Perspectiva Independiente without background 001

E motibonan di Andin Bikker pa uni cu Otmar Oduber [entrevista]

AndinBikker03
E siguiente articulo ta e di tres parti di un entrevista cu ArenaPoliti.co a realisa cu parlamentario Andin Bikker na januari 2017.


Despues di a contesta pregunta tocante liderazgo di partido POR, sr. Bikker a elabora riba su pensamentonan pa loke ta trata bay eleccion y su motibonan pa uni cu sr. Otmar Oduber den POR y no bay eleccion como PDR.
Andin Bikker: “Mi tin mi profesion di abogado di cual mi ta un bon abogado. Mi por claim esey pasobra mi tin un trayectoria di abogacia di mas cu 20 aña caba cu resultadonan palpabel di e casonan cu ma yega di haci. Mi tin un profesion y as a matter of fact ta un sacrificio pa pone mi mes disponibel pa sirbi pueblo pasobra mi no mester di e profesion awo akinan. Cada eleccion mi ta haci un evaluacion di si mi ta bay bek abogacia of mi ta bay pone mi mes desponibel atrobe. Ma bisa e biaha akinan, mirando e retonan di 3 eleccion caba cu constantemente bo ta pasa e retonan di e candidatonan cu ta trek voto, e di dos, haci recaudacion di fondo, cu hopi biaha… bo no ta haya suficiente tur ora dus e ora bo ta keda cu retonan financiero despues di eleccion. Anto e ora mi a bisa, wel, mi por haci dos cos: no bay [eleccion], of mi ta bay pero den un forsa nobo.”  

Sr. Bikker ta splica cu den un union tin mas potencial pa atrae posibel candidatonan, y cu recaudamento di fondo ta bira mas facil den un union. Bikker tambe ta mustra riba e combinacion di experiencia politico di su persona y Otmar Oduber. Bikker ta menciona cu sr. Oduber tin un trayectoria largo, tawata parlamentario y minister di un di e carteranan mas importante [turismo], mientras cu e mes [Bikker] tin su trayectoria como parlamentario y a entrega varios amienda no solamente na Aruba pero tambe na Hulanda pa loke ta trata leynan cu ta aplicabel pa mas pais den reino Hulandes. 
“… as a matter of fact ta un sacrificio pa pone mi mes disponibel pa sirbi pueblo pasobra mi no mester di e profesion awo akinan.”

Financiamento di Campaña
ArenaPoliti.co a puntra sr. Bikker si financiamento pa campaña cu sr. Otmar Oduber por atrae, ta un factor pa sr. Bikker pa uni cu sr. Oduber.
Bikker: “Na final di dia, ora bo ta den un organisacion chikito, di mi experiencia, ta un grupo chikito di hendenan ta haci tur cos. Una bes bo uni forsa bo por bin cu comisionnan dedica pa haci diferente cos. No solamente cu e mesun persona cu basicamente ta order T-shirt ta esun cu ta yamabo pa bende bukinan di doorprize. Dus esey ta e synergia. Esey ta irespecto si bo ta uni forsa cu X of cu Y. Bo ta uni forsa anto bo tin mas hende cu por dedica atencion y energia na diferente aspectonan di un partido politico. Esey ta e dimension cu ami ta wak cu, di mi banda. Enbes di bolbe bay un eleccion mi so, cargando un partido, hopi biaha kedando cu debenan financiero, anto pa di cuater biaha, y risga di bay perde un asiento paso ta mi so atrobe, anto e ora ma bisa no, awo e union akinan tin su beneficionan y e beneficionan ta e aspecto cu bo por tin un team dedica di fundraise, pero tambe otro teamnan cu ta plania otro diferente aspectonan di material di campaña, contacto cu miembronan, organisa reunion di contacto, actividadnan, etc.”
Enbes di bolbe bay un eleccion mi so, cargando un partido, hopi biaha kedando cu debenan financiero, anto pa di cuater biaha, y risga di bay perde un asiento paso ta mi so atrobe, anto e ora ma bisa no, awo e union akinan tin su beneficionan...” 

Media Power
Un otro pregunta tawata si e acceso na media y publicidad di sr. Oduber ta un factor pa e union.
Bikker: “Ami a tene cuenta cu e dimension di dje cu e tin un dimension organisatorio. E tin 27 aña cu e tawata den e gelederennan di AVP, e ta conosi cu e ta bon organisa. Ela organisa internamente diferente campañanan tambe, of yuda organisa pa AVP. Anto e totalidad, esey en todo caso ta interesante pami.”

