Ayera (1 februari) lider di fraccion AVP sr. Rene Herdé a manda un comunicado di prensa titula 'Pakico no? Buscando e miho solucion pa desaroyo socio-economico sostenibel!' (klik pa lesa)
Den e comunicado sr. Herdé ta puntra dicon Hulanda no ta haci uso di su bon reputacion financiero pa Aruba por haya un prestamo na un interes hopi abou. E parlamentario ta splica cu, si Hulanda permiti Aruba fia placa por medio di e modelo menciona, Aruba lo por spaar anualmente mas o menos 200 miyon Florin na interes. Un suma substancial.
Despues di a lesa e comunicado, ArenaPoliti.co a tuma contacto cu sr. Herdé y duna un posibel contesta riba e pregunta cu e ta haci den su comunicado. ArenaPoliti.co a puntra e parlamentario pa reacciona riba e posibel contesta, y tambe un di dos pregunta.


ArenaPoliti.co: Considerando expresionnan di politico Hulandes y loke e sugerencia ta nifica pa Hulanda, un posibel contesta ta: Paso esey kiermen cu Hulanda mester para garantia pa e fiansa(nan), y si gobierno di Aruba no cumpli, e pueblo Hulandes (belastingbetaler) ta esun cu lo sali perdi. Pues, prome cu Hulanda para garantia, ta probabel cu nan kier tin siguransanan cu Aruba lo cumpli cu pagonan y cu e 200 miyon Florin realmente lo wordo usa directamente pa reduci e debe di pais Aruba. Pa haya e siguransanan aki, Hulanda probablemente lo kier por supervisa y den cierto forma controla finansas di pais Aruba. Esaki similar na e situacion di Corsou; Hulanda ta para garantia pa Corsou por probecha di e interes abou cu Hulanda ta haya a base di nan reputacion, y Hulanda ta eherce supervision financiero stricto por medio di Cft. Pues e motibo pakico no, por ta paso Aruba lo mester acepta supervicion y control financiero similar na esun na Corsou. Esey lo kiermen cu Cft su rol pa cu Aruba su finansas lo bira algo oficial, sin e forma actual di duna ‘sugerencianan’ na gobierno di Aruba. Y actualmente esey no ta e caso. Probablemente, gobierno di Hulanda lo ta dispuesto pa haci'e si gobierno di Aruba acepta Cft den un forma similar cu na Corsou. Sr. Herdé por reacciona riba e posibel contesta aki?

Rene Herdé: Aruba tin 30 aña ta paga su propio gasto y debenan. Nos no ta den Reino pa Hulanda paga pa nos. Si pa e paisnan yuda otro unda cu nan por. No tabata tin, no tin y no por tin niun motibo pa Aruba no cumpli cu su responsabilidadnan financiero den futuro. Al contrario: ta net door di yuda kita e peso di e interes halto, ta crea e espacio financiero pa reduci e debe mas lihe. Loke ta bini aserca ta cu lo por haci'e sin cu e ta costa Hulanda niun cen. Na mes un momento lo por sigui cu e reforma di sector publico, pero sin e consecuencianan di austerisacion pisa cu a aplica na Hulanda y otro paisnan Europeo. Professor Bas Jacobs di Universidad di Rotterdam ta splica bon kico e consecuencianan social di e austerisacion pisa ta pa un comunidad y con mas pisa esakinan ta cu e costo di e debe mes. Pesey nos a scohe pa un otro forma pa sali di e crisis.

Cu Hulanda kier implementa Cft na Aruba no ta cos di awo. For di 2010, na momento cu a sanea e debe di Corsou y Sint Maarten, tabata kier pa Cft conta pa Aruba tambe.... pero sin saneamento financiero! E maneho di Cft lo tabata desastroso pa Aruba si a bay di acuerdo na 2009. Nos lo ta den e situacion social pio cu Spaña. Ta door di e maneho contrario na esun di Cft, esta di stimula economia, mehora forsa di compra, door di haci inversionnan grandi den hende, den enseñansa, den drecha fondonan social, cu a logra saca economia for di e punto di -13% y his'e den cuatro aña na +3%. Bou di e regimen di Cft esaki nunca lo a logra. Djis wak e resultadonan di cinco aña di Cft na Corsou y Sint Maarten. Of wak e maneho di Hulanda mes: despues di 7 aña di crisis ainda mester austerisa pisa, economia ta sigui crece poco y desempleo ta sigui halto, problemanan social ta sigui crece sin perspectiva pa bira miho! Ta pesey nos ta contra di e formula di Cft.

Nos NO ta pidi pa Hulanda paga e debe of pa para garantia pa e debe di Aruba. Esey Aruba mes por y mester haci. Nos a demostra esey durante 30 aña. E unico cos cu ami a sugeri, ta pa Hulanda facilita e fiansa pa cubri e debe y laga Aruba paga esaki bek. Mescos cu a haci pa 30 aña. Solamente e ta pa Hulanda haya e financiamento na un interes hopi abou, mecos cu Hulanda mes ta fia (0-2%). Aruba ta keda responsabel pa su pagonan. No ta esey ta e intencion pa yuda otro den Reino? No pa carga responsabilidad di otro of pa paga debe di otro! Den combersacion cu politiconan Hulandes, nan mes ta bisa "het kost Nederland niets" pa facilita Aruba e fiansa na interes abou. Pakico nan no ta haci'e y laga tur otro areglo den Reino y den Statuut keda manera e ta.


ArenaPoliti.co: Sr. Herdé como parlamentario lo sostene entregamento di parti di Aruba su autonomia financiero a cambio pa haci uso di Hulanda su bon reputacion financiero pa Aruba por fia na un interes abou?

Rene Herdé: No! Nos tabata y ta contra pa adopta e Rijkswet Cft na 2010. Si nos a wak kico Cft a haci na Corsou, e ta duna nos mas motibo pa no ta di acuerdo. Tampoco nos kier cambia loke ta poni den Statuut: finansa ta un asunto di e paisnan autonomo. Niun caminda den Statuut ta poni cu paisnan di Reino ta yuda otro bou condicion cu ta entrega autonomia! Dicon e exigencia ey?

Expresionnan haci den e articulo aki no necesariamente ta refleha opinion di ArenaPoliti.co