Perspectiva Independiente without background 001

Minister Schwengle riba uso medicinal di cannabis: “Mi no ta un fan pero mi ta mira potencialnan pa usele”

AlexSchwengle01
E idea pa legalisa uso medicinal di cannabis ta hayando mas y mas sosten na Aruba durante e ultimo añanan. Manera conoci, na 2013 e tema di legalisacion di cannabis medicinal y recreacional tawata un punto principal di e campaña di partido RED, e tempo ey lidera pa sr. Rudy Lampe. Mas prome cu esey, e persona proponi pa ta e siguiente lider di RED, sr. Ricardo Croes, sr. Ricardo Croes ya caba a inicia e tema y despues a bira candidato number dos riba lista di RED pa eleccion 2013. 
 
Den comunidad por nota cu e pensamento riba uso di cannabis a cambia compara cu algun aña pasa. Especialmente pa loke ta trata uso medicinal. E tema a bolbe haya mas atencion ora parlamentario Glenbert Croes (MEP) algun luna pasa a recomenda pa considera legalisacion di uso medicinal di cannabis.
 
Recientemente ArenaPoliti.co a tuma contacto cu e minister encarga cu salud publico, cuido di nos grandinan y deporte, sr. Alex Schwengle (AVP), pa haya sa su punto di bista riba uso medicinal di cannabis. 
 
 
No smoking 
Minister Schwengle, alabes dokter specialista di pulmon, ta cuminsa na defini di ki tipo di uso exacto nos ta papiando. “Mi no ta kere den introduccion di humamento di cannabis bou e capa medicinal paso ta bay tin mal uso di dje y pa colmo mi no ta believe den e humamento. Bo ta bay daña bo pulmonnan enormemente cunele.”
 
Pa loke ta trata azeta di cannabis, minister Schwengle tin un diferente opinion, tanten cu ta trata di azeta di cannabis “bon traha cu no tin e verslavingsmiddel den djele.” Cu ‘verslavingsmiddel’ sr. Schwengle ta referi na THC cual ta e constituyente psico-activo principal den cannabis.
 
“Ta hopi importante pa sa ken y con y na unda nan ta traha e azeta, paso bo tin diferente hende ta haciendo e, hopi hende ta haci’e ilegal y bo no sa kico bo tin den e producto e ora. Esun traha na e manera corecto pa propositonan medicinal… mi no ta un fan pero mi ta mira potencialnan pa usele.” 
 
Minister Schwengle ta splica pa ki motibonan medico e ta wak potencial, mencionando e uso como ‘pijnmedicatie’ pa pashentnan bou tratamento oncologico cu hopi dolor, y tambe den casonan di epilepsia.
 
“Tin research andando pa wak berdad berdad ki ta su balor adicional, y pa compar’e tambe cu otro metodonan di tratamento, pero te ainda ta mustra basta positivo. Pero tanten cu bo ta haci’e na un manera adecuado si.” 
 
“Mi no ta un fan pero mi ta mira potencialnan pa usele.”
 
Conseho profesional
Segun e minister e peticion pa introduccion di cannabis medicinal mester bin principalmente via dokternan. Minister Schwengle ta enfatisa e aspecto di conseho profesional, mencionando e comision di oncologia di Aruba, AZV y AGA (un comision cu ta duna conseho na minister riba remedi). “Si e advies ta positivo e ora minister ta gewoon firma y ta bay di acuerdo. Si e advies ta negatief claro mi ta bisa mi no ta firme.”
 
Sr. Schwengle ta elabora mas riba e proceso pa introduci un medicina na Aruba y ta splica cu instancianan na Aruba ta depende riba research di otro pais. “E mester ta safe, e mester ta efectivo y e mester ta pagabel. Eseynan ta algun di e criterionan cu nos ta usa pa introduci un medicina den e pakete di medicina y cu e ta wordo vergoed. E no ta keda na Gobierno pa haci esey. Gobierno ta haci uso di otro instancianan. Na Aruba nos ta mucho chikito, nos no tin un ‘kwaliteitsinstituut’ grandi cu bo por bisa cu nos mes ta haci research. Nos no tin e facilidadnan ey. Pues anos ta haci uso di e sabiduria di otro pais na por ehemplo Europa y Noord America.” 
 
 
Morfina
Segun minister Schwengle, e tin su punto di bista riba e tema aki pa basta tempo caba. “Ik ben al lang klaar met dit thema. Ami si ta haya cu si tin suficiente bewijs cu e ta veilig y cu e por wordo usa na un manera responsabel, anto cu bo ta use solamente como algo medicinal, y e ta wordo prescribi door di profesionalnan pa cierto indicacionnan so, ami no ta kere cu ta bay tin problema.”
 
E minister ta haci un comparacion cu e uso medicinal di morfina, cual ta un droga cu ta wordo usa den hospital tur dia bou di regulacion stricto. Un proceso cu, segun sr. Schwengle, ta funciona bon. E minister ta conta cu leu a leu por tin un discrecion cual ta wordo atendi di biaha, pero den mayoria caso e proceso ta bay ‘netjes.’ Minister Schwengle ta wak un sistema similar pa uso medicinal di cannabis.  161208 laboratorio
 
Politiek vervuild 
Segun minister Schwengle e ta un tema hopi discuti den politica, pero no na un manera corecto. 
“Nan a ‘politiek vervuil’ e tema. Sinembargo e tema no mester ta un tema politico. E mester ta un tema di medicina.” Minister Schwengle ta elabora: “Bo ta haya un paar di guynan masha straño mes cu riba cierto canalnan a bay haci propaganda di humamento di marijuana cu tur e co’ney, sinembargo esey ta a base di nada. Y esey mi ta haya hopi peligroso paso nan ta bay propone cu nan ta experto. Ja, nan ta experto den humamento di marijuana. Esey no ta nifica cu nan sa tur cos y kico e efectonan ta bay ta.”
 
