Elton Lioe-A-Tjam (ABO): Partido ABO no ta cumpra voto!
Un di e aspectonan di corupcion den politica, specialmente durante campaña electoral ta: susha man di un votado. Na tur momento, partido ABO ta contra tur forma di corupcion. Partido ABO ta desaproba corupcion den gobernacion, corupcion den campaña electoral, corupcion den bida diario riba tereno social, economico, financiero y eclesiastico.
Den e articulo aki lo trata solamente corupcion den campaña electoral, specificamente e cumpramento di voto door di un partido politico, of door di un campañado na nomber di un partido politico.
Practicanan cuestionabel di partidonan politico tradicional durante un campaña electoral:
- Uza placa di pueblo y/of fondonan ricibi for di comerciantenan, pa core un campaña luhoso y abundante. Construi cantidad di borchi gigantesco cu potretnan grandi di candidatonan. Traha banderanan excesivamente grandi y influencia ciudadanonan pa pega bandera y otro material di propaganda partidista e.o. na nan cas y na nan vehiculo. Establece y habri tur caminda oficinanan di propaganda (cu ta causa solamente problema, desorden y discordia) y cu despues di eleccion ta muri un morto abrupto;
- Cu e fondonan amplio, por influencia cierto medionan di comunicacion (Radio/Television/Corant/Social media) y por cumpra cierto reportero cu en realidad no ta periodistanan berdadero, pero figuranan cu ta haci negoshi cu nan noticiero. E supuesto periodistanan, ya menciona, ta filtra e noticia, ta manipula cu e noticia y ta censura tur noticia cu no ta na fabor di e partido politico cu nan ta sirbi y faborece;
- Cu e fondonan por paga bandanan musical popular y DJnan conoci pa toca na eventonan propagandistico di e partido. Asina ta atrae un publico grandi cu por wordo influencia cu discursonan populista (cu hopi promesa cu no por wordo cumpli).
Borchinan grandi, propaganda masivo y evenementonan musical masalmente atendi, por influencia hende pa kere cu ya un cierto partido politico ta esun ganado. E forma agresivo aki di haci propaganda, ta intimida cierto hende y pone nan vota pa e partido cu di antemano ta sugeri cu e ta bay gana e eleccion;
Cierto reportero y cierto media di comunicacion cu, pa pago, ta faborece un partido politico, ta stroba of te hasta nenga un partido nobo pa expresa su ideanan, su vision. Di e manera ey e medionan di comunicacion ta blokia e derecho di un ciudadano pa haya informacion. Pues, nan ta eherce censura y ta duna informacion partidista di un banda solamente. Asina ta stroba un organisacion politico nobo pa haya acceso na e pueblo. Asina ta stroba e organisacion nobo pa mustra su amor pa e pueblo y su envolvimento encuanto e bienestar di su pueblo.
Censura di parti di medionan di comunicacion contra partidonan nobo, y faboritismo total pa partidonan tradicional cu hopi fondo financiero, ta contra democracia y etica periodistico.
E votado mester por ta liber pa tuma nota di tur ponencia y di tur principio di tur partido politico, pa despues e uza su propio pensamento, su propio huicio, su propio inteligencia, su propio boluntad como guia ora e bay vota riba dia di eleccion. Esey ta berdadero democracia. Y e democracia berdadero ey no ta dura solamente un dia. No ta asina cu ta solamente un dia den cada cuatro aña ta existi democracia. Un ciudadano votado tin e deber di tin un mente critico y independiente durante tur dia di tur aña cu e ta na bida.
Partidonan tradicional ta inclina pa cumpra voto pa nan bira of keda un partido grandi. Cumpramento di voto den un eleccion ta un hecho repudiabel, ta contra ley, ta contra etica y ta contra democracia. Cumpramento di voto ta un acto coruptivo cu ta stimula materialismo y oportunismo. E no ta fomenta solidaridad, sino egoismo. E ta mata IDEALISMO, specialmente cerca nos hubentud!
Cumpramento di voto ta falta respet pa abo como votado. E ta podera di bo integridad como hende. E ta un atentado riba bo mente independiente. E ta encontra di bo boluntad propio. E ta rebaha bo balor humano. E ta cumpra bo libertad y te hasta bo alma.
Partido ABO como organisacion politico nobo, no ta pidi pa medionan di comunicacion ta su portavoz. Partido ABO no kier propaganda politico gratis for di ningun media di comunicacion. Ta husto y normal cu mester paga pa propaganda politico. Pero si partidonan tradicional ta haya espacio gratuito pa nan comunicadonan y entrevistanan na nan ruedanan di prensa, anto partido ABO ta di opinion cu tur organisacion politico, tanto esunnan tradicional como tambe esunnan nobo, mester haya e mesun trato. Loke e medionan di comunicacion ta considera noticia cerca e partidonan tradicional, mester conta tambe pa e partidonan nobo;
Partido ABO ta di opinion cu ningun partido politico, ni ningun politico tin e MONOPOLIO di sabiduria, ni di stimacion pa su pueblo, ni pa e lucha pa bienestar di nos pueblo. Tur bon Arubiano ta stima su pais. Tur bon Arubiano tin e pleno derecho y deber di lucha pa adelanto y bienestar di su pueblo. E mester por haci esey den pleno libertad y no bou di e yugo di miedo, corupcion y sed di poder.
Pueblo mester por tuma nota di ideanan y programa di tur partido, y cu mente liber, critico y independiente e mester por tuma un decision, despues di a pensa y a husga huiciosamente. Esey partido ABO kier!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...