Perspectiva Independiente without background 001

POR: Joselin Croes ta di opinion cu mester bin un cambio den nos maneho di admision di stranhero

JoselinCroes05
E punto di salida pa cu e maneho di admision di stranhero pa pais Aruba mester semper ta:  Proteha nos mercado laboral pa esnan cu ta biba na Aruba; Proteha pais Aruba di personanan cu kier bin haci daño na nos isla y proteha nos isla di sobre poblacion.  Pero si pa un of otro motibo Aruba mester di hende di afor pa bin traha, ban percura pa e ta un bon hende, un persona cu ta educa, cu ta jong y cu kier bin cu su famia forma parti di nos cultura y nos forma di biba.

Prome cu tur cos e admision pa starnhero mester ta uno basa riba estadistica, uno basa riba un maneho structura pa termino largo, uno transparente y sostenibel. Si ta asina cu nos mester di hende, laga e persona aki ta uno cu ta bay forma parti di nos pais, nos cultura, nos idioma y nos custumbernan. Nos mester percura cu tin vivienda, scol y seguro medico pele y cu e pais por carga e peso financiero tambe. Pa añanan largo Aruba a crece danki na e contribucion y colaboracion di tur e personanan aki cu a laga nan pais pa bin biba y traha aki y  nan ta contribui nan nos pais su economia.

Actualmente e maneho di admision di stranhero ta promove pa un persona individual bin biba y traha na Aruba. Lagami splica kico mi kiermen.

Conforme e admision pa un empleada domestico of un persona cu ta haya un permiso di trabou, su so por bin biba y traha na Aruba pa e prome 3 aña, dus su yiunan y casa no por bin cu ne. E consecuencia di esaki ta cu pa e prome tres aña e persona  aki lo manda tur placa cu e gana pa su famia pafor di Aruba. Despues di tres aña e mag di pidi permiso pa su famia. E problema di e maneho aki ta cu conforme e maneho e casa cu despues di 3 aña ta logra haya un permiso pa bin biba na Aruba, no por haya un permiso pa traha pa e prome 3 añanan.  Con e famia aki por sobrevivi cu un solo salario? Dus nos ta dune permiso pa biba, nos ta dune AZV gratis pero nos ta stop e di traha y di contribui na caha di AZV y na caha di belastingdienst. E ta pa cuminsa inhumano pa separa mama cu tata y yiunan di otro. Nos no mester lubida cu e personanan aki ta logra haya un permiso di trabou ta paso no tin hende na Aruba pa haci e trabou, dus nos mester di dje, e ora ban percura pa e bin cu su famia pa asina nan placa por keda Aruba y pa nan hunto integra como famia den nos isla. Claro cu maneho mester ta firme bisando cu nos yiunan di tera, esnan cu ta biba na Aruba of ta regresando nan isla ta keda na prome lugar pa haya trabou, pero den caso cu mester busca hende di afo, ta propone pa cambia e maneho di admision pa enfoca riba parehanan jong, educa, casa y kisas cu yiu pa bin biba y traha na Aruba.

Conforme admision pa un permiso di rentista, inversionista, director y CEO, e inversionista, rentista etc mester haya su permiso prome cu e por saca e permiso di su casa y su su yiunan. Un permiso ta tarda mas o menos 8 luna pa 1 aña, dus pa un aña largo nos ta separa un famia di otro pasobra Dimas ta tarda mas di 1 aña pa saca un permiso cu consecuencia cu nos ta perde di gana e entrada cu e personanan aki cu tin placa pa biba aki lo hinca den nos economia.

Por ultimo, y esaki si pami ta algo insolito y inaceptabel ta e hecho cu si un residente di Aruba, dus por ehempel un stranhero cu tin 6 aña bibando y trahando na Aruba y ya caba di 6 permiso valido den su man ta namora y ta casa cu un stranhero e por pidi un permiso di reunificacion familiar pa su casa pero e casa no por traha. E ta haya un permiso pa biba sin derecho di traha. Splicami ta di kico e pareha aki lo biba, pasobra nos tur sa cu e ta imposibel pa biba di un solo salario na Aruba si bo salario ta bou di 3000 florin pa luna.  

Mester bin un cambio den nos maneho pa den caso cu mester bin cu hende di afor, primordialmente promove parehanan jong, educa y si por famianan jong bin biba na Aruba y pa por duna e casa di e residente oportunidad pa traha, pasobra e realidad ta si nos no hacie nan lo traha anyways pero di un forma ilegal pasobra nan mester di por biba y come.

Esaki ta loke por sinti den comunidad cu ta expresa cu ta desea un cambio den maneho di admision di stranhero.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.