Den diferente comunicado y conferencia di prensa sra. Xiomara Maduro a expresa cu tin un falta di control y responsabilisacion pa loke ta trata presupuestonan di pais Aruba. E parlamentario di MEP a splica cu Gabinete Mike Eman no ta tene suficiente cuenta cu conseho di Algemene Rekenkamer y Raad van Advies. Presupuestonan irealistico ta wordo aproba ciegamente den Parlamento door di Fraccion AVP. Cuentanan anual ta mustra cu ministernan ta surpasa nan presupuesto, hasta cu miyones di Florin, den un forma ilegal.
Sra. Maduro tambe a expresa cu Gabinete Mike Eman ta sconde tras di ley di privacidad, usando e ley pa no contesta preguntanan di Fraccion MEP tocante ken ta wordo paga cu placa di Pueblo pa gastonan di huur, abogado, mercadeo y propaganda. En corto; ministernan cu ta abusa di fondonan publico, y un fraccion mayoritario den Parlamento cu ta permiti pa e abuso continua.

A base di e expresionnan aki, ArenaPoliti.co a haci sra. Maduro e siguiente preguntanan.

ArenaPoliti.co: Ta corecto pa asumi cu bo ta considera Parlamento di Aruba un ‘stempel-parlement’ den cua e parlamentarionan di Fraccion AVP no ta controla Gobierno debidamente y ta permiti e ministernan pa ‘get away’ cu ki cu ta, door di continuamente aproba cualkier ley cu wordo trata?
Xiomara Maduro: Lamentablemente esey ta e realidad cu Parlamento di Aruba ta refleha. Sigur ora cu como parlamentario bo ta haya consehonan di Raad van Advies y rapportnan di Algemene Rekenkamer, Banco Central y di instancianan internacional manera IMF, Fitch, Standard and Poor’s anto bo ta sera bo wowo pa nan y djies vota pro un ley pa complace Gobierno.

AP: Como un parlamentario den oposicon, con bo ta cumpli cu bo tarea di controla Gobierno y representa Pueblo, a pesar di ta forma parti di un ‘stempel-parlement’?
XM: Mi ta consciente cu mi no por cambia e resultado di votacion. Pero esaki no ta kita afo cu mi ta cumpli cu mi trabou parlamentario di pasa den e informacion cu nos ta haci, analisa y cuestiona esaki buscando mas informacion pa asina mi por argumenta pakico mi ta vota pro of contra un Ley. Como parti di e trabou parlamentario mi ta purba di informa Pueblo di e Leynan of decisionnan tuma na un manera simpel pa asina tur hende por ta consciente di kico ta pasando.

AP: Si e ministernan di Gabinete Mike Eman ta abusando di fondonan publico, y e parlamentarionan di AVP cu nan mayoria den Parlamento no lo pone un paro na e abuso aki, ki solucion tin pa para e abuso?
XM: Pa e Pueblo en general y muy en especial gremio y sindicato vocifera y manifesta nan malcontento cu e abusonan aki. Tanten cu Gabinete Eman y e mayoria di Parlamento no sinti e precion aki nan lo sigui haci deshaci na e Pais aki.

AP: Pa loke ta trata CAft, e protocolnan firma y e posibilidad di aanwijzingen y/of Algemene Maatregels van Rijksbestuur; bo ta confia cu Gobierno di Reino (lesa Gobierno Hulandes) ta actua na bienestar di e Pueblo Arubano? 
XM: Gobierno di Reino a tuma un posicion masha ambivalente ultimo tempo. Ta bisto cu nan ta usando Minister Eman como salesman pa por yega na e stoel temporario den e Conseho di Seguridad di Nacionnan Uni. Pesey nan no ta actua manera Statuut ta stipula cu nan mester actua ora cu constata cu tin mal gobernacion na Aruba y cu Gabinete Eman no tin intencion di drecha esaki, cu consecuencia cu e Pueblo ta bay perdi na mal gobernacion y medida cu esaki ta trece cune. E ta mustra cu tanten cu Reino no tin claridad si e ta haya e stoel ey, Minister Eman lo por sigui haci deshaci y “get away with murder” sin cu Reino ta actua contra dje.

AP: Kico tin cu cambia pa Pueblo por haya e confiansa cu e siguiente gabinete cu goberna nos pais no lo abusa di fondonan publico?
XM: Pueblo mester bay vota mas consciente. E ta bisto cu esnan cu den campaña electoral ta parti gadgets caro y ta tira fiesta na grandi cu dj di moda despues lo ta esnan cu mas probablemente lo derocha fondo publico. Tin leynan pa evita abuso, pero Pueblo mester scohe hendenan cu ta tene nan mes na ley, alcontrario ora cu nan yega na poder nan lo trapa riba ley y haci deshaci perhudicando e mesun Pueblo cu a confia den nan.

Expresionnan haci den e articulo aki no necesariamente ta refleha opinion di ArenaPoliti.co