Aruba un biaha mas su nomber ta ser poni na berguensa den Reino danki na comportacion infantil di nos Minister President sr. Mike Eman. Nos por corda ainda cu na momento cu gobernador a keda sin firma e presupuesto su persona a bay den un welga di hamber y unda su persona a declara cu nan a verkracht e y tambe unda el a declara cu CFT over su dead body, pero na final di dia ta su mesun persona a firma pa esaki. Danki na su comportacion infantil aki, hasta nan a compar’e y burla di dje como un tienermeisje.

Humiyacion
Ata awo un biaha mas pa su mesun culpa , cara di nos cu ta biba riba e isla aki un biaha mas ta na berguensa den Reino. Ni un nomber e no por a duna Hulanda pa e puesto di gobernador y no a keda Hulanda nada otro di nombra sr. Alfonso Boekhoudt como nos gobernador entrante 1 di januari 2017. Un biaha mas sr. Mike Eman ta haci su mes ridiculo di manda carta, unda kier cuestiona un autoridad di Hulanda y unda cu e mes a neglisha pa bin cu un candidato cu ta conta cu sosten di pueblo. Pa su sapatiamento sr. Mike Eman a ser yama pa bay Hulanda , na unda sr. Plasterk a pone tur cos na ordo y unda cu den diferente articulo a sali cu sr. Mike Eman mester “inslikken” e decision di Hulanda. Pues cu e kier of no e tin di acepta e decision aki y unda cu sr. Eman na un manera manso ta duna sr. Plasterk man y acepta e humiyacion aki un biaha mas.

Madurez politico
A yega ora si pa pone sr. Mike Eman responsabel pa gastonan innecesario causa door di su mesun actonan infantil. A yega momento pa pone paga esaki unda cu por ehempel su accion di welga di hamber a costa pueblo den careda di 50.000 florin y awo otro gastonan innecesario pa su biahe pa Hulanda pa haya un ranca di orea di sr. Plasterk. Pueblo, no sigui acepta cu pa su caprichonan nos pueblo ta esnan cu cada bes tin cu paga pa e gastonan. Cu e placa aki nos por a haci inversionnan den diferente sector na Aruba. 
Pa termina mi tin di bisa cu a yega momento cu pueblo tin di tuma decision si e ta dispuesto pa sigui pasa berguensa of ta busca un lider cu ta capaz di goberna e pais aki na un manera responsabel pero sigur cu madurez politico.

Expresionnan haci den e articulo aki no necesariamente ta refleha opinion di ArenaPoliti.co