For di aña 2011 caba ex-Minister di Salubridad Candelario ‘Booshi’ Wever ta cuestiona e proyecto di renobacion di hospital (HOH). E lider di UPP a haci diferente acusacion en coneccion cu e otorgamento di e proyecto.
Recientemente por a lesa y scucha na diferente medio di prensa cu pa motibo di un eror, miyones di florin extra lo mester wordo paga pa renobacion di sala di operacion di HOH. Sr. Wever ta acusa Minister di Salubridad Alex Schwengle y director di AIB Frendsel Giel di a gaña tocante cifras y sucedidonan cu a resulta den e situacion actual. Sr. Wever a laga sa di tin diferente documento riba cua e ta basa su ponencianan, y “esnan cu ta sinti nan mes ofendi por bay corte”, caminda segun sr. Wever mas berdadnan lo sali na cla.
Mientrastanto integrantenan di MEP y PDR tambe ta cuestionando e proyecto, cu ta riba agenda pa wordo trata durante un reunion publico den Parlamento e siman aki.

ArenaPoliti.co a haci sr. Wever algun pregunta tocante e proyecto, y tambe tocante plannan cu tawata tin tempo cu e tawata Minister di Salubridad, pa un hospital completamente nobo na un diferente sitio cu HOH.


ArenaPoliti.co (AP): Den bo opinion, kico no a bay bon cu e destaho publico pa e proyecto di renobacion di Hospital (HOH)?
Booshi Wever (BW): Eigenlijk e pregunta mester ta kico a bay bon, pasobra e zogenaamde destaho publico tabata un wassen neus pasobra for di un principio bo por a mira cu ta Arrellano lo a bay gana e bid. No lubida cu e grupo Frances cu un experencia mucho mas amplio cu Arrellano a bid 40 miyon florin menos pa un proyecto cu tin tur detayes den dje caba. Den prome instancia den e comision cu a evalua e bidnan e grupo Frances a gana e bid. Di e cinco hendenan tres a vota na fabor di e grupo Frances y dos na fabor di Arrellano. A saca un di esnan cu ta na fabor di e Francesnan y a bolbe vota y e votacion a sali otro.
Nos a tuma nota tambe di e hecho cu esnan prome responsabel pa henter e proyecto aki, ta tira culpa riba otronan. Por a evita tur e discusionnan aki si Frendsel Giel a mantene su pensamento di un hospital nobo y cu e sitio unda HOH ta situa awo ta totalmente inadecuado y si gobierno a djies sigui cu e proyecto di un hospital nobo y e hospital na San Nicolas. Pues esnan culpabel den henter e asunto aki na prome luga ta Mike Eman, Visser, Giel
(Soga) y Schwengle.

AP: Kico a bay robes cu e operatiekamer?
BW: Na prome instancia a duna di conoce cu e OK [operatiekamer] lo no mester wordo renoba pasobra na 2010 ya caba esaki a socede. Sinembargo for di e segundo mita di 2013, pues mas cu un aña y mey pasa Raad van Bestuur [di HOH] a duna di conoce cu e OK renoba no ta cumpli cu exigencianan actual y a pone TUR stakeholdernan na altura. By the way e grupo Frances cu a inspecciona henter e edificio di HOH a bisa TUR esnan involvi cu e OK no ta cumpli cu e exigencianan moderno y sigur lo no bay 'mee' pa e siguiente 25 añanan nos dilanti. Y despues na mei 2014 tambe TUR esnan involvi a haya un presentacion di un compania Hulandes Bussman cu ta sali hopi mas barata cu esun presenta awo pa Bermello. Pues aki un biaha mas Arrellano a wordo previlegia. Masha bon por a bay un destaho publico.

AP: Cu e destaho y e eror cu e OK tras di lomba, kico bo ta conseha minister Schwengle haci awo?
BW: Mi ta di opinion cu TUR cos cu por, a bay malo den e otorgamento di e proyecto y alabes mi ta convenci cu tin cosnan penal a socede cu mi ta di opinion cu mester para e proyecto y laga haci un investigacion forensico riba henter esaki.

AP: Na varios ocacion bo a menciona cu, como minister di Salubridad, bo tawata tin planes den 'pipeline' pa un Hospital completamente nobo. Con avansa e plan tawata ta, y kico bo por conta nos di e plan, incluso e localidad y prijs?
BW: Na 2007 mi a pidi AIB (Frendsel Giel ta director) pa haci un estudio pami riba un hospital nobo. Nan a bisa den nan evaluacion cu e sitio unda HOH ta situa ta totalmente inadecuado. Nos tabata tin un tereno na San Barbola na bista, un luga no mucho leu for di aeropuerto y na unda e ringweg cu lo pasa banda di Codemsa ta situa. Dus lo tin un coneccion perfecto cu henter Aruba y cu bo lo no haya bo mes cu trafico pega manera awor ta e caso. Pa motibo cu mi tabata dedica masha tempo na Imsan, cu mi a considera un prioridad y cu lo mester ta un complementacion di un cuido medico di calidad halto aki na Aruba, mi no a sigui haci mucho cu solamente bin cu un stuurgroep bou presidencia di Boesten cu mester a prepara henter e procedura di un destaho publico y traha un projectdossier. Loke cu AIB a presenta ta cu esaki lo bay costa alrededor di 217 miyon florin pa algo NOBIS NOBIS y esaki lo wordo financia cu un aumento TEMPORAL di e prima di AZV. No manera ta e caso awo cu e proyecto aki lo bay costa mas di 250 miyon florin pa construi pero al final pueblo lo mester bay paga mas o menos 840 miyon florin. Esaki ta 28 miyon na huur pa 30 aña largo. Y cualkier mucha di kleuterschool por sa cu esaki tin su consequencianan pa e calidad y e condicionnan di trabou pa e empleadonan di HOH.


Comunicadonan recien di sr. Booshi Wever tocante e proyecto di renobacion di HOH:

• Minister Schwengle ta recuri na mentira y intimidacion pa trata di silencia e berdad encuanto e sala di operacion
• Analysis di declaracionnan haci door di Schwengle y Frendsel Giel tocante renobacion di sala di operacion na nos hospital
• Parlamento mester yama minister Schwengle pa bin responsabilisa su maneho pa evita mas daño y gasto innecesario na nos salubridad
• UPP un biaha mas ta denuncia falta di transparencia cu planificacion di un sala di operacion nobo

**Si bo a wordo menciona/acusa den e articulo aki y bo kier manda un reaccion, manda un email pa This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co