E diversidad di culturanan Caribense y bunita naturalesa ta haci di San Nicolas e candidato ideal pa bira Aruba su “Cultural Heritage Capital”.

E capital di herencia cultural, cu un sinfin di oportunidadnan pa desaroyonan economico y particularmente den e industria di turismo, un potencial enorme pa crecemento y desaroyo, e tempo pa San Nicolas ta “awo”. E proyecto “Cultural Heritage Capital of Aruba” a cuminsa cana su caminda cu diferente intervencion di parti di gobierno. Recientemente Minister Mike de Meza y Minister Otmar Oduber tabatin un reunion cu Aruba Investment Bank pa cu e projecto unda a discuti diferente faceta di e procesonan cu ta tumando luga of mester tuma luga.

Minister De Meza a splica cu e acento ta riba tres elemento, esta turismo, cultura y naturalesa y con pa haci uzo optimal di e ingredientenan aki. San Nicolas ta un ciudad cu un mix di culturanan caribense vibrante, cu partinan sumamente bunita di naturalesa cu ta haci e area uno cu un potencial grandi pa desaroya su mes como un parti importante di turismo, e mandatario a remarca.

Loke a trece un desaroyo sin igual pa San Nicolas y Aruba henter for di 1924, esta e industria pisa cu e refineria, na mesun momento a trece limitacionnan cune pa diversificacion di e economia di San Nicolas, segun e titular di asuntonan economico. San Nicolas ta wordo mira como un area di refineria, como si fuera cu esaki ta e unico industria cu por existi aki, tanten cu e tin un potencial grandi pa turismo, uzando e cultura caribense y naturalesa pa atrae e industria aki, Minister De Meza a agrega.

E reunion entre AIB y e mandatarionan tabata uno hopi importante, como cu ta trata di e finalisacion di e raport cu ta defini e proceso y proyectonan cu tin di tuma luga na San Nicolas, cu acento riba e puntonan pa desaroya y diversifica e economia. Minister De Meza a bisa cu ademas di e centro di ciudad di San Nicolas cu tin e urgencia mas grandi, poco poco tambe lo ta dunando atencion y lo extende e trabounan di renobacion den e areanan rond di e centro y mas leu, bayendo te den e barionan residencial.

Minister De Meza a bisa cu den cuadro di preparacionnan pa un desaroyo hopi positivo a tuma pasonan y decisionnan pa cu entre otro infrastructura for di cuminsamento di Gabinete Mike Eman I y ta siguiendo awo cu Gabinete Mike Eman II. A inverti caba den areanan y proyectonan manera Bernardstraat, Otaheitistraat, Juwana Morto, Joe Laveist Sport Park y a bay te den Mabon, a crea Lago Heights Hill Park y Carnaval Village y ademas, ta cuminsando cu e Carnaval Museum.

San Nicolas di berdad ta hayando atencion cu hopi aña no a wak den e districto aki y ta evaluando diferente inversionnan cu mester tuma luga ainda di parti di gobierno pa duna realce na e plannan pa realisa e cuidad como e capital di herencia cultural, Minister De Meza a laga sa.

E mandatario a menciona tambe Green Corridor como un proyecto cu ta un parti di e desaroyonan total, cual como conexion principal entre San Nicolas y vecindario cu e parti di nos isla unda tin mas actividad turistico lo habri asina hopi mas oportunidadnan pa desaroyonan grandi tambe. Entre otro el a menciona e proyecto di hotel pa Sero Colorado.

Gobierno ta percura pa asina garantisa cu tin e infrastructura presente cu por carga desaroyonan nobo na San Nicolas, Minister De Meza a bisa.

Pa loke ta trata e refineria, gobierno ainda ta bezig ta purba haya un operador cu experiencia, e poder financiero pa inverti. Lastimamente tur esfuerso te awo no a duna resultado positivo. Paso pa paso Valero ta insisti di bay over pa e siguiente fase di nan responsabilidad, cual ta “repurpose” e area di e refineria. Minister Mike de Meza a bisa cu lo reuni atrobe cu Valero pa pasa over di detayenan pa mira kico lo por haci, pero gobierno tambe ta trahando riba diferente idea pa cu con pa duna e terenonan un destinacion diferente (repurpose), el a agrega. Minister De Meza a conclui bisando cu e maneho ta pues “tweesporig” unda ta habri pa un operador nobo, pero cu si esaki no tuma luga y Valero ta sigui cu actividadnan di transshipment, ta prepara tambe pa desaroya e tereno grandi cu lo keda disponibel.

Expresionnan haci den e articulo aki no necesariamente ta refleha opinion di ArenaPoliti.co