Den su contesta, Andin Bikker ta bay bek na su motibo principal pa e union, y ta añadi: “E ‘pakico’ [pa uni cu Otmar Oduber] ta keda cu bay eleccion mi so, carga e partido pa di cuater biaha, no tawata un opcion mas. Y esey no a bin di awo. Desde e resultado di 2013 cu [PDR] a bolbe pega na un asiento, ma bay na partijraad… e sostenedornan, vrijwilligers… ma bisa nan cu mi ta bay evalua bon kico mi ta bay haci paso mi no por sigui bay eleccion asina’ki.”
170220 andin
Segun sr. Bikker, na cuminsamento di 2016 tawata tin interes di uni cu sr. Oduber: “Ora cu sr. Otmar Oduber a anuncia na januari 2016 cu e ta pensando di retira, anto e ora eynan caba diferente persona rond dimi cu a corda e mensahe cu ma duna nan y cu a biba e retonan cu ora nos a keda purba di entrevista candidato, cu ta hopi dificil pa bo haya candidato ariba lista, ora nos haci fundraising e reaccion ta ‘si, pero Andin ta su so’ etcetera, anto e ora di biaha nos a cuminsa pensa den un posibel union cu sr. Oduber pasobra e ta un persona cu experiencia di campaña, etcetera, y un minister cu un trayectoria. Dus esey ta e cos. E no ta un cos cu mi a dicidi di bay den e direccion akinan pasobra lo tin un dimension mediatico of algo asina. E ta gewoon cu, ta of mi ta bay [eleccion] den un dimension nobo, of lo mi no a bay mas.”
E ‘pakico’ [pa uni cu Otmar Oduber] ta keda cu bay eleccion mi so, carga e partido pa di cuater biaha, no tawata un opcion mas.” 

Spindoctor
Un otro punto cu a wordo papia ta e ‘clashnan’ cu sr. Bikker tawata tin cu sr. Oduber durante aña 2016 ora cu sr. Bikker a considera sr. Oduber un minister cu no ta transparente y tambe ora ela yama sr. Oduber un spin doctor. E relevancia di e pregunta ta e hecho cu sr. Bikker lo bay eleccion puntrando pueblo pa sosten mientras cu e mesun sosten ey lo yuda Otmar Oduber, cual Bikker a considera un minister intransparente y un spindoctor, bira parlamentario of minister.
Andin Bikker: “Tur e diferencia di opinion cu nos tawata tin, nos a settle nan.” Bikker ta bisa cu turismo no ta su experticio, cual tawata e cartera principal di Otmar Oduber, y cu “rara vez” e tawata tin diferencia di opinion cu sr. Oduber. Bikker ta añadi: “Ora bo uni politicamente bo ta papia di diferencianan di opinion, bo ta settle nan, y bo ta traha pa futuro. Bo no por keda bay bek den tempo paso historia bo no por cambia mas.”
E modelo cu ami ta usa, cu ta comparabel cu loke nos ta haci awo akinan, ta ora cu Watty Vos a dicidi di bay uni cu AVP.”

Bikker tambe a duna ehempelnan di otro politico cu no tawata riba mesun liña pero despues a uni. E ta bisa cu sr. Watty Vos (d.f.m.) tawata “hopi fel” cu sr. Henny Eman prome cu sr. Vos a uni cu AVP. Sr. Bikker tambe ta menciona cu sr. Mike de Meza tawata den PPA y a campaña usando e lema ‘the betta Mike’ cual tawata dirigi na sr. Mike Eman, y despues a uni cu sr. Eman.
Bikker: “Historia politico di Aruba mes, cu ehempelnan palbabel, di prome cu ami a pensa mes di drenta politica, e ta un historia cu partidonan a uni, candidatonan a uni, y nan tawata tin resultado positivo electoral. E modelo cu ami ta usa, cu ta comparabel cu loke nos ta haci awo akinan, ta ora cu Watty Vos a dicidi di bay uni cu AVP.”  
“E union akinan ta pa futuro. E union akinan no ta pa bay keda wak patras pasobra sino e no ta make sense.”

Maneho di Gabinete Mike Eman I y II
Cu e mesun relevancia di e pregunta anterior ArenaPoliti.co a puntra sr. Bikker su pensamento riba e hecho cu, mientras cu Bikker a reclama e maneho di gabinete Mike Eman I y II e ultimo 7 aña, Otmar Oduber a defende e maneho aki y na 2016 ainda a declara di ta “mas orguyoso cu nunca” di Gabinete Mike Eman II y di AVP. Pues tin un discrepancia substancial entre e pensamento di Bikker y Oduber pa loke ta trata e maneho di Gabinete Mike Eman I y II, mientras cu awo nan mester presenta y defende 1 plan di maneho pa pais Aruba.
Andin Bikker: “Ora bo uni cu un opositor politico ta pa futuro. Bo no por keda bay wak den spiel patras paso e tempo eynan nos no tawata para e mesun banda pa loke ta trata nos vision politico. Awo akinan nos a uni paso nos ta kere den un vision comun. Y e [Otmar Oduber] a bandona e gabinete tambe pasobra dado momento e no ta di acuerdo mas cu e vision di e gabinete. Sino nos no ta para na e crusada akinan. Ami no por bay keda wak riba con ma vota tempo cu e tawata para cu gabinete di AVP pasobra esey ta cosnan cu mi no por cambia mas. Awo akinan mi ta wak pa futuro… E union akinan ta pa futuro. E union akinan no ta pa bay keda wak patras pasobra sino e no ta make sense.”  


Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.