Perspectiva Independiente without background 001

Parlamentario mr. Xiomara Maduro (MEP): ARA ta pidi pa stop di trapa riba e derecho presupuestario di Parlamento

XM81
E democracia di nos Pais den man di Gabinete Eman ta conociendo un decadencia dia tras di dia. Sigur awor cu Parlamento di Aruba mester trata e Ley di mas importante, esta e Presupuesto pa nos Pais, e decadencia aki ta bira mas visibel. Aparte di e comportacion foi sla di algun Parlamentario di AVP y e carencia den maneho di e Presidente pa tene orden, nos por constata cu e derecho parlamentario pa atende cu e presupuesto, e budgetrecht, ta wordo malamente trapa. Y tur esaki fomenta y aproba pa Minister Eman. E danio aki ta uno grandi na e democracia di nos Pais cu ta pone cu te hasta e Controlaria General di nos Pais, Algemene Rekenkamer Aruba (ARA), tambe ta pidi pa stop di trapa riba e derecho presupuestario di e Parlamento di nos Pais.

Bulldoze enves di trato serio
Ya ta algun aña caba cu Gabinete Eman ta entrega presupuesto cu seyo irealistico di Raad van Advies. Pa evita cu Parlamento por haci un trabou di control debidamente, ta core pone precion pa asina e Presupuesto wordo trata den un tempo record. Gobierno cu ayudo di e Presidencia di Parlamento no ta brinda tempo suficiente pa studia e Presupuesto y pa pasa den e informacion debidamente. Gobierno no ta contesta e preguntanan haci pa e Parlamentarionan por escrito na un manera drechi y ta pone precion cada ves riba e Presidencia di Parlamento pa e reunionnan tuma lugar den tempo record y silenciando e parlamentarionan dunando algun minuut so pa por debati cu e Ministernan. Parlamento ta bulldoze e Presupuesto enves di trate cu e seriedad debido.

ARA tambe ta adverti
Den su ultimo rapport riba e Cuentanan Annual di Pais Aruba pa 2015, ARA tambe a pidi pa stop di trapa riba e budgetrecht di Parlamento. Riba pagina 4 nos por lesa, “Tambe ta wordo recomenda pa no sigi tolera cu e derecho presupuestario ta wordo afecta di un forma negativo. Algemene Rekenkamer a trece esaki dilanti na varios ocacion durante e añanan cu a pasa.” Pues cu otro palabra ARA tambe ta wak e peliger cu e wega politico aki di Minister Eman y su bende ta trece pa e democracia di nos Pais.
161113 ARA budgetrecht
Rechasa Eman y su bende
Cada dia cu pasa cu Minister Eman y su bende keda na mando, nan ta trece mas decadencia den e politica di nos Pais cu consecuencia grave pa e democracia cu nos mester cuida y conserva como Pueblo. Limita e derecho presupuestario ta un senial fuerte di e decadencia aki. Algo cu ARA como un Colegio Halto di Estado tambe ta adverti nos di dje. Pa Aruba progresa y pa nos no mester pasa mas berguensa como Pais, nos Pueblo mester rechasa Minister Eman y su bende kendenan ta esnan cu ta orchestra y fomenta e abusonan aki contra e democracia di nos Pais.

12 november 2016 

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.