Dialuna tabata tin apertura di O’Neil Caribbean Kitchen situa den Caya Grandi di San Nicolas, na unda antes tabata Promenade Restaurant. Minister ing. Mike de Meza tabata invitado di honor pa inauguracion di e restaurant nobo. “Pabien na O’Niel Williams y famia cu e apertura di nan restaurant na San Nicolas y alabes danki pa aporta como inversionista hoben na e desaroyo pa centro di cuidad di San Nicolas,” e mandatario a bisa.

Den un ambiente ameno, di famia y hopi amistad sr. O’Niel Williams, naci na Jamaica cu ta propietario di O’Neil Caribbean Kitchen, a comparti cu “Semper mi tabata desea pa habri un restaurant, mi a haya e oportunidad pa habri un restaurant na San Nicolas y mi ta contento pa ta e prome restaurant na San Nicolas di e estilo aki. Nos tin cuminda Caribense cu un toke internacional y un menu special pa mucha. Nos ta invita comunidad di Aruba, San Nicolas en especial pa bishita nos y pasa un rato ameno. Nos ta habri di Dialuna pa Diadomingo. Pa informacion of haci reservacion por yama na 5848700 of 5930376.”

Di otro banda e Minister di Asuntonan Economico ing. Mike de Meza mes a considera e inversion aki un parti importante pa asina completa loke cu gobierno ta haciendo of a haci caba. “Sigur den e cuadro di preparacion pa un desaroyo hopi positivo a tuma pasonan y decisionnan pa cu entre otro infrastructura di San Nicolas. Den tur area di San Nicolas a mira cambionan cu ta andando. P’esey mes ta preparando pa loke ta bay pasa den e curason di Caya Grandi di San Nicolas y e inversion di famia Williams sigur ta un stap dilanti di tur loke ta e plan di gobierno. Na San Nicolas tin diferente proyecto pa concretisa e aña aki ainda pa duna mas realse na San Nicolas. Proyectonan cu tin ta pa atrae local, pero hopi turista tambe pa e otro parti di nos isla. P’esey mester tin localidadnan tambe pa e bishitante por haya su cuminda Caribense manera esun di famia Williams,” segun Minister ing. Mike de Meza.

Expresionnan haci den e articulo aki no necesariamente ta refleha opinion di ArenaPoliti.co