Ademas di loke CITGO ta lease pa operacion, tambe tin un parke solar. 

ORANJESTAD – Cumpliendo cu norma di transparencia den gobernacion Minister Sevinger, den su calidad di titular di Infrastructura, a contesta e diferente pregunta cu Parlamentarionan a haci na dje. E sesion di tratamento di leynan pa reapertura di refineria a inicia dialuna y a continua diamars. Un pregunta relata na terenonan cu Pais Aruba ta bay recobra awo cu e ta bira doño di e refineria, a keda haci pa parlamentario Lopez-Tromp.

“Tur tereno ta bay over pa Refineria di Aruba (RDA) NV,” Minister Sevinger a bisa. Esaki ta e compania estatal cu ta bira doño formal di e compleho industrial na San Nicolas. Fundacion di RDA NV tambe ta un di e leynan cu ta tratando den Parlamento hunto cu esun pa habri refineria. E mandatario a enfatisa cu un bes cu e transferencia wordo haci, ta bay determina cua di e terenonan ta bay over pa uzo di CITGO, cu CITGO ta bay lease como operador di e refineria y cua ta bay over na Pais Aruba.

Tambe e titular di Infrastructura a indica cu e siguiente stap ta bay ta pa determina si ta bay tin mester di infrastructura of no pa cada parti di e terenonan. Riba un parti di e terenonan ta bay tin tambe un compleho di ‘Solar Panels’ cu ainda tin di bay planea den detaye, pero cua ta destinacion delaster un tereno ta bay haya, no a wordo determina ainda.

Expresionnan haci den e articulo aki no necesariamente ta refleha opinion di ArenaPoliti.co