Durante e combersacion cu sr. Schwengle, e minister na diferente ocasion ta duna su punto di bista riba con e tema di cannabis a wordo trata na Aruba. E ta di opinion cu politica a stroba e proceso di evalua introduccion di cannabis medicinal. “Niun hende kier a toca e tema paso un cierto politico a core campaña cune, pero na un manera no corecto, sacando yen cos for di contexto, jammer genoeg. Un banda mi ta compronde su punto di bista pero di otro banda mi ta kere cu e no a haci’e na e manera corecto.”
 
Referiendo na e proposicion di partido RED pa legalisa uso recreacional di cannabis, minister Schwengle ta menciona loke e ta considera e droga mas ‘grandi’ den mundo: alcohol. E ta di opinion cu na Aruba nos no tin un bon control riba uso di alcohol, y hopi abuso di alcohol ta tuma luga. “Ami ta kere ta hopi mas miho pa nos bin cu un sistema di educacion mas fuerte prome, siña nos hubentud kico ta droga y con pa anda cu esaki, prome cu bo ta bay introduci un di dos of un di tres of un di cuater droga den comunidad. Mi no ta kere cu esey ta algo cu bo mester haci ‘zomaar.’ Bo mester pense hopi bon y jammer genoeg... door di e campaña politico ey mes [RED] a bin hopi retraso paso niun hende kier a toca e tema mas e ora di uso medicinal di cannabis. Spera e biaha’ki e politiconan respeta e profesionalnan y laga nan haci nan trabou, anto na momento cu nan ta cla pa duna un advies nan lo dunele, anto na e momento ey, claro, si tin algun desacuerdo semper mag di haci pregunta y mester por tene un discusion na un nivel profesional. Pero mi no ta kere cu esaki ta un tema pa hunga politica cunele.” 

“... e tema no mester ta un tema politico. E mester ta un tema di medicina.” 

Urgencia 
Na Aruba basta pashent ta haci uso di azeta di cannabis. Contrario na paisnan cu a legalisa y regula e uso y ta controla e calidad di e azeta di cannabis, na Aruba mayoria biaha pashentnan no sa kico exactamente nan ta haya. Considerando esaki, ArenaPoliti.co a puntra minister Schwengle si no tin un urgencia pa regula e uso medicinal di cannabis. 
 
Minister Schwengle no ta di acuerdo. “Urgencia mi por compronde pero esey no ta nifica cu bo tin cu kibra ley. Esey no ta nifica cu bo tin cu haci un trabou mucho lihe. Bo mester haci bo trabou debidamente. Tin biaha bo ta haya duele berdad cu esun cu ta sinti e urgencia, pero… sopi pura ta sali salo. Si bo rush e trabou y bo no haci’e bon, bo ta bay tin problema despues den bo ehecutacion.”

E minister di salubridad ta sigui splica cu ‘huiswerk’ mester wordo bon haci y mester ta bon documenta, tambe pa evita disputonan politico. 
“Mi ta boga si, na tur politico, please laga e profesionalnan haci nan trabou. Y nan ta bay haci’e debidamente, mi tin confiansa den esey. Y na momento cu nan tin nan advies lo mi tende di nan. Mi no ta kere cu e ta bay tarda mucho mas cu un aña. Esey ta depende tambe di con nan laga nan haci nan trabou. Y nogmaals, e retraso, helaas mi tin cu bisa, a bin vooral door di e politiconan mes cu ta hunga wega cu tur sort’i tema pa algun voto, y esey ta di lamenta.”
 
“Mi ta boga si, na tur politico, please laga e profesionalnan haci nan trabou.” 

Gabinete Mike Eman  
ArenaPoliti.co tambe a puntra si den Gabinete Mike Eman II tin resistencia cu lo stroba e proceso di legalisa cannabis medicinal den e caso cu e consehonan cu minister Schwengle ta wardando ta positivo. Segun sr. Schwengle esey no ta e caso. E minister tambe ta splica un declaracion di minister di husticia Arthur Dowers. Minister Dowers a expresa di ta contra legalisacion. Segun minister Schwengle, minister Dowers su declaracion ta un reaccion riba e proposicion cu ta inclui legalisacion di uso recreacional tambe. “Ami tampoco no lo bay di acuerdo cu e parti recreacional. Tot nader orde niet. Pero e parti medicinal estricto, cu bo ta papiando di e azeta, cu e ta strictamente algo como remedi, esey ami como dokter ta bisabo cu mi no tin problema cu esey. Tanten cu e advies bin cu di berdad e ta safe pa usa y e tin su efecto, cu su indicacion ta cla, anto si AGA ta di acuerdo y nan duna nan bon advies cu nos por introduci e remedi aki safe den pueblo, y nos por control’e debidamente, mi no ta kere e ora ta bay tin problema.”
 
 
ArenaPoliti.co tambe a combersa cu lider di MEP sra. Evelyn Wever-Croes riba e tema di cannabis medicinal. Klik aki pa lesa e punto di bista di sra. Wever-Croes.
 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.