Perspectiva Independiente without background 001

E solucion segun Rudy Lampe: Aruba mester integra den Hulanda (Entrevista)

RudyLampe02Durante luna di december di aña 2014 ArenaPoliti.co a tuma nota di dos comunicado di lider di partido Red Democratico, sr. Rudy Lampe. Den e comunicadonan sr. Lampe ta menciona entre otro cu e ta na fabor pa Aruba bira parti di Hulanda, y ta papia di un ‘elite politico’ na Aruba cu ta wordo maneha pa mafia internacional. ArenaPoliti.co a aserca sr. Lampe pa haci algun pregunta basa riba e contenido di e comunicadonan aki.



Elite Politico

ArenaPoliti.co (AP): Den un comunicado (Mensahe di fin di aña) sr. Lampe a bisa cu un elite politico na Aruba ta wordo maneha pa mafia internacional, cu ta controla facilmente e micro-estado pa traficacion di droga y labamento di placa. Na ken sr. Lampe ta referi cu ‘elite politico’?
Rudy Lampe (RL): Na februari 2013 mi a publica un relato cu a sali den e prestigioso revista Der Spiegel, unda dos periodista Aleman a investiga di un forma undercover e ruta di traficacion di cocaina. E ruta principal ta di Colombia pa Aruba, nan a biaha hunto cu un dealer Americano, cu tabata drenta cu badge di APA [Aruba Ports Authority] y sin ningun problema na waf di Aruba, tabata saca cocaina for di container, pone den su pickup y sali trankilamente. Esaki tabata tempo cu e actual Ministro Plenipotenciario na Den Haag tabata director di APA NV y a pesar di mi publicacion nunca nada a wordo investiga. Awor na fin di 2014 ta un periodista Mexicano a publica su investigacion tocante e ruta nautico di narcotrafico y atrobe for di e prome pagina e waf di Aruba ta wordo menciona como esun principal for di Colombia. E capitan di e barco, cu tabata carga di 2258 kilo di cocaina puro, a bisa e periodista cu Aruba ta e waf di mas facil, pasobra douane no ta scan ningun container. En berdad, for di tempo di Minister Rudy Croes y awo bou di Minister Arthur Dowers, e scan di container no ta traha. Mi a denuncia for di basta tempo loke a pasa exactamente cu e container a base di informacion inside cu mi a risibi, pero atrobe ningun investigacion a keda haci. E siman aki a keda publica na Aruba e laso di Jossy M. cu narcotrafico y ta su corant ta kita y pone gobierno. Cu waf di Aruba ta asina importante den e trafico internacional di cocaina no ta posibel sin complicidad di e gobiernonan di Aruba for di momento cu Aruba a haya su Status Aparte.

AP: Sr. Lampe por splica den ki forma mafia internacional ta maneha e elite politico aki?
RL: Si nos mira cuanto placa ta keda inverti den eleccion, no tin otro conclusion cu financiamento di partidonan AVP y MEP ta bin di placa sushi. “En wie betaalt bepaalt”. E votado mag di vota, pero esun cu ta dicidi ta e mafia. For di decada di 90, tempo cu Gabinete Henny Eman tabata goberna, ta riba mesa e ley di financiamento di partidonan politico, y sr. Herdé kende ta lider di fraccion di AVP no tin berguensa di reconoce esaki den e Tripartite cu ta tumando luga na Aruba. Despues na 2007, ora mi mes tabata den Parlamento, mi a presiona pa e ley aki pasa y tabata Gabinete Oduber cu a nenga di pasa e ley aki. Awo riba insistencia di Hulanda e ta wordo discuti, pero AVP y MEP lo haci tur posibel pa traha e ley di tal forma cu e lo keda un “dode letter”.


