Desde gabinete Mike Eman no tin maneho mas!

Durante e reunion publico tocante husticia varios Parlamentario di MEP a hasi comparacionnan entre e logronan di e gobiernonan di MEP y AVP riba tereno di husticia. Pesey ta importante pa ripiti algun di e logronan di Gabinete Nelson Oduber, pasobra eseynan tabata logronan real y efectivo riba tereno di husticia.
1.      Renobacion y ampliacion di K.I.A y compra di inventario (equipo y material) pa KIA., después no a sucede nada mas
2.      Construccion di Warda di Polis na Noord,
3.      Construccion di Centro di Husticia y Warda di Polis na Santa Cruz,
4.      Helicopter pa Aruba,
5.      Lease di Radarnan di Raytheon pa combati ilegalidad,
6.      Institucion di Warda Nos Costa,
7.      Introduccion di Flexi-team y Arrestatieteam,
8.      Institucion di polisnan di bario (barioregisseurs),
9.      Camaranan infrared (Nightvision) pa Warda Costa, Cuerpo Policial y Douana,
10.  Compra di sistema automatisa di informacion ‘Base pa departamento di recherche’,
11.  Compra di sistema automatisa pa registra fingerprints (AFIX tracker),
12.  Visibility teams pa Hi-Rise, Lo-Rise Hotels, Centro di Playa y San Nicolas,
13.  Compra di mobilario pa Polis y aparatonan special pa TOHD,
14.  Compra di boto nobo pa Maritiem Politie,
15.  Proyecto di Radex pa Inmigracion na Aeropuerto,
16.  Inversion di FOL na Aeropuerto,
Esakinan ta apenas un parti chikito di tur e inversionnan cu gobierno di MEP a haci den Ministerio di Husticia. Esey bo ta yama combati criminalidad, no e maneho slap cu tin aworaki.

“Nos tur sa cu e enfasis di e gabinetenan di Mike Eman tabata pa caba cu tur loke MEP a cuminsa. Nan NO kier a continua cu maneho di Nel Oduber, di Rudy Croes, di Marisol Lopez Tromp, di Nilo Swaen. AVP a yama tur pa corputo y kier a para tur cos. Talves tin hende cu kier lubida esey, pero pueblo si ta corda. Ami por mustra respet pa un politico cu ta critica maneho di su oponente, y ora e yega na mando ta cambie pa algo MIHOR! Pero esey no a pasa. Mike Eman y su grupo di minister a para casi tur desaroyo di nos pais, riba tereno economico, financiero, husticia, pero no a bin cu NADA a cambio. Y pesey awe nos pais ta den un problema serio financieramente, pero tambe di inseguridad severo. Aruba merece mihor, y si bo mes no tin mihor idea of bo no tin vision, por lo menos continua cu e proyectonan cu gobierno di MEP a cuminsa, pasobra eseynan tabata realmente efectivo. E tempo ey criminalidad tabata bou control”, líder di MEP a expresa.

Expresionnan haci den e articulo aki no necesariamente ta refleha opinion di ArenaPoliti.co