Prome Minister Mike ta masha contento di loke el a mira. Seis establecimento nobo den combinacion di inversion local y stranhero cu ta un formula y paisahe hopi saludabel pa comercio di nos pais. Hunto cu Premier Eman tabata presente tambe, Stanley de Marchena y Ricky Harms, e personanan di contacto entre comerciantenan di Caya Grandi y Ministerio di Asuntonan General. Na final, e mandatario a expresa cu loke e ta haya hopi positivo ta cu e esfuerzonan cu su Gabinete a busca y traha riba dje, ta dunando nan fruto. “E ta duna un sentido hopi grandi di empuhe pa nos sigui traha na bienestar di Aruba,” Premier Eman a bisa.

Expresionnan haci den e articulo aki no necesariamente ta refleha opinion di ArenaPoliti.co