Autonomia

AP: Ta mustra cu sr. Lampe a perde tur speranza cu un gobierno di Aruba por funciona manera debe ser cu e autonomia cu a wordo obteni na 1986 (Status Aparte). Sr. Lampe ta apoya e decision di Gobierno di Reino pa implementa un Cft permanente pa Aruba y pone asina tanto gobierno como parlamento bou di curatela. Sr. Lampe tambe ta na fabor pa Aruba integra den Hulanda y bira parti di Hulanda al estilo di Martinique y Saint-Martin (French side), cu ta parti di Francia. Esaki lo resulta den un perdida substancial di nos autonomia. Kico ta haci sr. Lampe dispuesto (willing) pa entrega tanto di nos autonomia?
RL: Autonomia nunca ta un meta riba su mes, e ta un medio pa alcansa mas bienestar pa un pueblo. Het is geen doelstelling op zich, maar gewoon een middel. Y a resulta cu e medio aki no ta traha. Prome cu Aruba a haya su Status Aparte, kiermen bou dominio di Corsou ainda, dos salario minimo di un pareha tabata representa 120% di e canasta basico, awo dos salario minimo ta representa 60% di e canasta basico, kiermen e mayoria di e poblacion a bay atras drasticamente bou di Status Aparte. Na 2014, segun declaracion di e presidente di Cft, e finanzas publico di Aruba ta cinco biaha pio cu e situacion di Corsou, anto Status Aparte tabata un medio pa sali for di dominio di Corsou, y bo por bisa nos a sali for di plachi cay den candela. Pakico? Pasobra e politiconan a usa e autonomia pa enrikece nan mes, tur nos politiconan exitoso ta comerciante miyonario sali for di famia pober, cuminsando cu e famia Eman. Minister Otmar Oduber no tin berguensa di bisa cu nos economia ta draai hopi bon, cu e yegada di 1 miyon turista pa aña, pero nos finanzas publico ta na werki. Ora economia ta draai bon y bo finanzas publico ta malo ta un conclusion so tin: e gobernantenan ta horta placa di pueblo y ta malgasta esaki. P’esey e ley di destaho publico ta sigui cu asina hopi buraco den ley pa permiti e enrikecemento di nos gobernantenan. Den Comision di Berdad, di cua mi tabata vice-presidente, mi a descubri e modus operandi di 'bouwfraude': e proyecto no bal e suma cu ta keda paga, es decir ta un forma legal di transferi placa di pueblo pa saconan particular. Ora den ultimo eleccion mi a cuminsa papia di legalisa 'homohuwelijk' y 'cannabis', e dos aspectonan mas famoso di politica Hulandes y riba tur dos topico tabata e prome pais den mundo pa haci esaki, tabata un forma pa aserca Hulanda y prepara e caminda pa integracion di Aruba den Hulanda, pa proteha e placa di e pueblo di Aruba.

AP: Sr. Lampe no ta kere cu tin alternativanan factibel pa yega na solucionnan pa e problemanan cu sr. Lampe ta menciona, cu no ta resulta den entrega di parti di nos autonomia?
RL: Ora cu sr. Glenbert Croes, kende tabata minister den Gabinete Henny Eman y responsabel pa tantisimo proyecto di corupcion, cu a keda documenta den rapport di Rekenkamer di Hulanda, a keda poni riba lista di MEP den eleccion 2013, hunto cu ex-presidente di mi partido Red Democratico kende tanto a lucha contra sr. Croes kende tabata responsabel pa e proyecto di Racetrack cu a costa pueblo 20 miyon dollar, y despues sr. Croes a haya asina hopi voto, mi a perde tur speransa cu nos mes y riba nos propio forza por soluciona e problema di corupcion y malgobernacion.

