Diaranson anochi a tuma luga e prome anochi di compras titula ‘Fiesta den Caya’. E incentivo nobo aki a ranca sali cu un exito masha grandi. Un cantidad grandi di publico a probecha y a haci hopi compras, mientras cu tambe a disfruta di e presentacionnan di musica y baile. Gabinete Mike Eman ta sumamente satisfecho di por a mira y comparti e momentonan aki. Sin duda algun, un logro di e trabou en conhunto di varios Ministerio. Aki ta papia di e vision di Minister President Mike Eman pa renobacion di centro di ciudad, e ehecucion di e proyecto magno aki infrastructura den man di Minister Benny Sevinger, y finalmente e makinaria di promocion di Minister di Turismo y Cultura, Otmar Oduber.

Prome Minister Mike Eman a cana tambe den caya y a biba e experiencia dushi. Den su recorido el a topa y a keda acerca pa un cantidad grandi di ciudadano cu kier a expresa nan admiracion y gradicimento pa loke Gobierno a a haci cu Caya G.F. Betico Croes. Algun di e comentarionan tabata referi con caya principal tabata bandona y sin ningun atencion, mientras cu awo e ta un joya caminda tur cos ta nechi, limpi y yen di bida. Hendenan no tabatin smaak pa bin cumpra mas den caya y tabata sinti insigur; negoshinan a cuminsa cera un tras di otro. Awendia ta un placer pa haci compras, subi tram y bay di un luga pa otro. Tambe tur e iluminacion y tiendanan nobo ta crea un ambiente masha agradabel.

“E hecho cu a introduci e programa di shopping night cu ambiente positivo sigur lo contribui na e renobacion y renacemento di Caya Grandi,” asina Premier Mike Eman a expresa diaranson anochi. El a cuminda no solamente e cumpradonan, pero tambe pasa bishita hopi di e comerciantenan cu tambe ta hopi contento con Caya Grandi a bira y hunto cune, nan benta a subi. Tiendanan di prestigio ta bek den caya manera Aldo, Aruba Aloe, Birkenstock y e renobacion y ampliacion di Mango ta e miho muestra di esaki. Casi no tin mas luga bashi den caya principal.

Prome Minister Mike Eman a felicita su colega Sevinger, kende como Minister di Infrastructura, a traha duro pa awe caya grandi ta manera Gabinete Mike Eman a idea esaki den nan vision como parti di renobacion di centro di ciudad. Tambe a elogia Minister di Turismo, Otmar Oduber, kende mescos cu ta haci un biaha pa siman na San Nicolas cu Carubbian, awo ta introduci Fiesta den Caya hunto cu Aruba Tourism Authority.

Nos prome mandatario a sigura cu e trabou no a caba. Ta tuma un pausa pa un y tur por disfruta di e dianan di fiesta haciendo nan compra sin ningun molester, pero asina aña bolter, e trabounan ta continua pa renobacion di centro di ciudad. Ta bin mas caya drecha, incluyendo Wilhelminastraat cu tambe ta na su luga pa conoce un renacemento, mescos cu mas facilidad, cafe y terrasnan den Caya Grandi.

Expresionnan haci den e articulo aki no necesariamente ta refleha opinion di ArenaPoliti.co