E situacion actual na Aruba ta uno hopi preocupante. Tin hopi desaroyo tumando lugar cu ta afectando nos pueblo y tur hende ta sintiendo e efectonan di e gobierno aki di un manera of otro. Nos economia ta stagna, no tin placa den circulacion, no tin un perspectiva y ta hopi tienda caba a sera nan portanan na Aruba. Comercio ta pasando den momento hopi dificil y gobierno no ta yuda tampoco den esaki, Al contrario cada vez gobierno ta busca con pa saca mas y mas placa for di comercio manera recientemente a tuma lugar cu e aumento di e premieloongrens pa Svb. Otro preocupacion cu tin den comunidad ta e cantidad di atraconan y crimenan cu ta tumando lugar tur dia. E situacion ta out of control y minister di husticia Arthur Dowers y gobierno ta esnan culpabel y responsabel pa e chaos aki. No tin control na forntera, no tin radar ta traha, no tin helicopter ta bula, no tin guarda nos costa ta funciona manera mester ta. Tur esakinan a contribui cu awe e situacion na Aruba a bai for di man. Den apenas 1 siman di tempo tawata tin un assesinato den Rancho, tawata tin atraco arma cu UZI na Opal na Noord, tawata tin atraco y tiro a cai na Pos Chiquito den Scobillostraat y a termina cu un hoben deportista hopi keri akin a Aruba a wordo tira. Danki Dios e deportita Fiderd Vis a scapa pero esaki por tawatat tin consequencianan fatal pe. E inseguridad cu e pueblo ta biba aden actaulmente ta grave. Hendenan tin miedo di sali for di cas, miedo di bai supermercado anochi, miedo pa bai lanta placa anochi . Aruba no ta e Aruba di antes mas. Tur hende, den cua skina bo bira ta sinti nan mes insigur. No por ta asina cu nos cu ta biba aki nan mester sinti nos mes asina aki.

E cantidad di arma den circulacion ta hopi preocupante. Un cantidad di iliegal ta drentando nos pais via lama. Venezuela tin hopi problema na e momentonan aki y nos mester puntra nos mes si Aruba ta prepara pa si cos sali for di man na Venezuela?? Cuanto un pais chikito manera Aruba por carga? Nos pais caba tin un sin fin di problema nan social cu no tin solucion pa nan.  Pa hopi tempo Otmar Oduber a broma cu turistanan Venezolano pero awo e realidad ta alcansa e mentira di nos minister di turismo cu mayoria di nan no ta turista y nos mester puntra nos mes cuanto di e turistanan aki a keda atras, cuanto plaka ta wordo saka di Aruba y ki ta e plan pa cu e problema aki? Ta Facil keda tira culpa riba minister Husticia pero E mes ta forma parti di e gobierno aki. E tambe ta culpabel y responsabel pa e problemanan aki.

Nos ta nota cu NO tin maneho di insfrastructura. Benny Sevinger no ta respeta regla, no ta respeta ley, no ta respeta sentencia di huez y asina tin un free for all cu patrimonio di pueblo. Un sin fin di tereno ta wordo duna na amigonan pa esakinan bende e terenonan aki y otronan ta wordo desaroya den condominium den area berde. Tur naturaleza cu por existi ta wordo elimina. Ni beach e gobierno aki ta respeta mas. Nos pais ta den un deterorio, un decandencia nunca antes bisto. Por imagina cu un departamento manera deparatamento pa asuntonan social tin 1 luna caba sin airco y trahadornan ta trahando mitad dia y e minister di asuntonan social ta morto na sonjo sin haci nada. Asina nos pais a sali for di man. E negligencia, e actitud di I DON’T CARE, e actitud di SO BE IT tin nos pais na werki. Tur esakinan a pone cu pueblo ta harta y fada y ta solamente e grupito priviligia ta sinta bati man. Esnan cu ta cremencha pa sobrebibi ta pasando den momentonan hopi dificil mientras gobierno mes ta derocha.

Nos Arubianonan mester lanta ariba y demostra cu nan ta stima e pais aki. E pais ta bayendo di malo a peor y envez cu gobierno ta sinta atende cu tur e problemanan cu tin nan ta sigui fiesta, viaha y derocha placa di pueblo.

Nos compromise cu pueblo ta pa jump start e economia, pone ordo bek riba e pais aki, para tur e corrupcionan cu ta tumando lugar y trece progreso pa un y tur riba e pais aki.

Expresionnan haci den e articulo aki no necesariamente ta refleha opinion di ArenaPoliti.co