AP: Den otro palabra, sr. Lampe no ta confia cu, por medio di nos proceso electoral, votadonan Arubiano lo eligi mandatarionan cu lo soluciona e problema di corupcion y malgobernacion, y sr. Lampe si ta confia mandatarionan di Hulanda pa soluciona e problemanan menciona. E conclusion aki ta refleha sr. Lampe su pensamento corectamente?
RL: No ta corecto, loke mi ta bisa ta cu nos Status Aparte y nos sistema como pais autonomo no a produci un sistema di checks and balances, ningun instancia di control ta funciona, especialmente e sistema parlamentario. P’esey mi ta boga pa integra den Hulanda unda lo crea un sistema di checks and balances cu si ta funciona, pasobra tin un control externo, bo Rekenkamer lo cay bou di Rekenkamer di Hulanda, bo Centrale Accountantsdienst lo cay bou di esun di Hulanda, bo Raad van Advies lo cay bou di Raad van State, etc. Kiermen no ta trata di cambia mandatarionan Arubiano pa Hulandes, esunnan Hulandes tambe mester wordo controla, p’esey Brussel [Union Europeo] ta controla Tweede Kamer y Gobierno di Hulanda pa nan respeta norma presupuestario. Un sistema di control externo semper ta mas saludabel, esey ta mi point!

AP: Sr. Lampe ta di acuerdo cu e pueblo Arubiano lo mester aproba cualkier decision pa integra den Hulanda por medio di un referendum?
RL: Por supuesto, hasta Naciones Uni ta exigi un referendum, segun exigencianan bon defini, ora un colonia ta scoge sea pa independencia of pa integracion. Kiermen e referendum solamente por tin dos opcion, segun exigencianan di UN [United Nations]: of bo ta scoge pa independencia of pa integracion.

AP: Sr. Lampe ta di opinion cu e pueblo Arubiano lo ta feliz y satisfecho si Aruba no ta ‘baas den nos mesun cas’?
RL: Felicidad pa mi kiermen cu e pueblo tin pan riba mesa y por biba dignamente como ser humano sin cu tin cu mendiga. E sistema cu a wordo crea ta cu e pueblo tin cu mendiga serca e gobernante pa un trabao den gobierno, un contract, un onderstand, un cas di FCCA, un tereno, etc. Esey no ta biba cu dignidad, e pueblo no ta baas sino ta e gobernante ta baas. Siendo parti di un sistema mas global manera Hulanda y Union Europeo e ciudadano tin garantisa su pan riba mesa sin tin cu mendiga. Esey ta biba cu dignidad, e Status Aparte a trece cune cu e pueblo tin cu biba na rudia y cu su man na laira mirando na halto den wowo di e gobernante-politico. Esey pa’mi ta asina humiliante, tur mainta mi oracion ta consisti di pidi Dios forza pa no baha cabes pa ningun poder di mundo.


AVP/MEP

AP: Bo ta menciona como fuente di e problemanan e partidonan AVP y MEP, y famia Eman y Croes. Como solucion bo ta apoya integracion di Aruba den Hulanda. Ta corecto pa conclui cu bo ta sigur cu AVP y MEP lo keda domina politica na Aruba y cu otro partidonan no lo logra haya sosten di pueblo pa trece cambionan cu lo haci cualkier entrega di autonomia innecesario?
RL: Mi no por lesa kico ta bay pasa den futuro, mi conoce solamente e pasado y e presente, y loke mi conoce ta mustra cu ta dos famia ta domina e politica na Aruba, cu vinculo dudoso, y cu e pueblo ta vota pa dos partido di famia, un famia di 'stad' y un famia di 'campo', dos clan cu ta odia otro sin tregua. Esaki ta algo unico den Caribe, mi no conose un otro caso asina den Caribe, ta na Aruba so tin un sistema bipartidista cu partido di famia. Mi no sa si tin di haber cu nos pasado indjan unda e interes di e cacique cu su clan ta bin na prome luga. Mi experiencia den Comision di Berdad a yuda’mi comprende con e sistema ta funciona na Aruba: MEP ta busca prueba pa blackmail AVP y AVP ta busca prueba pa blackmail MEP y mientras tanto ningun ta dispuesto pa sera un politico corupto, zo wordt het systeem in stand gehouden.


**Si bo a wordo menciona/acusa den e articulo aki y bo kier manda un reaccion, manda un email pa This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.