Perspectiva Independiente without background 001

Gerick Croes (MEP): Reaccion di pueblo - Pensionadonan ta cremencha tur luna

GerickCroes-PensionadoNa Aruba diferente grupo den nos comunidad ta pasa trabou turluna. E comentario cu mayoria biaha bo ta tende ta "nos ta cremencha", cual ta nifica cu loke tin na entrada no ta yega pacubri gastonan basico mensual. Nos pensionadonan sigur ta un grupo grandi den nos comunidad cu ta pasa den e cataclismo aki. 

Gastonan di utilidad

Recientemente nos a realisa un bishita cerca nos grandinan. Nos grandinan a informa nos cu e suma cu nan ta ricibi na pensioen primordialmente ta wordo destina na gastonan di utilidad,cuminda, medicamento, transporte, vivienda finalmente paña ysapato. Durante diferente combersacion a sali afor cu loke cunan ta ricibi na pensioen ta pone nan pasa trabou y "cremencha" tur luna. Nan ta di opinion cu e gastonan di utilidad (awa y coriente) den e ultimo tempo ta un di e componentenan cu mas peso ta pone riba nan entrada mensual. Nos a wordo conta cu gran parti di nan pensioen ta bay na gastonan di utilidad ( tin caso cu esaki por yega te 30-40%) y cu e ultimo aumento di oktober 2014 a haci e situacion aun mas pio. E disgusto t’asina grandi pasobra net nan cu ta usa boudi 500 Kwh a haya un aumento di tarifa, algo cu te awendia no tin un hustificacion! 

Costo di bida

Loke nan ta ricibi mensualmente ta un entrada limita y pa colmo no tin ningun tipo di proteccion social cu ta tene cuenta cu e dificultadnan cu nan ta pasa aden. Den mayoria di caso e placa no ta yega pa por bay supermaket pa cumpra cuminda y comestibles debi cu esaki a bira caro ultimo tempo y no tin control di prijs pero tampoco un canasta basico amplio cu ta haci posibel pa nan por logra cumpra lo necesario pa alimenta nan mes tur luna. E ta un realidad cu costo di bida a aumenta y ta afectando tur clase social na Aruba pero loke ta di lamenta ta e simpel hecho cu nada ta wordo haci di parti di e gobierno actual pa contra-aresta esaki! 

Cuido Medico

Pa loke ta trata medicamento y otro vitaminanan mester enfatisa cu no ta tur ora nos grandinan por afford di cumpra esakinan.Pesey e ta incomprendibel e hecho cu kier bay cobra 3 florin pa cada remedi receta! E maneho di AZV y su limitacion den atencion y cuido medico hopi biaha hasta ta pone nan salud den peliger. Esaki ta algo cu sigur cu mester pone atencion na dje pasobra financieramente e ta dificil pa bay te den exterior pa haci checkup di salud siendo cu aki e mester por tuma lugar sin tanto contratiempo. 

Pa loke ta trata e otro categorianan di gasto, nos a wordo conta cu e placa cu ta resta no ta duna espacio pa haci esakinan. Aunke por ehempel Arubus tin un tarifa special ( y ticketnan special pa 60+ plus) e ta un hecho cu hopi di nos grandinan no por cana pa tuma bus y ta haya nan mes tapaga mas placa pa por haci diferente respondi cu mester wordo regla. Algo cu sigur ta di lamenta tambe ta cu nos grandinan a expresa cu tin poco na actividadnan di distraccion y si nan tin gana mes di haci esaki nan mester pensa riba e placa cu no tin. Mas cobransa

Nos a combersa tambe tocante e popular “reparatietoeslag”.Mayoria pensionado a expresa cu e suma di reparatietoeslag ta insignificante mirando e hecho cu nan poder di compra a bay sumamente atras y di otro banda a haya ta saca mas placa pa tur e aumentonan di e ultimo tempo. Ehempelnan cu a wordo dunata e recogemento di sushi cu ta costa 26,50 tur luna y remedinan cu nan mes tin cu paga pasobra AZV no ta cubrinan. Sin laga afor cobransanan absurdo di parti di Departamento di Impuesto cu den varios caso no tin base! Si tawata un scenario cu no tawatin tanto medida esaki lo por tawata diferente. 

Hecho ta cu e pensionadonan ta solamente un grupo selecto di e tur otro gruponan den nos comunidad cu tambe a bay atras ultimo tempo cu ta bibando den situacion preta. Aunke Gabinete Eman ta den su mundo di ignorancia e ta keda un hecho cu e ultimo medidanan - kier of no - ta presiona aun mas duro e forma di biba di famianan y afecta nan calidad di bida! Nos ta condena cu nos grandinan ta bibando na merced di e situacion incomodo aki mientras gobierno mes ta sigui gasta placa !

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.