Durante un entrevista cu e lider nobo di partido ReD, sr. Ricardo Croes, ArenaPoliti.co a puntra kico e ideologia di partido ReD ta. Ricardo Croes a duna un splicacion amplio riba e pregunta aki.


Derecho di hende 
Ricardo Croes: “Partido RED ta kere den derecho di hende.” Ricardo ta splica cu e ser humano ta esun prome yama, no solamente pa carga responsabilidadnan di su persona, den e calidad di e persona cu e ta, sea ta mama, tata, educador, gobernador etc., pero tambe e prome yama den carga responsabilidad en general. Sr. Croes: “Nos tur ta parti di e isla aki. Tur ciudadano ta parti di un comunidad. E responsabilidad di e comunidad no ta sinta serca e gobernantenan so. Den e sentido aki, pa partido RED, e ser humano ta e centro di tur locual nos kier haci, tur locual nos ta papia di dje.”

“E hende tawata nos center point, no e cannabis.”

Sr. Croes ta duna dos ehempel pa ilustra con ReD ta pone e ser humano central. Referiendo na dos tema principal di ReD na 2013, sr. Croes ta splica: “Ora nos a papia di cannabis, nos a papia di cannabis den un sentido di hendenan malo, cu malesanan incurabel, cu ta wordo trata den un forma insatisfactorio, cu cannabis lo por yuda. E hende tawata nos center point, no e cannabis. E hende. E calidad di bida di e hende. E trato cu e hende ta hayando.”

E lider di ReD ta duna e di dos ehempel: “Ora nos a trece padilanti e parti di geregistreerd partnerschap… nos no tawata mira at all e sexo di hende como e center point, sino e hende ariba su mes.”

 
Constitucion 
Siguiendo riba e tema di derecho humano, sr. Croes ta referi na nos constitucion: “Nos constitucion, prome articulo, ta bisa bo no ta discrimina niun hende a base di sexo, religion, rasa… Esaki ta e ponencia di partido ReD: ora bo ta papia di derecho humano, bo color di bo cuero, bo color di bo wowo, bo color politico, bo preferencia sexual, bo situacion fisico, bo situacion mental, bo estado civil, bo estado social, niun di nan mag ta un motibo pa discrimina’bo den niun forma. Esey no ta e caso na Aruba. Absolutamente cu no.”

“Imagina’bo cu un tata tin cu bay haci vandalismo, skirbi tur caminda pro pedofiel, pa haya derecho...”

Miho trato 
E lider di ReD ta menciona diferente grupo den sociedad cu segun ReD merece un miho trato. Ricardo tocante pensionado: “Nos pensionadonan, nan pension, pa mayoria e no ta yega.”
Hubentud: “Wak e muchanan. Wak deporte, wak arte, musica, unda nan ta? Unda e estimulo di gobierno ta pa cu esey? Ami no ta wak e. Bo sa kico mi ta wak? Problema di gang. Esey mi ta wak nos tin bastante.”
Enseñansa: “60% di e pais ta riba un algemene minimum loon cu no ta yega pa nada. Studiamento ta pa hende rico, ta pa hende cu placa. Asina mes gobierno tin curashi di permiti cu scolnan ta pidi un verhoging di e schoolgeld… Mester a bay corte pa juez dicta cu esaki tawata responsabilidad di gobierno.”
Cuido medico: “Derecho humano ta duna derecho riba trato medico. Tur hende sa cu na Aruba, nos trato medico a bay atras.”
Persona cu handicap: “Niun hende no ta tene cuenta cu nan,” referiendo na e falta di acomodacion na luganan publico pa esnan handicap.
Derecho di mucha: “Imagina’bo cu un tata tin cu bay haci vandalismo, skirbi tur caminda pro pedofiel, pa haya derecho…. Ami ta cansa di wak derechonan di hende wordo trapa ariba e isla aki.”

“Nos no ta pretende manera por ehempel nos gobierno cu ta papia di ‘cristian-democrata’. Nan tin net nada di cristian y net nada di democracia.”

‘Nos no ta pretende’ 
“Mi por bisa varios otro cos cu ta relata cu e ideologia cu tin central e humano, e ideologia di ReD. Nos no tin niun interes si no ‘e hende ta central’. Nos no ta pretende manera por ehempel nos gobierno cu ta papia di ‘cristian-democrata’. Nan tin net nada di cristian y net nada di democracia.” Ricardo Croes ta bisa cu pueblo mester corda cu e gobierno actual kier a introduci scientology na tur scol na Aruba. Sr. Croes ta bisa cu e no ta wak e relacion entre scientology y cristianismo.
Pa loke ta trata democracia, sr. Croes ta referi na e fraccion di AVP den Parlamento, bisando cu “nan no ta sirbi derecho di e hendenan na Aruba. Nan ta sigui gobierno. Esaki ta inaceptabel, pasobra trabou di Parlamento ta pa controla gobernacion.”


Haci un diferencia 
Ricardo ta conta cu e ta un huerfano. Nan tawata cuater ruman y a experiencia temponan dificil. “E experiencia ey mi no por lubid’e. Y si mi no por haci nada cu mi bida, pa mi haci un diferencia, pa mi laga un diferencia atras pa cu e muchanan di futuro, mi no ta kere mi bida ta significa nada.”

Expresionnan haci den e articulo aki no necesariamente ta refleha opinion di ArenaPoliti.co