"E diferencianan di opinion entre gobierno di Aruba y di Hulanda riba maneho di finansa publico y riba supervision di presupuesto, ta existi pa hopi aña caba. E diferencianan di opinion ta riba dos punto. E prome ta riba supervision di presupuesto. E didos ta riba e forma pa sali for di e crisis financiero y economico cu a afecta henter mundo. For di aña 2010 gobierno di Hulanda tabata kier pa Aruba forma parti di e CFT cu a wordo introduci na Corsow y Sint Maarten. Aruba a bisa e tempo ey cu pa motibo cu e kier hiba un otro maneho pa motibo di e efectonan dramatico di e crisis financiero, economico y social cu tabata suta Aruba na 2010. Gobierno di AVP a bisa cu e no ta bay hiba un maneho di austerisacion, pero uno di stimulacion. Hulanda nunca tabata di acuerdo cu e maneho di stimulacion di forsa di compra, di inversionnan grandi y di mehorascion social y fisico cu fondonan publico. Apesar di a elogia e resultadonan grandi cu e realisa den apenas 4 aña, Hulanda no tabata di acuerdo. E echo cu Aruba no ta cay bou di e supervision di presupuesto di CFT a keda forma parti di e diferencianan di opinion entre gobierno di Aruba y di Hulanda. Pesey Hulanda, desde 2010 a sigui insisti den un CFT pa Aruba. E tabata kier pa tur pais di Reino ta den e mes un sistema di supervision financiero. Awor aki Aruba ta e unico cu no ta aden. E conflicto cu a surgi pa motibo di e diferencianan di opinion riba maneho, a causa hopi daño na economia y trankilidad di Aruba. Specialmente for di medio 2014. Banco Central mes a señala cu e diferencia di opinion riba maneho di finansa ta un di e dos motibonan cu e crecemento economico no tabata asina grandi na 2014. Diasabra minister Presidente di Aruba, Mike Eman y minister Plasterk di Hulanda a yega na un acuerdo pa finalisa e conflicto aki. Cu e acuerdo cu nan a firma ta yega un fin na e conflicto. Den e siman y lunanan nos dilanti gobierno di Aruba lo hiba su maneho di reforma di sector publico y di finansa publico den e acuadronan ya aproba y cu palabracionnan haci den e acuerdo cu a wordo firma. Esaki ta trece trankilidad bek den gobernacion y pa desaroyo di Aruba."
Esaki ta loke Rene Herde' lider di e fraccion di AVP a declara diadomingo merdia, ora e fraccion di AVP tabata prepara pa e reunionnan di e siman cu ta bini riba presupuesto di Aruba.

LIDERAZGO Y MADUREZ
Rene Herde a sigui bisa cu no tin sentido pa sigui alarga e discucion aki mas. Ta Aruba ta esun cu ta sufri. Ta pesey ta di aplaudi cu Minister Presidente Mike Eman, a mustra e liderazgo y grandesa pa pone e diferencianan un banda y pa no sigui den e discucion cu e partner mas importante di Aruba den mundo. Rene Herde': "Niun hende ta gana di un discucion sin fin. Nos ta parti di e Reino Hulandes pasobra e ta cumbini nos. Nos kier sigui traha hunto y pesey no tin motibo pa no adopta formanan di traha comun. Manera un forma di supervision di presupuesto cu ta adapta na nos circunstancianan economico, financiero y social. Den e fase aki tampoco ta problema pa adapta e programa di reforma di sector publico, basta cu esaki no afecta desaroyo economico y creasion di cuponan di trabou nobo. Esakinan ta keda prioridad pa nos. E reforma mester por bay man den man cu e maneho di mantene forsa di compra, fortifica e fondonan social (AZV, AOV, APFA) y e maneho pa diversifica economia cu nos a inicia." Asina Rene Herde a finalisa. Den e siman aki lo tin mas informacion riba e acuerdo cu a wordo firma pa por continua cu e desaroyo stabiel di nos pais den cooperasion cu Hulanda.

Expresionnan haci den e articulo aki no necesariamente ta refleha opinion di ArenaPoliti.co