E idea pa legalisa uso medicinal di cannabis ta hayando mas y mas sosten na Aruba durante e ultimo añanan. Manera conoci, na 2013 e tema di legalisacion di cannabis medicinal y recreacional tawata un punto principal di e campaña di partido RED, e tempo ey lidera pa sr. Rudy Lampe. Mas prome cu esey, e persona proponi pa ta e siguiente lider di RED, sr. Ricardo Croes ya caba a inicia e debate publico riba e tema, y despues a bira candidato number dos riba lista di RED pa eleccion 2013.

Den comunidad por nota cu e pensamento riba uso di cannabis a cambia compara cu algun aña pasa. Especialmente pa loke ta trata uso medicinal. E tema a bolbe haya mas atencion ora parlamentario Glenbert Croes (MEP) algun luna pasa a recomenda pa considera legalisacion di uso medicinal di cannabis.

Durante un entrevista cu lider di MEP sra. Evelyn Wever-Croes, ArenaPoliti.co a haci uso di e oportunidad pa haya sa si e tema a wordo discuti den partido MEP, y kico su pensamento ta riba e tema aki.


Alivio
E lider di MEP ta conta cu e tema a wordo papia den partido. “Contal cu e ta pa uso medicinal, nos ta eens cun’e.” Sra. Wever-Croes ta añadi cu “mester bin cu regla y rekisito si.”

“E ta mehora bo calidad di bida, e ta haci’e mas ‘draagbaar’ pa’bo y bo famia.”

Sra. Wever-Croes ta duna un ehempel cu ela experiencia di cerca. E ta conta di su ruman cu a fayece di cancer. “Cannabis oil a dune’le un alivio hopi grandi… E tawata tin hopi dolor, y cannabis oil a yud’e. Anto e ora ken ami ta pa bisa pa no haci’e?” Segun sra. Wever-Croes tin mas ehempel similar na Aruba. “E ta mehora bo calidad di bida, e ta haci’e mas ‘draagbaar’ pa’bo y bo famia.”

E lider di MEP ta menciona cu nos ta haci uso di otro droga manera morfina caba, cu ta algo cu por mata’bo si bo haya dimas. Segun sra. Wever-Croes nos no mester ta hipocrita. “Basta cu e ta gecontroleerd y bo tin’e bon bou control, ami no ta weita problema.” 


Uso recreacional 
Sra. Wever-Croes no ta na fabor di uso recreacional di cannabis. E ta splica cu mayornan tin hopi reto caba ora ta trata di cria nan yui. E ta considera e ilegalidad di uso recreacional di cannabis un sosten pa un mayor. “E ta un ‘steun in de rug’ ora cu cosnan ta ilegal. Ora algo ta ilegal bo tin un steun pa bo por nenga bo yuinan di haci’e.”  E ta duna un ehempel di un mucha di 16 aña di edad cu kier core auto y ta splica cu un mayor ta haya sosten den e hecho cu esey ta ilegal y ora e hoben haci 18 aña e por haal su rijbewijs y core auto.

“Ban paso pa paso. Awor’aki e necesidad pa legalisa uso medicinal… e necesidad t’ey na Aruba.”

ArenaPoliti.co ta mustra riba e punto cu den caso di legalisacion di uso recreacional di cannabis tambe lo keda ilegal pa esnan bou di 18 aña di edad haci uso di dje.
Sra. Wever-Croes ta duna di conose cu e ta compronde e diferencia den responsabilidad ora un mucha bira adulto. Por nota cu sra. Wever-Croes ta cambia e scenario familiar pa un perspectiva mas gubernamental y ta mustra cautela cu legalisacion di uso recreacional di cannabis y aceptacion di pueblo. “Ban paso pa paso. Awor’aki e necesidad pa legalisa uso medicinal… e necesidad t’ey na Aruba. E Rubiano ta pidi p’e. Wel, ban dun’e.”

Kedando riba e tema di uso medicinal, e lider di MEP ta conta cu, door cu na Aruba e ta ilegal, e prijs riba e ‘black market’ por ta hopi caro y pa motibo cu no tin control un pashent no sa kico e ta haya. Sra. Wever-Croes no ta haya husto cu un persona cu ta hopi malo caba ta paga tur lok’e e tin pa despues haya un producto cu kisas no ta azeta di cannabis of ta inferior di calidad. “E no ta fair. Y esey ta un otro motibo pa legalis’e.”


ArenaPolit.co tambe a combersa cu e minister encarga cu salud publico, sr. Alex Schwengle (AVP), riba e tema di cannabis medicinal. Klik aki pa lesa e punto di bista di minister Schwengle.

Expresionnan haci den e articulo aki no necesariamente ta refleha opinion di ArenaPoliti.co