Glenbert Croes ta contesta.

“Bottomline, kiezersbedrog!”
Segun sr. Croes, eleccion ta un ‘momentopname’ basa riba un oferta electoral, cu ta refleha den programa di partido. Cu e oferta partidonan ta crea un espectativa serca pueblo. E pueblo ta dicidi si nan ta brinda'bo nan confiansa, y e principio di confiansa ta fundamental den tur democracia. Segun sr. Croes pueblo mester tin confiansa den loke bo ta bisa y loke bo ta haci. Loke bo ta ofrece den bo programa di partido durante eleccion mester ta a base di berdad. “Pueblo a vota berdaderamente cu 13 asiento pa AVP, pero e berdad, segun AVP, manera cu nan a present’e den eleccion, a resulta di ta un engaño grandi... e ta un engaño total. Y e ta kiezersbedrog.”

“Dubbel en dwars”
Opinion personal di sr. Croes ta cu AVP, 15 luna despues di eleccion, no ta conta cu e confiansa di e 33.000 votadonan mas. Como ehempel e ta menciona un resultado di e encuesta electoral di ArenaPoliti.co, den cua AVP a keda e partido mas grandi pero bayendo atras di 13 pa 10 asiento. [For di un otro encuesta di ArenaPoliti.co a resulta cu Gabinete Mike Eman II a ricibi un average di '2 strea' (for di 5) pa nan maneho, ehecucion y funcionamento durante aña 2014]. “Y e ta un trend cu ta siguiendo. Pueblo ta sinti nan mes traiciona, laga na caya, ta sinti nan mes engaña door di AVP.” Y segun sr. Croes gobierno ta sigui laga pueblo na caya door di no recapacita, realisa nan foutnan, haci un evaluacion, y corigi pa gana e confiansa bek. “Gobierno di Aruba ta mustrando ‘intent’ pa corigi? No. Esey ta dubbel en dwars... Nan a engaña pueblo… Nan no ta purba corigi tampoco. Anto e ora ey dado momento, den interes general, e gobierno aki mester bay.”

New Management
“Si AVP ta respeta e pueblo aki, e ta entrega retiro di su gabinete y laga e pueblo aki dicidi kende lo mester bay encarga su mes di e responsabilidad di e futuro di Aruba”. Y segun  sr. Croes, 2015 ta e aña cu Gabinete Mike Eman II lo entrega su retiro. “Mi opinion ta cu gobierno di AVP no ta bay wanta e presion di e descontento di e pueblo cu lo wordo manifesta riba caya, y lo entrega retiro.”

Comparando Aruba cu un compania, sr. Croes ta duna e siguiente splicacion: “Un compania a bay failliet. Banco ta pon’e bou curatela. Bo ta laga e mesun management cu a mand’e bancarota eynan? No toch?! Bo mester cambia e management tambe. Esey ta loke mester pasa na Aruba. Aruba a bati bancarota segun maatstaf di IMF, Hulanda a interveni... aworaki CFT tin Aruba bou curatela. Bo no por laga e mesun management, e mesun gobierno cu a hinca nos den e problema aki. Y vooral cu nan ta mustrando cu nan no tin ‘intent’ di corigi.”

Splicando su ponencia cu Gabinete Mike Eman II no ta mustra un intento pa corigi nan errornan, sr. Croes ta bisa: “E medidanan cu nan ta aprobando ta pa schuldsanering? No. E medidanan cu nan ta aprobando ta pa sigura cu nan proyectonan ta bay door. Nan no ta haciendo schuldsanering.”

Political Cosmetics
E combersacion tambe a toca e tema cu Gabinete Mike Eman II mes a haci un peticion na CFT pa un rapport di presupuesto 2015. Glenbert Croes: “All that is political cosmetics. Bottomline ta cu si Aruba no a acepta pa CFT check presupuesto 2015 nan lo a haya otro KB claba riba nan lomba. E cuestion cu nan a yega na un acuerdo cu ta ‘op uitnodiging’ di Aruba nan ta bin, esey ta djies political cosmetics pa haci comosifuera cu, un ta Hulanda ta impone, un ta un KB... nan kier a gewoon evita un KB anto esey tawata e politieke bewoording pa camufla...”

“By the way, nos mester ta un tiki critico riba tur dos gobierno” sr. Croes ta bisa, referiendo na gobiernonan di Aruba y di Hulanda. E ta splica su punto di bista: “Mi kier bise respetuosamente... Ora bo ta’tin un kiezersbedrog di tal magnitud contra e pueblo di Aruba, e pueblo di Aruba aki deserve the real truth. No cu political cosmetics… How painful it may be. Mi ta kere cu e algemeen belang di Aruba no ta gediend, y e Arubaanse bevolking no ta gediend, cu political ambiguity, politieke vaagheid. We need straight talk.”
Sr. Croes ta añadi di a aprecia e 'straight talk' di CFT na Korsou, ora nan a declara cu e problemanan na Aruba ta cinco biaha mas grandi cu e problemanan na Korsou.


Lo bin mas manifestacion e aña aki? MEP lo organisa su propio manifestacion? Tin union entre partidonan den oposicion? Y dicon e manifestacionnan durante aña 2014 no tabata mas grandi? Klik aki pa lesa e di dos parti di e combersacion, den cua Glenbert Croes ta contesta e preguntanan aki, y mas.