Evelyn Wever-Croes (MEP): Pa MEP no tin prijs riba salud di hende y sigur no riba bida di hende
Cuido di salud di e cuidadano a bai atras considerablemente, y e confianza den nos cuido di salud ta menos. Nos institutonan cu mester brinda servicio di salud ya no por cu e demanda debi na cresemento di nos poblacion. E realidad cu nos ta bibando aden awor ta cu un paciente mester warda varios luna pa haya cita cu su specialista, y algun no ta logra warda asina tanto y ta perde e lucha cu nan malesa prome cu e dia di nan cita yega. Un pacient mester warda 2 luna pa por hasi un MRI, y mientras tanto si e tin un malesa, esaki ta sigi avanza, y talves pa dia e hasie e MRI, ya ta laat.
Pa MEP no tin prijs riba salud di hende y sigur no riba bida di hende. Nos ta conciente cu un pais cu ta respeta su mes, mester brinda un cuido di salud digno na su cuidadanonan, y cu esey nos ta compromete: mehora e calidad di cuido pa un y tur.
SOLUCION pa problemanan den cuido di salud:
- Mas dokter di cas y specialista pa cada ciudadano haya e oportunidad di un atencion medico specialisa y rápido. Tambe soluciona e problema di nos studiantenan di medicina cu ta studia den regio cu nan diploma no ta wordo reconosi
- Equipa y enforsa e departamento di “Inspeccion” pa garantisa un bon nivel di calidad di cuido y implementa standardnan halto den e calidad di e cuido medico
- Mehora e comunicacion entre dokternan y specialistanan na Aruba, y den e cuadro aki e dokter mester aplica un sistema di control (“triage”) mas optimo na momento di referi e pacient na un specialista
- Amplia e cantidad di enfermeronan y persona cu ta traha den e area di cuido, y brinda nan condicionnan di trabou atractivo
- Mas Centro Medico y di Diagnostico riba nos isla pa duna asistencia medico imediatamente, cuminsando cu upgrade Centro Medico San Nicolas y hasi’e un hospital; riba termino largo mester tin un Centro Medico y di Diagnostico den cada districto, cu posibilidad di hasi dialisis y asina trese e cuido medico mas serca di e ser humano
- Atende cu e problematica di e malesa cancer y hasi investigacion dicon e índice ta asina halto na Aruba y traha cu mas enfasis riba prevencion y combatimento di e malesa aki,
- Duna mihor asistencia na esnan den necesidad cu material y remedi pa enfermonan
- Re-evalua e sistema di tratamento medico den exterior, pa brinda un mihor trato y mes momento baha gasto
- Restructura costo di cuido di salud y modifica e sistema di AZV, caminda ta necesario ta baha gasto, pero esaki no por afecta e calidad di cuido di salud di e ser humano y cambiando e enfasis na cuido di salud curativo pa cuido di salud preventivo
- Maneho responsabel riba uso di remedi generico y no-generico den caso di pacientnan cu malesa cronico, cu mester hasi uso di remedinan no-generico pa asina garantiza e salud di nos poblacion den 15 aña y mas.
- Separa cuido di salud di adultonan mayor di cuido di salud general
Expresionnan haci den e articulo aki no necesariamente ta refleha opinion di ArenaPoliti.co