Perspectiva Independiente without background 001

E motibonan tras di e maneho di permiso ‘Swiss model’ [entrevista]

Booshi03
Lider di UPP y candidato #1 riba Lista PPA/UPP, Candelario ‘Booshi’ Wever ta na fabor di reintroduci e Swiss model na Aruba como e maneho di permisologia pa esnan cu kier bin biba y traha na Aruba. Como ex-minister sr. Wever a ehecuta e Swiss model for di 2005 pa 2009. Booshi Wever: “Mi a hiba un maneho cu ‘zero corruption’ y ‘zero exceptions.’ Esey contrario na e manehonan cu a wordo hiba prome cumi y e disaster cu a tuma luga e ultimo ocho aña.”

ArenaPoliti.co a puntra sr. Wever pa un splicacion concreto di e Swiss model, pakico e lo ta bon pa Aruba, si ta un maneho anti-stranhero y mas.

Modelo Suiso bou di maneho di sr. Booshi Wever
Sr. Wever ta splica cu e punto di salida di e Swiss model ta proteccion di nos mercado laboral y e bienestar general di nos pais. E modelo Suiso ta encera cu tur trahado nobo cu kier bin traha na Aruba for di exterior por haya un prome permiso pa 1 aña, cu por wordo prolonga dos biaha cu cada biaha 1 aña. Pues ta trata di un periodo cu un maximo di 3 aña. E hecho cu cada permiso inicial y cada prolongacion ta pa 1 aña, ta permiti cu cada aña por evalua si e mercado laboral na Aruba realmete ta exigi un trahado for di exterior. Asina por preveni cu mas trahado ta bin Aruba mientras cu tin persona na Aruba caba cu mester di trabou y por haci e trabou.
Nos mester ta realistico. Aruba ta 180 km² di cual por lo menos 20% mester keda areanan di naturalesa proteha. Nos no por permiti un crecemento desproporcional.”

Prome cu un permiso wordo prolonga e persona mester demostra cu e por papia Papiamento y cu e sa algo di nos pais y cultura. Esaki ta un tipo di ‘inburgeringstoets.’
Despues di e periodo di 3 aña e persona tin cu bandona Aruba. Despues di 3 aña den exterior, e persona lo por regresa Aruba bou di e mesun condicionnan di e trayecto di 3 aña, incluyendo e exigiencia cu realmente mester tin espacio den mercado laboral pa un trahado for di exterior pa e funcion.

E exigencianan tambe ta incorpora un test rigido medico di malesanan cronico y contagioso y un proceso rigido di screening riba pasado criminal.

170831 booshiPakico un periodo maximo di 3 aña
Sr. Wever ta consciente di e critica riba e Swiss model, especialmente e parti cu un stranhero mester bandona Aruba despues di 3 aña. Segun sr. Wever, a pesar cu e no ta algo ‘agradabel’ e ta necesario pa proteha nos mercado laboral y sistema social. Sr. Wever ta splica cu si permiti trahadonan di exterior pa keda mas cu 3 aña consecutivamente, a base di tratado internacional di family life mester permiti ‘gezinshereniging.’ Esey ta significa cu un esposo/esposa y yui(nan) ‘automaticamente’ por establece nan mes na Aruba. Segun Booshi Wever e realidad ta cu esaki tin un efecto grandi riba hopi aspecto y gobierno mester asumi responsabilidad den esaki por medio di un maneho estricto. Sr. Wever ta duna un ehempel di un trahado cu ta wordo permiti pa keda mas cu 3 aña y a base di e tratado di family life ta trece su casa y yuinan Aruba. E exigencia di un trabou no lo conta pa e casa, ni screening medico. Pues hasta si e trahado di exterior ta gana un salario minimo y e contribucion di dje y di su dunado di trabou na AZV ta minimo, henter e famia lo por bin Aruba y AZV lo mester cubri tur. Mester percura pa luga na scol pa e yuinan. Mester tin suficiente tereno y vivienda pa percura cu tin luga pa tur e famianan cu por establece na Aruba a base di 1 permiso. Nos careteranan y infrastructura mester por keda wanta un poblacion cu ta creciente caba. Mester tene cuenta cu e tamaño di nos isla y mester tene cuenta cu nos medio ambiente. Segun sr. Wever un maneho estricto ta necesario pa percura pa crecementonan sano riba diferente aspecto y e Swiss model ta un forma responsabel pa percura pa esaki.

