Tur Gobierno cu a wordo forma desde nos Status Aparte tawata bou di encargo di sea AVP of MEP. Mientras cu tin esnan cu kier wak un cambio den e dominio di e dos partidonan aki, hecho ta cu actualmente no tin indicacionnan cu e siguiente Gobierno no lo consisti di AVP of MEP, sea cu un mayoria absoluto of den un coalicion cu un of mas otro partido.
Integrantenan di MEP na hopi ocasion ta expresa cu gabinete Mike Eman II tin cu entrega su retiro. E partido tambe ta papia di alternativanan pa decisionnan cu e Gobierno actual ta tuma. Cu esaki den mente, ArenaPoliti.co a haci algun pregunta al caso durante un combersacion* cu 3 parlamentario di MEP.

7 Minister
ArenaPoliti.co a verifica cu, si MEP forma (parti di) e siguiente Gobierno, lo no tin mas cu 7 minister. Algo cu nos lo mester por asumi, considerando cu MEP ta boga pa AVP baha e cantidad di minister pa 7 pa baha gasto como alternativa pa tuma medida. Lider di MEP sra. Evelyn Wever-Croes a confirma esaki durante e combersacion. Hasta si ta un coalicion, MEP lo insisti cu lo tin 7 minister? Sra. Wever-Croes: “Claro”.

Experiencia Capacidad
E siguiente pregunta tawata ta si nan ta sinti cu MEP ta prepara pa goberna nos pais, of si esey ta algo cu nan ta trahando riba dje ainda. Mas specificamente; si MEP tin suficiente persona cu por fungi como minister pa forma un bon Gobierno, si nan logra haya sosten di Pueblo.
Evelyn Wever-Croes: “Nos status awora’kinan no ta mucho diferente cu loke e status di AVP tabata ta na 2007, cu ta 2 aña prome cu nan a drenta Gobierno. Na e momento aki e ministernan di AVP tin mas tempo den e stoel — si nan sa goberna ta otro cos, esey mi tin mi opinion personal riba dje — pero na 2007, cu ta 2 aña prome cu eleccion, ningun di nan tabata tin e experiencia ey tampoco.”

Repasando e parlamentarionan presente durante e combersacion, sra. Wever-Croes ta menciona e cantidad di aña di experiencia como parlamentario: sr. Ady Thijsen 10 aña. Sra. Wever-Croes y sra. Xiomara Maduro mas cu 5 aña. E ta sigui elabora, bisando cu nan tin parlamentarionan ‘nobo’ [esunnan cu a fungi como parlamentario pa prome biaha na 2013], y cu den fraccion di MEP no tin persona cu a yega di goberna [cu excepcion di sr. Glenbert Croes]. Sra. Wever-Croes: “Nos niun tin experiencia den gobernacion… pero cu tin e capacidad? Definitivamente.”

Sector priva | Ambtenaar
Como ambtenaar y/of den sector priva e parlamentarionan presente durante e combersacion tin experiencia como:
Evelyn Wever-Croes: consehero fiscal, abogado, hefe di departamento (impuesto);
Xiomara Maduro: Certified Anti Money Laundering Specialist, miembro di Financial Action Task Force (FATF), funcionario di maneho na Meldpunt Ongebruikelijke Transacties (MOT);
Ady Thijsen: abogado, consehero huridico/abogado di FTA.
Tur tres tin e titulo di meester in de rechten (mr.).


Parlamentario nobo
Banda di ministernan, partido(nan) cu goberna mester percura pa tin suficiente parlamentario pa representa Pueblo dignamente y controla Gobierno. Algo cu por tin su retonan den nos sistema electoral. Riba e pregunta si MEP tin suficiente hende capacita pa fungi como parlamentario, banda di 7 minister, e lider di MEP ta contesta cu lo ta parlamentarionan ‘nobo’, y cu nan lista (pa siguiente eleccion) lo mester wordo traha ainda, cu e intencion di presenta candidatonan cu e capacidad pa fungi como parlamentario.
Finalisando sra. Wever-Croes ta bisa: “Si nos wordo yama pa asumi e responsabilidad, nos tin hende, nos por haci’e.”

Abo tin confiansa den e team actual di MEP pa goberna nos pais? Duna bo opinion den e seccion di comentario (abou).

*Mei 2015

Expresionnan haci den e articulo aki no necesariamente ta refleha opinion di ArenaPoliti.co