Si gobernador no firma presupuesto 2017....
Parti di un entrevista cu lider di MEP, parlamentario Evelyn Wever-Croes
Na diferente ocasion Gabinete Mike Eman II a ‘clash’ cu Gobierno Hulandes. Uno tawata ora Gobierno Hulandes por medio di un koninklijk besluit (KB) a instrui gobernador di Aruba pa no firma un presupuesto, resultando den e welga di hamber. Un otro tawata ora Gobierno Hulandes no a acepta e proposicion di Gabinete Mike Eman II (GME II) pa e proximo gobernador y a nombra un otro persona (sr. Alfonso Boekhoudt). Durante ambos impasse prome minister Mike Eman a reclama MEP y su lider sra. Wever-Croes pa no sostene GME II contra Hulanda. Segun sr. Eman ta trata di casonan den cua Gobierno Hulandes no a respeta e autonomia di pais Aruba. Momentonan cu, segun prome minister Eman, partidonan den oposicion mester a pone diferencianan un banda y para banda di su gabinete.
Actualmente tin speculacion riba firmamento di presupuesto 2017. Nos no ta bay asina leu di asumi cu lo bin un otro impasse riba presupuesto 2017, pero pa haya un miho idea di e punto di bista di MEP riba e tema aki, ArenaPoliti.co a puntra lider di MEP Evelyn Wever-Croes ki posicion MEP lo tuma si presupuesto 2017 resulta den un otro KB, y si prome minister Mike Eman lo haya sosten for di su partido.
Autonomia of mal maneho
Wever-Croes: “Si ta autonomia, e por conta riba nos. Si ta su mal maneho e no por conta riba nos.” Sra. Wever-Croes ta splica cu MEP a vota contra presupuesto 2017 pa dos motibo principal. E prome motibo ta cu e presupuesto no ta realistico. Sra. Wever-Croes ta mustra cu no ta MEP so a conclui esaki, pero tambe Raad van Advies y CAft, y ta referi na e diferencia entre e porcentahe di crecemento economico cu Aruba lo experiencia segun Gabinete Mike Eman II y e porcentahe mas abou segun Banco Central.
Sra. Wever-Croes ta bisa cu politiconan di AVP ta yame “negativo” pa no tin e confiansa cu economia ta bay crece cu 5% manera Gabinete Mike Eman ta pronostica, mientras cu Banco Central ta pronostica un crecemento mas serca di 3 porciento. “E no ta un cuestion di confiansa of optimismo, e ta un cuestion di realistico of no-realistico.”
“Si berdad bo ta defende nos autonomia, bo ta zorg pa bo tin un maneho financiero drechi.” — Evelyn Wever-Croes
Despues di elabora riba con (i)realistico e presupuesto ta, sra. Wever-Croes ta bisa: “Si ta pa e mesun motibo Cft ta bin bisa cu e no ta realistico… e ora mi tin cu bay bringa cu’bo [Mike Eman] pa autonomia? Ma bisa’bo di antemano.” Sra. Wever-Croes ta duna mas motibo pakico MEP a vota contra e presupuesto, principalmente cu e presupuesto no ta refleha e “right priorities.” E parlamentario ta menciona cu GME II a aumenta e presupuesto cu 63 miyon Florin y a aumenta e cantidad di placa pa ‘pers en voorlichting’ cu 11%. E parlamentario ta di opinion cu e aumentonan aki tin mas di haber cu e campaña electoral cu ta na caminda y no pa motibonan hustifica.
Pues segun sra. Wever-Croes, si ta pa e mesun motibonan aki Hulanda duna un otro KB y gobernador no firma e presupuesto, e no tin nada di haber cu autonomia. “Si berdad bo ta defende nos autonomia, bo ta zorg pa bo tin un maneho financiero drechi. Bo ta zorg pa bo tin orden den e desorden financiero.”
Wever-Croes ta añadi: “Mi no sa si ta bin un KB. Mi ta spera cu no bin un KB paso tanto drama nos no mester na Aruba tampoco.” Tambe e lider di MEP no ta exclui sosten pa sr. Eman bou di tur circunstancia: “Si mester bin un KB ariba otro gronden, cu mi no conose,.. y mi ta weita cu e tin di haber cu cosnan autonomo, anto e ora eynan e por conta riba mi sosten.”
Gobernador
Sra. Wever-Croes ta conta di otro instantenan caminda Gobierno di Aruba a ‘clash’ cu Gobierno Hulandes. E ta conta cu tempo cu ex-prome minister Nelson Oduber (MEP) a propone sr. Fredis Refunjol como gobernador, Hulanda no tawata di acuerdo y tawata kier pa sr. Oduber manda mas nomber. Un situacion similar na e inicio di e proceso di nombracion mas recien, tanto den e proposicion di un minister como gobernador (Refunjol/Bermudez) y e reaccion inicial di Hulanda. Sra. Wever-Croes ta conta cu, contrario na sr. Eman, sr. Oduber strategicamente a keda manda Hulanda mas nomber, manteniendo su escogencia (Refunjol) como e candidato ‘miho’ pa e posicion di gobernador y a keda defende su escogencia. Un escogencia cu Gobierno Hulandes a acepta na final di e proceso.
“Bo ta lucha p’e. Bo no ta pleita p’e.” — Evelyn Wever-Croes
Segun Wever-Croes, e forma con prome minister Mike Eman ta trata desacuerdonan cu Hulanda ta “how not to do it.” For di e manera cu sra. Wever-Croes ta papia di e forma con Betico Croes, Nelson Oduber y Mike Eman a trata nos autonomia, ta resalta cu e ta inspira door di e ex-lidernan di MEP, mientras cu e no ta impreciona cu sr. Eman. Wever-Croes riba autonomia di Aruba: “Bo ta lucha p’e. Bo no ta pleita p’e.”
Sra. Wever-Croes ta duna sr. Eman parti di e culpa pa loke a pasa cu nombracion di nos proximo gobernador, pa motibo di e forma cu sr. Eman a trata e proceso di nombracion. Na mesun momento e lider di MEP ta bisa: “Loke Hulanda a haci no ta bon. Ami no por sostene Hulanda den loke nan a haci. E ta ‘not done’ cu Hulanda ta scoge candidato di gobernador pa Aruba… y esey m’a bisa nan tambe; cu MEP den gobierno bo no ta bay pasa e cosnan ki. E cosnan ki bo no ta bay logra nan.”
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...