Sr. Wever ta splica cu bou di su maneho ela depolitisa e proceso y e mes no a firma ningun permiso, pero a laga esaki procede segun regla estricto den DIMAS. “Mi tawata controla e proceso bou di mi responsabilidad como minister, pero mi no a firma ni 1 permiso.” Sr. Wever ta enfatisa cu mester sigui ley “a pie de la letra” y percura pa un maneho transparente. “Si cumpli cu e exigencianan e persona ta haya un permiso, si e no cumpli e no ta hay’e.”
No ta un cuestion di ta anti-stranhero, pero ta un cuestion di sirbi e bienestar di pais Aruba pa tur su ciudadanonan.”

Butlers na Aruba

Booshi Wever ta conta cu un ciudadano a puntr’e si mester haci excepcion riba e maximo di 3 aña pa cria di cas. Sr. Wever a splica e ciudadano cu durante e ultimo añanan hopi permiso a wordo duna na hombernan pa ta cria di cas. “Supuestamente Aruba ta yen di butlers. E realidad ta cu gran parti di nan ta haci otro trabou ilegalmente.” Sr. Wever ta splica cu e punto ta cu “e maneho no mester ta uno di haci excepcion. Mester preveni e tipo di abusonan aki por medio di un maneho estricto y transparente.”

E Swiss model ta anti-stranhero?
Booshi Wever no ta considera e Swiss model ‘anti-stranhero’. “E ta un maneho estricto cu ta permiti gobierno di Aruba pa cumpli cu su tarea di sirbi e pueblo di Aruba. Nos mester ta realistico. Aruba ta 180 km² di cual por lo menos 20% mester keda areanan di naturalesa proteha. Nos no por permiti un crecemento desproporcional. Cu e Swiss model nos por percura pa un crecemento responsabel.” Sr. Wever ta mustra riba e aspectonan ya menciona di infrastructura, tereno, vivienda, AZV, enseñansa y cupo di trabou. “No ta un cuestion di ta anti-stranhero, pero ta un cuestion di sirbi e bienestar di pais Aruba pa tur su ciudadanonan.”
ora ciudadanonan scucha kico e maneho ta y e motibonan tras di e maneho, hopi ta compronde cu ta algo necesario.”

Sr. Wever ta sinti cu mas hende ta realisando e balor di e Swiss model. “A pesar cu e Swiss model ta wordo demonisa y cu otro partidonan ta bisa cu e ta un maneho inhumano, ora ciudadanonan scucha kico e maneho ta y e motibonan tras di e maneho, hopi ta compronde cu ta algo necesario. Y e ta conta pa ciudadanonan di diferente decendencia tambe. Nan tambe kier pa Aruba ta un pais drechi y nan tambe tin yui naci na Aruba y e Swiss model ta na bienestar di nos tur.”

E periodo di 3 aña maximo lo crea problema pa doño di trabou cu lo mester busca otro trahado? 
Sr. Wever ta bisa di ta compronde cu por tin situacionnan fastioso pa companianan, pero e prioridad mester ta pa proteha nos mercado laboral pa mantene’le uno sano. Sr. Wever ta enfatisa e aspecto di mester por evalua cada aña si ta na su luga pa duna un permiso of prolongacion. Como ehempel e ta menciona cu gobierno mester percura pa un studiante cu a bay studia afo por regresa Aruba pa bin traha. “Si mientrastanto nos permiti trahadonan di afo haya y mantene e cuponan di trabou aki, nos ta perhudicando esnan cu nos tin cu proteha.”
… nos ta perhudicando esnan cu nos tin cu proteha.”

Hunto cu introduccion di reglanan di Good Governance y un Mededingingsautoriteit, e Swiss model ta forma un parti esencial den e vision di UPP pa cu Aruba. “Mi ta kere cu e Swiss model, hunto cu reglanan estricto di Good Governance y tambe introduccion di un Mededingingsautoriteit lo percura pa ordo y disciplina cu actualmente no tin. Y tur esaki lo ta na bienestar di nos pueblo y lo percura pa un miho mañan pa nos tur.”

Terminando, sr. Wever ta expresa cu e kier wak Aruba surpasa un nivel di Good Governance, pa yega na un pais caminda nos por papia di Great Governance. “Nos pais ta den un situacion cu ta exigi gobernantenan cu seriedad, experiencia y capacidad. Y pa nos por tin un futuro briyante, cu prosperidad, nos mester di innovacion. Lista PPA/UPP ta cumpli cu e rekisitonan aki y ta un alternativa real pa pueblo.” 


Relevante: 
Booshi Wever (UPP): Swiss-model ta un modelo inhumano of un necesidad?
UPP: “Mededingingsautoriteit” ta necesario pa progreso, desaroyo, bienestar y felicidad di e pueblo Arubano
Booshi Wever (PPA/UPP): Good Governance combina cu Experiencia, Seriedad, Capacidad y Innovacion ta bira Great Governance

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.