Manera ta custumber, cada fin di aña diferente medio di prensa ta duna premio y nombra diferente persona como entre otro 'man of the year' y 'woman of the year'. Despues di a considera diferente forma pa midi y reconose e trabou di politico Arubiano, e team di ArenaPoliti.co a dicidi pa haci un encuesta y asina ofrece pueblo e oportunidad di expresa nan opinion tocante e gobernacion cu nos a experencia durante aña 2014.

Durante e ultimo dies dianan di aña 2014, tur hende por a participa na e encuesta. E pregunta di e encuesta ta: ‘Cuanto strea bo ta duna Gabinete Mike Eman II pa su maneho, ehecucion y funcionamento durante aña 2014?’
E encuesta a trata e maneho, ehecucion di e maneho, y funcionamento en general di Gabinete Mike Eman II, como un (1) entidad (tur ministerio hunto), durante aña 2014. Participantenan por a escohe entre e siguiente opcionnan:
1 Strea = Hopi Malo
2 Strea = Malo
3 Strea = Neutraal / No bon, No malo
4 Strea = Bon
5 Strea = Hopi Bon

E average di e contestanan a resulta di ta 2,2 strea. Manera por mira riba e imagen, mita di tur participante a duna Gabinete Mike Eman II 1 strea. 16% di participante a duna 2 strea, mientras cu 13,2% ta considera nos gobierno uno di 5 strea.

Por a nota basta comentario riba Facebook tocante e encuesta, tanto riba e page di ArenaPoliti.co, como riba diferente page y profile cu a comparti e encuesta.
Entre tur e comentarionan chistoso y comentarionan demasiado insultativo (cu ArenaPoliti.co ta kita), tambe por a lesa diferente argumento contra y na fabor di Gabinete Mike Eman II. Un punto di discusion principal tawata ta si e construccionnan cu Gabinete Mike Eman II a laga construi, y e reparatietoeslag, ta haci e debe cu a wordo crea y e medidanan cu a wordo implementa ‘bale la pena’. Varios persona a comenta di ta contento y ta wak unda e placa a bay, mientras cu otronan ta di opinion cu mayoria di e placa a wordo usa pa cosnan innecesario, y ta considera e debe y medidanan mucho halto compara cu inversionnan haci.

Pa e resultado di e encuesta, e votonan so a conta, cu e resultado di 2 strea (for di 5) pa Gabinete Mike Eman II pa nan maneho, ehecucion di e maneho, y funcionamento en general durante aña 2014.

ArenaPoliti.co ta gradici cada persona cu a participa, comenta y/of comparti e encuesta. No lubida cu keto bay tur hende por vota den e encuesta electoral riba e homepage di ArenaPoliti.co (cada 7 dia). Facebook page: facebook.com/ArenaPoliti.co

Expresionnan haci den e articulo aki no necesariamente ta refleha opinion di ArenaPoliti.co