Durante tratamento di Presupuesto Supletorio 2015 di Pais Aruba a sali na cla cu Gabinete Eman den 2015 y 2016 ta bay bende un total di 8 edificio di Gobierno pa yega na placa. E ta bisto cu e ministernan di Gabinete Eman tin un adiccion grandi na placa ya cu den 2015 no a corta gasto manera a ser priminti pero alcontrario a gasta mas cu nan mes a presupuesta. Y pa yega na placa extra den 2015 y 2016 ta bay na e extremo di bende propiedad publico.

Ta bende 5 edificio den 2015 y 3 den 2016
Pa sera e deficit di 2015, Gabinete Eman lo bende e edificionan di Ministerio Publico, Hulpbestuurskantoor na Noord, Warda di Polis na Playa, Uncle Louis Store y ex Domeinbeheer pa e suma di 11 miyon florin. Riba pregunta di Fraccion di MEP kendenan lo cumpra e edificionan aki, Gabinete Eman no kier a duna contesta. Banda di esaki den 2016, Gabinete Eman lo bay bende e edificio di Douane, Hulpbestuurskantoor na Savaneta y Hulpbestuurskantoor na Santa Cruz. E ministernan no kier a duna mas detaye di cuanto placa e benta di edificio publico den 2016 mester trece den caha di gobierno.

Mike de makelaar
E racha di benta di edificio publico aki ta pone nos corda riba locual e defunto poilitico di Corsow sr Helmin Wiels a yega di adverti nos Pueblo cune. Sr Wiels qepd a yama Minister Eman pa ‘Mike de Makelaar’ splicando nos cu cada ves cu Mike bay Hulanda e ta bende Aruba. Wel Minister Eman no solamente a cuminsa entrega nos Status Aparte na pida pida bek na Hulanda, pero awor ta cuminsa bende patrimonio publico tambe lagando Aruba sin nada aki poco dia. Y tur esaki djies pa yega na placa pa por sigi malgasta den un farce berde.

Triki enves di solucion sostenibel
E triki di bende edificio pa yega na placa no ta un maneho financiero sabi y tampoco uno sostenibel. Pasobra si tuma por ehempel e edificio di Ministerio Publico, ta bende e edificio pero di otro banda mester bay huur un otro edificio pa por hinca e personal di Ministerio Publico aden. Cu e benta di edificio ta un biaha bo ta haya un suma di placa, siendo cu Gobierno mester bay sera un contract pa huur un otro edificio pa añas largo pa por acomoda Ministerio Publico aden. Remarcabel ta cu hustamente e ministernan di AVP cu tanto a critica e Gobierno anterior pa asunto di huur, awe ta bira haci e triki aki. Esaki ta muestra cu for di principio esnan di AVP no tabata sincero cu e Pueblo aki y cu pa oportunismo politico a critica cosnan di e gobernacion anterior siendo cu awor nan ta bira y haci pio.

21 december 2015

Expresionnan haci den e articulo aki no necesariamente ta refleha opinion di ArenaPoliti.co