Den un articulo anterior lider di PPA, sr. Benny Nisbet, a elabora riba diferente vision di PPA. Visionnan cu, segun sr. Nisbet, ta visionnan cu PPA a presenta prome. Den e segundo parti di e entrevista cu ArenaPoliti.co, e lider di PPA ta duna un splicacion di e vision pa haci Aruba un ‘Hub Internacional’. Sr. Nisbet tambe ta contesta e pregunta di riba ki termino e plan aki por wordo realisa, teniendo cuenta cu e situacion financiero y economico di pais Aruba.

Aruba como Hub Internacional 

“Atrobe nos a worde ridiculisa pa varios contrincante politico cu esaki PPA ta soña den dia cla. Sinembargo PPA a sigui cu presenta e vision aki eleccion tras di eleccion.”

Sr. Nisbet ta delinea pasonan cu PPA ta kere cu por contribui na haci Aruba un ‘Hub Internacional’:

1. Construi un Aruba World Trade Center! Esaki un AWTC combina cu un Universidad internacional cu e facultadnan e.o. di  idioma y IT y dos business hotels! Un facilidad asina lo por bira un posibel pilar economico den futuro
2. Implementa un ‘strategia nobo’ pa desaroyo di nos Free Zone na Barcadera.
3. Aeropuerto di Aruba como ‘hub di pasahero y mas accento tambe riba ‘freight’  esaki p/m di tratadonan di aviacion y expancion di nos facilidadnan di nos aeropuerto.
4. Expande nos fascilidad di telecomunicacon y purba haci Aruba un HUB riba tereno di telecomunicacion den Caribe stimulando inversion den proyecto cu lo contribui na e vision aki.
5. Crea un  industria di ‘Ship-building, Ship-maintenance y otro servicionan’ tambe posibel inversion den un ‘Containerhaven’ cu ta dirigi riba servicio pa containernan cu ta destina pa otro pais/port den region cu no por ricibi e barconan mas grandi esta e ‘post Panama vessels’ e ultimo aki PPA ta mira posibel den haf di San Nicolas. No cab’e duda cu e proyecto di e CITGO-upgrader lo por stroba ehecucion di parti di e vision aki pero ainda PPA ta mira un parti posibel lo mester yega na un otro entendimento cu CITGO riba uso di e haf di San Nicolas!
6. PPA pa añas ta kere den establecimento di un compania regional di television cu lo por  proyecta noticia y informacion for di diferente isla y pais den region pa henter Caribe.

“PPA pa añas ta kere den establecimento di un compania regional di television cu lo por  proyecta noticia y informacion for di diferente isla y pais den region pa henter Caribe.”

E tempo cu lo tuma pa realisa e vision, considerando e situacion financiero y economico di Aruba 
Benny Nisbet: “E vision di PPA pa haci Aruba un ‘hub internacional’ ta un vision pa entre ocho pa dies aña di gobernacion. E situacion financiero caotico di Aruba ta un estorbo pero PPA no ta mira cu esaki ta haci ehecucion di nos vision como imposibel.” Nisbet ta splica cu lo mester cuminsa cu un estudio y preparacion cu lo tuma un aña pa un aña y mey. E decisionan y maneho pa ehecuta e vision lo por inicia parcialmente for di e prome dia y lo wordo expandi despues cu e estudio a tuma luga.

Sr. Nisbet no ta exclui cu lo ta miho pa ehecuta cierto parti di e vision aki como proyecto ‘ppp’ (public private partnership). “Aki nos ta referi specificamente na e inversion y planificacion di e ‘edificio y infrastructura’ di e proyecto un Aruba World Trade Center.  Pa loke ta trata e exploitacion, PPA ta di opinion cu esey mester ta den man di sector priva, pero bou di cierto condicion y control.”Pa logra esaki lo mester crea mas inversion iniciando door di baha gasto y crea e espacio financiero pa gobierno por ta participante den un esfuerso asina pero na un forma responsabel.”

“E vision di PPA pa haci Aruba un ‘hub international’ ta un vision pa entre ocho pa dies aña di gobernacion.”

 
Sector Turistico 
Pa loke ta trata Aruba su sector turistico, Benny Nisbet ta enfatisa PPA ta di opinion cu Aruba mester ‘upgrade’ nos producto turistico y cu nos mester diversifica nos mercado turistico. Sr. Nisbet ta duna ocho punto cu PPA ta considera necesario pa mehora nos producto turistico: 

1. Inversion den nos haf di Oranjestad cu bista riba expancion di nos ‘turismo crucero’.
2. Upgrading di nos producto turistico por medio di inverti den un ‘golfcourse internacional’ y tres hotel na San Nicolas den cual un lo mester ta un Hotel Spa.
3. PPA tabata e prome  partido politico cu un tres/cuatro eleccion atras a presenta e vision y accentua necesidad pa dedica atencion na ‘Health & Wellness tourism’ cu a worde rechasa como alternativa pa diferente signatura politico. Ultimo awo ta mustra e tendencia di kier accepta ‘Wellness’ locual ta positivo pero PPA ainda tin nos confianza cu un bon estudio y un cooperacion entre sector di turismo y salud publico cu lo por ofrece nos bishitantenan un servicio medico riba e tereno aki tambe.
4. PPA ta kere den ‘MCI tourism’ cu accento riba convention tourism den cual Aruba lo por hunga un rol importante.
5. PPA ta di opinion cu nos producto turistico por worde expande cu atencion na ‘San Nicolas, Our Caribbean Town’ na un forma serio!!
6. PPA ta di opinion cu e niche di ‘yachting’ lo por ta un niche for di cual Aruba lo por cosecha.
7. PPA ta kere tambe den mercadea Aruba mas como ‘shopping destination’.
8. Lo mester dedica atencion na duna nos ‘capital Oranjestad’ e luga/posicion cu e merece dentro di nos vision economico.

Terminando sr. Nisbet ta añadi: “Tur e posibel alternativanan aki lo tuma tempo, energia y inversion y ta for di un vision di mas aña y teniendo na cuenta nos espacio financiero confrontando nos crisis financiero pero na mes momento siguiendo cu un maneho economico responsabel y dinamico.”  

Expresionnan haci den e articulo aki no necesariamente ta refleha opinion di ArenaPoliti.co