Perspectiva Independiente without background 001

Minister Otmar Oduber: Ta tarea conhuntamente di tur hende di carga responsabilidad pa siguridad den comunidad

Otmar30
E tarea pa mantene siguridad riba Aruba ta di nos tur, e no ta di sector publico solamente y tampoco di e minister solamente pa por mira cua ta e miho forma pa por duna un man den e proceso aki. “Mi ta kere cu na momento cu minister di Hustifica ta pidi pa e fondonan adicional aki, ta pasobra tin un urgencia p’e. Ta duna oido na esaki tambe.

“Tin un ley cu a pasa cu mi mesun ministerio tabata envolvi den dje pa loke ta trata e autonan di huur akinan na Aruba cu a wordo aproba. E ley ta indica cu tur “car rentals” na Aruba, mester paga 1 dollar riba cada dia di huur autonan. Mi a compronde cu e suma aki ainda no ta wordo cobra na e “car rentals”, ta papia di 2 pa 3 miyon cu por wordo cobra. E proposicion a bay na Conseho di Minister tambe pa por destina e fondonan nobo aki, na e fondo di siguridad di Aruba. Haciendo esaki tambe ta kere cu ta yega hopi cerca di e limitacionnan cu tin na e momentonan aki den e Ministerio di Husticia, pa loke ta trata e fondonan cu ta necesario pa combati criminalidad.” Di e forma aki fondo di turismo por contribui mas ainda, pa yuda cu e problemanan cu nos ta sinti cu tin di siguridad riba nos isla.

Situacion cartanan di garantia y extencion Permiso
Pa loke ta extencionnan di permisonan di turista como tambe e garantianan cu ta wordo pidi pa hendenan di exterior, mi ta haye un tiki fastioso y lamentabel cu cada bes ta referi como si fuera ta e turista ta esun cu ta haci e peticion aki.

Persona local/legal ta pidi garantia, no turista
Segun Minister Oduber: “Mi a bisa na diferente ocasion cu den caso di garantia, no ta e turista ta haci e peticion y no ta e turista ta esun cu ta firma e garantia aki. Cada biaha ta referi como si fuera cu pa motibo di turistanan cu ta keda atras lo por tin criminalidad etc. Na prome luga, un hende cu ta pidi un garantia ta un persona cu ta biba na Aruba, un persona local of cu en todo caso ta legal na Aruba. E ta esun cu ta haci e peticion ey na un departamento di gobierno cu ta cay bou di e Ministerio di Husticia. Pues ora ta otorga esaki, no ta e turista a firma p’e haya un carta di garantia”.

Mi ta contento cu awor ta wordo bisa cu lo ta mas streng riba e aspecto aki, pero no ta na su luga pa cada bes referi como si fuera ta e turista ta culpabel cu un hende ta para garantia p’e, of ta culpabel pasobra un carta di extencion ta wordo brinda na un persona cu a drenta y a keda mas cu e tempo cu el a bin como turista. Esaki ta responsabilidad di e departamentonan cu ta firma esaki, den e caso aki tin Dimas cu ta esun cu ta firma pa extencion di hendenan cu ta bin y cu kier keda mas cu e tempo cu nan a haya for di inmigracion pa keda na Aruba. Hendenan cu ta haya un carta di garantia tambe ta cay bou di Directie Wetgeving en Juridische Zaken (DWJZ) cu ta esun cu ta duna e carta di garantia pa hendenan por keda aki na Aruba, Minister Oduber a indica.

Responsabilidad grandi
Carta di garantia no ta e problema, mi ta kere hende cu ta parti e cartanan di garantia mester realisa cu e ta responsabel pa tur loke e persona cu e ta para garantia p’e lo por ocasiona riba nos isla. Esey ta: si el a ‘over stay’ cu mester paga pasashi p’e, e por ta un accident cu e persona ta envolvi den dje cu salubridad mester cubri of cualkier otro consecuencia financiero. Mi ta kere e maneho ey ta un maneho na su luga pa e ta mas restringente y mester ta streng riba ken por brinda un garantia pa un persona ta na Aruba. Pa loke ta trata extencion, esey si tin influencia directo riba bo turismo pasobra bo sa cu tin hende cu a cumpra propiedad na Aruba, condominum of time share, unda cu mester ta hopi cauteloso cu e forma cu bo ta atende. Semper a combersa esaki den bon espirito cu e minister encarga cu integracion y Dimas. Semper tabatin bon entendimento pa loke ta trata extencion cu e personanan cu tin propiedad na Aruba of cu ta bin cu un vacacion mas largo, mester por ricibi.

Mercado Venezolano nr. 2 mas importante pa Aruba
Mester keda corda cu ora ta generalisa tanto e mercado Venezolano y Colombiano, nan ta keda mercadonan importante pa Pais Aruba. Mercado Venezolano ta keda e di dos mercado principal, nos ta keda ricibi entre 140 mil y 160 mil pasahero for di Venezuela cu no ta e pasahero cu tabata bin pa ‘raspa carchi’ of haci cosnan robes. Pa mas di 30 aña a haci bon uzo di e participacion di e mercado Venezolano na Aruba. Mi ta kere cu por continua cu un bon control y cu bon colaboracion entre tur e diferente ministerionan.

‘Den tur maneho, mi ta di acuerdo cu mester ta mas rigido y mester tin mas control definitivamente pa no bay haya un cantidad di personanan (di cua nacionalidad cu e ta), keda atras den nos comunidad. Pero nos mester keda corda semper cu e medaya tin dos banda y un di e bandanan ta loke ta sostene e economia di e Pais Aruba’.

Minister Oduber ta bisa cu ta kere cu mester cuminsa na nos fronteranan y percura cu e ta bon sigura. Mester bon control pa ora hende drenta sa ken ta drenta y mester tin un mecanisco na luga pa ora un hende a ‘over stay’ na Aruba cu bo sa unda e ta kedando. Tambe con ta yega na nan y mustra nan riba e hecho cu si bo no tin un extencion oficial di bo permanencia na Aruba of si bo no tin un carta di garantia pa bo por ta na Aruba e ora bo no por ta riba nos isla mas. Mi ta kere cu eynan e ta un tarea di nos tur en conhunto e diferente ministerionan, Dimas, Inmigracion, Warda nos Costa, Radex, Turismo, unda cu tur hende mester por pone nanishi den mesun direccion.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.