Perspectiva Independiente without background 001

Rudy Richardson (MEP): Minister Dowers a bira victima structural di AVP, mescos cu e districto di San Nicolas

RudyRichardson02
Den pura e Minister di Turismo ta hunga rol di Prome Minister y ta duna e Ministerio di Husticia 5 Miyon florin pa frena e ola di criminalidad y atraconan hamas bisto na nos pais. Segun Minister Angel (0 voto) Bermudez Aruba no ta bancarota, anto dicon no tin placa den e presupuesto nacional di pais Aruba? Mester busca placa di ATA Sui generis pa combati un prioridad di nos pueblo. Despues cu Sr. Mike Eman a neglisha husticia por completo, IASA, Guarda nos costa, Helicopter, Radar y Visibility team, tur a wordo elimina na 2009 ora cu partido AVP a gana eleccion. Institutonan manera KPA, KIA y varios otro departamento preventivo no a haya e placa pa soluciona e problemanan social den nos comunidad. Tur e departamentonan a basha abao riba e maneho Anti-Pueblo di GE I y II. A abusa di nos recursonan y no a respeta reglanan di bon gobernacion.

No tin ningun control
Awo den pura Sr. Eman ta pone un stop na carta di garantia pa stranhero despues cu tawata tin un fiesta sin fin den e departamento di Dimas y eliminacion di Swiss Model. Nos waf tambe tin su retonan unda cu Douane ta wordo hala un banda y interes personal di cierto comerciante ta dicidi na nos costa. Nos tur sa cu ilegalnan ta drenta nos pais via santana di cacho y via otro areanan cu barco. Bao gobierno di MEP tawata tin control estricto riba nos costanan via Kustwacht y otro instancianan. Ex-Minister Rudy Croes a percura pa un bon maneho, pero lamentablemente esaki a wordo destrui pa GE I y II. Con un hende trahador por bin 90 dia di vakantie? Esaki tawata e maneho descabeya di Mike Eman y su gobierno, perhudicando nos pueblo y trece un competencia inhusto riba mercado laboral.

Desaster den siguridad
Mescos cu e districto di San Nicolas, Minister Arthur Dowers a bira un victima structural di AVP. Su Ministerio no ta haya e atencion debido den e gobierno di Mike Eman, mescos cu San Nicolas no a haya nada innovativo den dos periodo di gobernacion di AVP. Awo ta haci cos den pura pa por campaña na 2017. Su Ministerio mester minimo 10 miyon florin extra pa funciona optimal, pues cu e 5 miyon e ta leu fo’i cas. Un muestra cu e prioridadnan di GE I y II tawata incorecto. Sr. Mike Eman su gobierno y su 13 Parlamentarionan cu a sostene esaki ta responsabel pa e desaster actual den e siguridad di nos pueblo. Hasta abogadonan ta di welga pa e falta di seriedad cu gobierno ta atende cu nan. Nan a vocifera nan preocupacion den e servicio di piket ya cu nan kier un aumento pa e trabao cu nan ta haci den nos sistema hudicial. GE I y II a haya na entrada 2.7 Biyon florin extra pero no a usa esaki pa trece e maximo siguridad y progreso pa nos digno pueblo.

Garantia pa ‘turista’
Alabes tin un desorden total den garantia pa "turista". Esaki a sali na cla despues cu un persona a fayece y esun cu a para garantia a bula afo. Colega di partido y parlamentario di MEP mr. Ady Thijsen a vocifera esaki na varios ocasion cu e maneho di Gobierno ta trece nos salud publico den peliger, anto esaki a resulta un echo tambe. Unda a hiba un maneho cu ta pone nos hendenan na peliger, pasobra e control debido no ta existi ora cu hendenan ta yega nos fronteranan sin wordo investiga y mira si tur cos ta na ordo. Minister Benny (90.000m2) Sevinger ta yama pa laga esnan liga na su partido pasa numa cu tur e consecuencianan cu esaki ta trece cun’e. Tin documenta 5000 persona cu a keda den nos pais sea como turista of cu un permiso. Un desorden total den gobernacion cu lo tin consecuencianan negativo den tur sentido. Nos pais ta pasando den momentonan hopi dificil riba tereno di economia, finansa publico, social y tambe nunca a percura pa un maneho di integracion e ultimo 7 añanan. Nos tin un Gobierno bobo manera burico.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.