Awe partido Union Patriotico Progresista, UPP, ta presenta e ultimo parti di e cuatro puntonan esencial di UPP pa e campaña electoral venidero, cu nos ta considera e “speerpunten” di nos programa. Durante campaña 2013, UPP tabata tin den su programa un capitulo cu ta trata Nos Seguridad. Pero mirando cu e situacion di criminalidad a para bira mas pio, UPP ta considera cu e punto di Nos Seguridad mester bira un punto di atencion urgente, pues un "speerpunt", pa atende den un proximo gobernacion.
Den e ultimo articulonan di UPP nos a enfoca riba e aspectonan di “Good Governance” como instrumento pa soluciona problemanan den nos gobernacion na Aruba. Nos a atende nos educacion como un herment pa alcanza e desaroyo di nos ciudadanonan na un forma igual y cu ta un di INCLUSION. Tambe nos a mustra riba e aspecto di Arubianizacion cu ta hopi necesario pa nos elemina e segregacion aki na Aruba y traha den unificacion di nos pueblo. Y e di cuatro punto aki mester percura y garantisa e trankilidad y felicidad di nos pueblo.

SEGURIDAD.
No cabe duda cu un di e inkietudnan mas grandi cu ta biba bou di nos pueblo ta e sentimento di inseguridad.  UPP kier ta bon cla aki, cu aki no ta trata di un percepcion, sino di un realidad. Sigur ora nos papia cu nos hendenan y nos lesa noticianan tur dia, ta bisto cu a yega e momento pa haci algo na e situacion di inseguridad reinante aki na Aruba.
E motibo number uno cu ta biba bou di e pueblo ta, cu gobernantenan por haci loke cu nan kier, y nan ta tapa pa otro y ta "get away"!! Pesey pa UPP ta hopi importante e introduccion di e reglanan di "Good Governance". Cu esaki na vigor, ningun gobernante,parlamentario, ambtenaar etc etc, lo por scapa. Den e parti di Arubianizacion nos a atende tambe e aspecto di nos capacidad di carga, unda cu nos mester realisa cu Aruba ta yen. UPP ta para pa un integracion, pero alavez percura pa caba cu e maneho di "open door" y "free for all" den otorgamento di permiso di estadia y di trabou. Lo bin cu un maneho estricto di "zero coruption" y "zero exception" y na unda lo tin screening tanto pa cu pasado criminal y tambe pa cu  malesa contagioso y cronico. Lagando ken cu ta drenta sin e control necesario, segun rapport al respecto, ta un di e causanan di tanto atraco aki na Aruba. Pesey mester trece e maneho estricto cu a wordo hiba entre november 2005 y fin di october 2009 back, haciendo esaki kizas un poco mas eficiente, pero cabando cu e caos cu tin y cu ta conduci na e “free for all” cu tin awor cu a conduci na e aumento drastico di e criminalidad aki na Aruba.
Alavez mester bin mas control na nos fronteranan. Esaki ta habri manera un sefta na e momentonan aki, cu e consecuencia cu hendenan por drenta Aruba hopi facil. UPP lo no bin cu solamente e radar bek, pero lo haci uzo di tecnologia moderno y no mucho caro pa por vigila nos costanan. Lo pone tambe postnan di vigilancia  na unda ta conoci, cu tin traficacion di hende den un forma ilegal.
E tecnologia moderno ki lo por sirbi tambe ora bai haci "inval"-nan, pa di e manera ey por tin un bista total di e situacion. 

Tambe ta necesario pa elemina e fragmentacion cu a tuma lugar den e cadena di control cu ta existi den ehecucion di e ley di LTU y centralisa esaki atrobe.
Tur esaki ta bay  den combinacion cu ponemento di camaranan na multiple lugarnan y barionan y alabes un aumento di vigilancia policial. Di e forma aki nos pueblo por sinti su mes protehi. Naturalmente mester pone fondonan disponibel pa nos cuerponan por funcciona manera mester ta.

Den henter e cadena den combatimento di criminalidad nos NO por lubida esnan cu ta traha den e sector priva. Tin varios compania priva cu ta traha riba e tereno di seguridad. Sigur nan ta aporta no solamente na e companianan cu ta haya e servicionan aki, pero tambe indirectamente e pueblo  ta wordo sirbi cu e trabou di seguridad cu nan ta haci, aunke hopi biaha pueblo no ta ni ripara esaki. Y nan aporte sigur ta yuda den combatimento di criminalidad. Pesey UPP ta convenci cu tanto e companianan aki como nan empleadonan mester wordo sosteni. E sosten aki por wordo haci por medio di cursonan cu ta wordo duna dor di expertonan den ramo aki y certifica nan tambe, manera ta sosode p.e. na Hulanda. Hisando e nivel di empleadonan den e sector aki mas ainda, automaticamente mester yega na un sueldo minimo pa e sector aki. E ultimo aki ta cuadra cu e intencion den e programa di UPP pa cambia e  ley di sueldo minimo di tal forma cu lo mester existi un sueldo minimo pa cada categoria di empleo. Profesionalisando e sector aki mas ainda, sigur lo contribui den combatimento di criminalidad den su totalidad. Di e forma aki ta elimina e sentimento di inseguridad cerca e pueblo y ta contribui na e trankilidad bou nos pueblo.

Den e dianan nos dilanti nos lo amplia mas riba e aspecto di seguridad. Pueblo sigur ta anhela pa bin cambio riba e situacion di seguridad aki na Aruba. Y UPP ta sigur di por contribui den esaki, y cu e boluntad y determinacion di tur, e cambionan necesario lo wordo ehecuta. Tur esnan cu tin comentario of kier tuma contacto cu UPP por haci esaki na This email address is being protected from spambots. You need JavaScript enabled to view it..

UPP E ALTERNATIVA REAL Y VIABEL.


Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co