Perspectiva Independiente without background 001

Booshi Wever tocante prioridad #1 di UPP: Good Governance

Booshi03
For di 2013 caba partido UPP continuamente ta papia y scibi tocante introduccion di reglanan di Good Governance. ArenaPoliti.co a tuma contacto cu e lider di UPP, sr. Booshi Wever, pa haya informacion concreto tocante e reglanan di Good Governance cu UPP kier pa wordo implementa na Aruba.

Riba e pregunta si ta corecto pa bisa cu Good Governance ta prioridad #1 di UPP, sr. Wever ta contesta: “Sigur cu por bisa cu esaki ta prioridad nr. 1, mirando cu defacto UPP ta considera cu tur problema cu nos pais ta pasando aden, ta relata na e falta di reglanan di Good Governance. UPP a presenta durante eleccion 2013 un programa cu diferente puntonan crucial cu nos ta kere cu mester ta base pa trece e cambionan necesario den gobernacion na Aruba.”

Compromiso Nacional
Sr. Wever tambe a elabora riba intentonan cu UPP a haci pa, hunto cu otro partidonan politico, presenta pueblo reglanan concreto di Good Governance:
“Na 2014, durante e famoso welga di ensure, y na september di aña pasa, UPP a purba na uni e partidonan politico aki na Aruba, pa nos por wak den un solo direccion. Nos a presenta un documento cu mester a sirbi como un documento di discusion, yama “Compromiso Nacional” cu e intencion pa hustamente puntonan esencial pa Good Governance por wordo logra como compromiso di tur partidonan politico na Aruba y ofrece asina e pueblo di Aruba y electorado un alternativa cu nan por kere atrobe den politica. Lastimamente nos por a constata cu practicamente ningun partido no a mustra interes den e intentonan aki.”

Reglanan concreto
Booshi Wever a bay mas den detaye, mencionando reglanan concreto cu UPP kier implementa:
  • Depolitisa nombramento di ambtenaar
  • Cambia ley di comptabilidad
  • Mara debe nacional na un maximo den nos constitucion
  • Ley pa reglamenta partidonan politico
  • Codigo di comportacion pa tanto parlamentario y ministernan
  • Obligacion pa ministernan contesta parlamento den un tempo corto (48 ora)
  • Informacion transparente di gastonan di gobierno, incluyendo salarionan (ya cu ta pueblo ta esun cu ta paga)
UPP tambe ta di opinion cu nos sistema di representacion democratico parlamentario y sistema di votacion mester conoce cambionan.
160305 GG UN

ArenaPoliti.co
a puntra pa ehempelnan concreto cu a y ta tumando luga na Aruba, den cua reglanan di Good Governance lo por percura pa un cambio positivo.
Booshi Wever: “Concretamente nos por menciona e.o. proyectonan di green corridor, renovacion y expansion di hospital, hedging di prijs di fuel pa WEB, liña di gas for di un compania priva pa WEB, permisonan pa cambio di bestemming di tereno cu no ta cumpli cu ley, boycott di proyectonan di un gobierno anterior, manera proyecto di DUMP (unda atrobe e compania cu a realisa e proyecto a bolbe gana un caso contra gobierno), proyecto di IMSAN pa un cardiologisch centrum unda cu materialnan ta keda putri pa capricho. Y tambe nombramento di diferente directornan of personanan den funcionnan clave, sin tin un open solicitatie. Aki ta unda cu partido na mando ta mas concentra riba pone su pionnan cu por sirbi interes di partido enves di esun di Aruba.”

Representacion necesario
E clima politico di Aruba ta haci’e dificil pa un partido ‘chikito’ realisa cambionan substancial den e forma con nos pais ta wordo goberna. Cu e realidad aki den mente, ArenaPoliti.co a haci sr. Wever e siguiente pregunta: Con UPP, como un partido ‘chikito’, por realisa introduccion di reglanan di Good Governance?
Booshi Wever: “Pa UPP por introduci e reglanan di Good Governance, ta esencial pa UPP haya e representacion necesario unda cu e por presenta of traha na realisacion di esakinan. UPP ta consciente cu ta poco dificil pa den e situacion na Aruba, penetra mey mey di e dos partidonan mas grandi, mirando cu normalmente eleccionnan no ta basa riba issues/topiconan di interes general, sino mas bien ken ta presenta e caranan mas bunita y e show mas impactante of cu por gasta mas placa posibel pa por logra convence e electorado.
Apesar di esaki no ta kita afo, cu desde 2013 partido UPP na un forma consistente a keda mustra pueblo y atende nos politiconan, particularmente esnan cu tin un funcion publico, con necesario e introduccion di reglanan di Good Governance ta pa Aruba.”

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.