Durante conferencia di prensa di Diaranson ultimo, Parlamentario pa Partido MEP, sr. Guillfred Besaril, a elabora riba e situacion cu ta reina na Augustinus College na San Nicolaas. Parlamentario Besaril a declara lo siguiente:

"Nos a wordo aserca door di diferente mayornan di alumnonan cu ta atendiendo dicho skol. Mayornan y esnan preocupa pa Augustinus College ta sinti cu tin tur fondo di mundo disponibel pa klinkers bunita dilanti e skol, mientras cu pa e facilidad educacional no ta pasando net net nada. E situacion ta simplemente deplorabel!

Den pasado e flamante "Ex Director" di Augustinus College a protesta energicamente debi na e estado deplorabel di e skol. Awe cu e persona aki ta den un posicion mas halto (Parlamentario) den nos comunidad, un posicion den cual e por influencia e Gobernantenan di Pais Aruba pa tuma accion of sikiera protesta fuerte contra e Minister encarga, e ta laga grandemente di desea. Su accionan den e problematica di Augustinus College ta papia mas cu mil palabra!

For di esnan cu ta realmente preocupa cu e skol, nos a ricibi diferente yamada y hasta un mail, caminda nos por a constata cu te hasta a aserca un Parlamentario di AVP cu ta biba Pariba di Brug pa yuda of hasi algo pa Augustinus College, pero lamentablemente sin ningun resultado. Esey a pone cu esnan concerni a dicidi na aserca nos Fraccion di MEP pa mira si sikiera asina e situacion penoso aki por haña e atencion cu e merece.

MEP ta conciente cu no ta solamente e construccion of renovacion di un edificio ta conta na momento di kier hisa e calidad den nos enseñansa. Pero nos ta totalmente convenci si, cu e ta un componente masha importante, cu ta influencia tanto e studiante como e docente. Bo no por funciona y logra resultado optimal si bo ta mane "Benta den un Chike di Porco!"

E tipo di situacionan aki no por mas! Mester por bin cu un maneho specifico den cual ta planifica con ta handa cu e mantencion y construccion di edificionan den Enseñansa. Mescos ta conta cu den futuro mester por planifica miho con ta handa cu e tema aki sin cu e afecta e studiantenan y/of personal den educacion den nan funcionamento. Den e Comision Fiho di Enseñansa di Staten nos lo urgi e Minister en cuestion pa atende cu e situacion di Augustinus College lo mas pronto posibel. Den e tratamento di Presupuesto 2014 y 2015 cu ta na caminda, nos lo urgi e Minister pa presenta su plan pa evita e tipo di percansenan aki den futuro. Paso na final di dia e hobenan y Pueblo di Aruba Merece Mihor!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co