Prensa a puntra lider di MEP Evelyn Wever-Croes su opinion tocante e disputa publico entre “Grupo di 7” y pastor Jairo Maduro. Lider di MEP no tabata kier a bai den e discusion aki, y a indica cu pesey mes el'a pidi Obispo Luis Antonio Secco pa intermedia.
Evelyn Wever-Croes a indica cu e disputa publico aki ta tumando proporcionnan incontrolable, y tin un impacto profundo den nos comunidad cu ya caba ta hopi afecta pa tur e medidanan, problemanan di desempleo, criminalidad, problema social. "Como cuidadano, e disputa aki tin mi molestia, pero como Catolico e disputa aki ta causando mi hopi dolor.Y mescos cumi, tin hopi fielnan cu a wordo afecta pa e disputa aki. Si no hasi nada pa para e disputa aki, y especialmente e forma con publicamente e disputa ta wordo conduci, ta Iglesia Catolico ta sali perdi. Pesey mi a tuma e libertad di pidi Obispo pa intermedia of apunta un comision pa intermedia p'e."

MERVIN WYATT-RAS
Pa loke ta e forma con parlamentario Wyatt-Ras di AVP a reacciona, lider di MEP a contesta: "mi no ta kere cu esey tabata prudente, si di berdad e ta meen cu e ta preocupa pa Iglesia, cu e ta preocupa pa su Pastor, e no mester a mescla su mes den e discusion y tira cu mas lodo ainda, sigur no den mi direccion. Esey no ta yuda ningun hende cu nada. Pa su informacion Pastor Jairo a yamami diasabra pa bisami cu e ta bai denuncia grupo di 7, ma papia cu hendenan di grupo di 7 cu a bisami cu nan ta bai denuncia e pastor. Mi a pidi nan reconsidera, y especialmente mi a bisa Pastor Jairo cu mi no ta kere cu e mester hasi e denuncia bou di Santo Sacrificio di Misa. Pasobra fielnan ta bai misa pa nan haya guia spiritual, pa nan haya inspiracion pa enfrenta e retonan di e siman nobo. Pero Pastor Jairo sa kiko e ta hasi, el'a bisami cu el'a papia cu Obispo caba, pues pesey ami no kier drenta den e discusion, mi a pidi Obispo pa intermedia". Segun Wever-Croes Pastor Jairo sa cu MEP no ta Grupo di 7 y Grupo di 7 no ta MEP.

DESVIA ATENCION
Ta obvio cu e atakenan entre e dos gruponan aki a desvia atencion di e problemanan real di nos pais: e noticia di CFT diabierna ultimo con malo nos situacion financiero mas. Ya ningun hende por bisa cu ta MEP ta haya e situacion serio, awor tur hende por a mira y scucha pa nan mes cu e situacion ta hopi alarmante y e gobierno aki a hiba un maneho masha masha malo mes. "No laga ningun hende desvia bo atencion di e problemanan real di nos pais", tabata conseho di lider di MEP Evelyn Wever-Croes