Karel Maduro (MEP): For di Hulanda, Mike Eman orguyosamente ta declara: “Vini, Vidi y Perdi”
Pueblo di Aruba, tin biaha bo mester laga hende dal su cabes den muraya pa e lanta for di soño. Den caso di e PM di Aruba, su persona supuestamente a bay Hulanda manera un gay di pelea pa regla asunto tocante e nombracion di Gobernador A. Boekhoudt. Prensa na Aruba a elogia e PM mustrando den direccion di ta un macho crioyo cu ta bay pa kibra cos. Luga, tur e asunto a cambia por completo na Hulanda. Despues di e supuesto pelea entre e PM di Aruba y minister Plasterk, tur cos ta indica cu e PM di Aruba a sali e gran perdedor. Di gay a bira galiña y na lugar di tira spoor, t’e a haya spoor. Minister Plasterk a dicta na mesa kico e reglanan ta pa nombracion di un gobernador y pakico Hulanda su escogencia a cay pa sr. Boekhoudt. Aparentemente esnan cu gobierno di Aruba a propone, niun no a pasa e stinky test na Hulanda. Muy en particular e pret’i wowo di e PM, sr. Angel Bermudez cu su historia di Interbank y FCCA. Tambe cu Hulanda lo NO acepta ningun menasa y accion di rebeldia di parti PM. Pues, esaki of nada. Su persona a acepta e nombracion di biaha y sin ningun obhecion! Esaki ta indica tambe cu e NO tabata tin ningun escogencia. E resultado di e reunion aki a wordo categorisa pa Hulanda como uno di hala horea y di suta cu palo! Gobernantenan Hulandes a comenta cu nan a haci “bal gehakt” di e PM y cu e ta un “zielig mannetje” (ay ta pica!). Awor, laga nos ban analisa algun punto pa asina Aruba por desenmascara e PM su version, di kico el a bay haci na Hulanda. Pasobra na Aruba, ta e ta e homber cu ta bay para cos na Hulanda. Uno, dicon su perona no a haci un yamada telefonico na sr. Plasterk y regla asunto? Esaki tabata por y mas barata. E asunto ta parce mas cu ta Plasterk a manda yam’e. Pasobra manera pueblo di Aruba por comprende, e asunto di nombracion NO a cambia!
Dos, dicon ta net minister Sevinger mester a compaña sr. PM y no su so, of cu un otro minister? Esaki ta indica kisas riba e echo cu minister Plasterk kier a papia seriamente cu sr. Sevinger dilanti di sr. Eman na mesa. Entre otro tocante e carta cu Plasterk a ricibi for di Karel Maduro tocante e malversacionnan cu terenonan publico na Aruba? Tocante e mal maneho na DIMAS? Tocante paspoortnan emiti na Aruba ilegalmente? Tres, e asunto principal ta cu tur indicacion ta, cu Hulanda no ta kere y ni ta confía sr. Eman mas. It’s over, over and done, you’re dead meat! Esta un berguensa nacional pa nos pais. Mihor ora di bin bek Aruba, sr. Eman pone un saco di papel riba su cabes asina mundo no por wak e bonconco cu el a haya door di a dal den muraya di klinker Hulandes.
Expresionnan haci den e articulo aki no necesariamente ta refleha opinion di ArenaPoliti.co