Ta conoci cu Gabinete Eman a pidi CFT pa tira bista riba presupuesto 2015 y duna su opinion riba esaki. E rapport di CFT a keda cla 29 di december 2014 y e siman aki e rapport a bira publico via www.cft.cw. Den e rapport CFT a bin cu 4 recomendacionnan concreto pa e maneho di Gabinete Eman.

Na promer lugar CFT a recomenda pa Gabinete Eman stop e crecemento di gasto di gobernacion specialmente gasto di personal. No ta conoci ainda si e recomendacion aki ta encera cu mester pone un paro na tur bevordering, periodiek, bashipremie y gelijkbedrag cu ta wordo pagan a e empleado publico. Como segundo recomendacion CFT ta conseha Gabinete Eman pa tuma algun medida simpel mas pronto cu ta posibel y aki ta sugeri pa bin cu un solidariteitsbelasting y hisa BBO.

CFT a recomenda Gabinete Eman tambe pa bin promer cu 1 di februari 2015 cu un plan con lo bay implementa e medidanan necesario y den esaki splica con lo introduci e solidariteitsbelasting y hisa BBO. Parew cu esaki Gabinete Eman mester raporta cada kwartaal na Parlamento riba e progreso di e medidanan aki. Pa esaki CFT a recomenda Gabinete Eman pa instala un comicion bou di liderasco di Minister Eman kende mester asumi e responsabilidad pa e medidanan wordo tuma ya cu Minster Bermudez so no por carga tur e responsabilidad.

Por ultimo CFT a recomenda Gabinete Eman pa haci cambio den e administracion financiero di Pais Aruba y incorpora esaki den e Ley di Comptabilidad pa asina por tin cifras real y Parlamento por haci cambio na tempo riba e presupuesto di nos Pais. Pa esaki CFT ta recomenda pa busca experticio pafor di gobierno pa yuda drecha e situacion.

Mester remarca cu Gabinete Eman mester tuma e recomendacionnan di CFT ya cu si Gabinete Eman no tuma e 24 medidanan cu e mes a propone pa tuma, CFT no lo duna un conseho positivo na Conseho di Minister di Reino pa Aruba por haya fia placa riba mercado internacional. Esaki lo ta devastador pa nos Pais ya cu na maart Gabinete Eman mester cumpli cu debenan di nos Pais. Si no tin placa pa paga, nos Pais lo bay den default y e consecuencia lo ta fatal.

21 januari 2015

Expresionnan haci den e articulo aki no necesariamente ta refleha opinion di ArenaPoliti.co