Pa mas cu 15 aña ta wordo papia di introduci un ley di financiamento di partido politico. Mientrastanto Aruba ta e unico pais den Reino Hulandes cu no tin un ley pa regula financiamento di partido politico.
Durante un combersacion na mei 2015, lider di fraccion AVP, sr. Rene Herdé, a bisa cu “e [ley] mester tawata cla caba”, y cu “nos [fraccion AVP] por pase, pero bo kier pa e wordo carga door di tur hende”. Sr. Herdé tambe a duna mas informacion tocante financiamento di partido politico. 

Despues di algun luna ArenaPoliti.co a dicidi di busca un update tocante e ley aki. ArenaPoliti.co a manda pregunta pa parlamentario Marlon Sneek, cu ta representa Parlamento di Aruba den e comision di integridad di Reino Hulandes. ArenaPoliti.co a puntra e parlamentario den ki fase di preparacion e ley ta, y pa ki tempo pueblo por spera cu e ley aki lo wordo trata den Parlamento.

6 pa 8 luna...
Segun sr. Sneek, “e concepto di e ley aki ta cla.” Tocante e proceso e parlamentario a informa; “e idea ta awo cu e diferente partidonan lo ricibi esaki pa duna nan reaccion y pa despues e sigui su caminda legislativo. Cual ta bay Raad van Advies, despues mester contesta e preocupacionnan di Raad [van Advies], pa despues parlamentarionan duna nan reaccion, contesta e reaccionan aki y pa despues sigui pa un reunion publico.”
Segun sr. Sneek e proceso aki “facilmente por tuma 6 pa 8 luna”.

Update comision di integridad
ArenaPoliti.co tambe a puntra sr. Sneek pa duna un update tocante desaroyonan cu a tuma luga en coneccion cu trabounan di e comision di integridad di Reino Hulandes.
Sr. Sneek: “Manera nos sa e parlamentonan di reino ta reuni dos biaha pa aña, esta na januari y na juni. Pa loke ta e reunionnan di januari Dios mediante cu lo tuma luga na Sint Maarten, integridad lo ta tema di discucion un biaha mas. Lo bay discuti pa mira con leu e diferente paisnan ta cu nan leynan pa por garantisa, cu gobernante y partidonan ta cumpli cu reglanan di integridad, pa pueblo por tin garantia di gobernantenan integro y di procesonan transparente.”

Ombudsman y screening di candidato pa bira minister
Sr. Sneek: “Pa loke ta trata Aruba mester bisa cu dos di e leynan cu Aruba a compromete su mes cune ta den fase hopi avansa, aki ta trata di e ley di integridad di candidatonan pa bira minister y e 'ombudsman'. Pa loke ta e leynan aki mester bisa cu nan a bay Raad van Advies y ya a bin bek pa Staten pa asina contesta e preocupacionnan di Raad [van Advies] y pa despues entrega esakinan na Parlamento oficialmente pa asina tur parlamentario por haci nan preguntanan, pa despues ricibi contesta ariba esaki. Despues e ley lo por bay un reunion publico.”


ArenaPoliti.co lo sigui e desaroyonan di e leynan aki.

Expresionnan haci den e articulo aki no necesariamente ta refleha opinion di ArenaPoliti.co